12/11/2019 15:28
728 x 90

Prezidentin ətrafında ümumi siyasi birlik prosesini zədələyən hakimiyyətdaxili səslər - Prezidentin siyasətini anlamamaq, ya dövlətçi müxalifətə yersiz inamsızlıq...

“Belə zərərli fikirləri onlar ölkə Prezidentinin hansı siyasəti yeritdiyini yaxşı bilmədikləri üçün səsləndirirlər”

img

Son vaxtlar hakimiyyətə yaxınlığı ilə seçilən bəzi tanınmış şəxslərin mediaya verdikləri müsahibələrdə işlətdikləri fikirlər həm cəmiyyət, həm də hakim komandanın özü tərəfindən birmənalı qarşılanmır. Hətta bu xüsusda elə ziyanlı fikirlər olur ki, onlar ölkə rəhbərliyinin, mövcud hakimiyyətin yürütdüyü siyasətlə daban-dabana zidd sayılır.

Məsələn, bəzilərinin vaxtilə radikal müxalifətdə olub, sonra hakimiyyətə konstruktiv mövqe sərgiləyən insanlara düşmən deməsi, təbii ki, siyasi palitrada yaxşı qarşılana bilməz. Bu, ölkə başçısının ətrafında siyasi toplanma prosesinə mane olan mövqedir.

Təsadüfi deyil ki, hakimiyyətin yuxarı eşalonunda təmsil olunan məmurlar dərhal hakim komandanın içindən səslənən həmin zərərli fikirləri təkzib etdilər və həmin mövqelərin hakimiyyətin yürütdüyü kursla heç bir əlaqəsinin olmadığını bildirdilər. Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov özünün “Facebook” səhifəsində mövzuya belə reaksiya verib: “...Bir daha qeyd edirəm ki, bu prinsiplər dəyişməzdir, Azərbaycan iqtidarı dövlətə və dövlətçiliyə xidmət etmək istəyən hər bir qrup və ya şəxslə dialoqa və əməkdaşlığa açıqdır, öz siyasi rəqiblərini düşmən hesab etmir və onlarla ümummilli məsələlərlə bağlı müzakirə və əməkdaşlığı məqbul sayır”.

Mövzu ilə bağlı Baş nazirin müavini, YAP-ın icra katibi Əli Əhmədov da məxsusi açıqlama ilə çıxış edərək məsələyə izah verib. Prezidentin köməkçisi və Baş nazirin müavini bu qəbildən olan fikirlərin YAP-ın və İlham Əliyev iqtidarının mövqeyini əks etdirmədiyini bəyan ediblər. 

Maraqlıdır, hakimiyyətə yaxınlığı ilə seçilən bəzi şəxslərin belə məzmunsuz fikirləri səsləndirməsi nə ilə bağlıdır - Prezidentin siyasətini anlamamaq, ya konstruktiv müxalifətə inamsızlıq?

  • Qabil Hüseynli: “Onlar bu iqtidarın daha da möhkəmlənməsi üçün səy göstərmək əvəzinə, onun dayaqlarını laxlatmaqla məşğul olurlar”

Politoloq Qabil Hüseynli “Bakı-Xəbər”ə bildirdi ki, belə fikirlərin işlədilməsindən dərin narahatlıq keçirir: “Çox təəssüflə qeyd etməliyik ki, belə fikirləri hansısa müstəqil siyasətçilər yox, məhz hakimiyyətdə təmsil olunanlar işlədirlər. Sözün kim tərəfindən, hansı məqsədlə deyilməsinin böyük önəmi var. Belə bir deyim var: “arpa yeyib cənnətdən keçirlər”. Həmin fikirləri işlədənlər məhz o tip adamlardır. Araşdırdıqda məlum olur ki, analoji fikirlərin müəlliflərinin heç normal dünyagörüşü, savadı belə yoxdur. Olsaydı, belə danışmazdılar. Biz niyə öz içimizdə düşmən axtarmalıyıq? Məgər fərqli fikrin daşıyıcısı olmaq düşmən olmaq anlamına gəlir? Özü də bunlar həmin cəbhədən öz tərəflərinə keçənə düşmən deyirsə, sabah kim iqtidara tərəf gələcək? Bəli, belə zərərli fikirləri onlar ölkə Prezidentinin hansı siyasəti yeritdiyini yaxşı bilmədikləri üçün səsləndirirlər. Hakimiyyətin siyasi kursundan xəbərləri yoxdur. Yaxşı ki, hörmətli Əli Həsənov dərhal çıxıb bu məsələyə aydınlıq gətirdi. Bildirdi ki, həmin adamların işlətdiyi fikirlərin YAP və hakim komanda ilə heç bir əlaqəsi yoxdur. Ola bilsin ki, insanlar bir siyasi yolun perspektivsizliyini görüb, hazırkı iqtidara yönəliblər. Bəyəm bunu satınalma kimi dəyərləndirmək lazımdır? Çox az adam olar ki, pulun, yaxşı güzəranın müqabilində bunu edib. Axı həmin ifadəni bütün konstruktiv mövqedə olanlara şamil edə bilmərik. İnsanlar öz dövlətini bu yolla qorumaq istəyirsə, onları lağ, məsxərə obyektinə çevirməməliyik. Bunun adına siyasi korazehinlik deyərdim. Sizi əmin edirəm ki, belə adamların keçdiyi yolu araşdırsaq görərik ki, təsadüfən bu hakimiyyətin yanında yer alıblar. Onlar başqa hakimiyyətlərin dönəmində də itaətkarlıq göstəriblər və gəlib təsadüfən indiki hakimiyyətdə yer tutublar. İndi başqalarına lağ etməsinlər. Onlar bu iqtidarın daha da möhkəmlənməsi üçün səy göstərmək əvəzinə, onun dayaqlarını laxlatmaqla məşğul olurlar. Həmin adamlara ciddi xəbərdarlıq olunmalıdır. Çünki ciddi çaşqınlıq yaradıblar”.

Məhəmmədəli QƏRİBLİ

Son xəbərlər