21/11/2019 04:13
728 x 90

ABŞ-ın Ermənistana verdiyi minatəmizləyən qurğular Suriyada işləyir – yeni beynəlxalq qalmaqal...

“Bu, ABŞ-ın sözügedən sahədə Ermənistanla əməkdaşlığı dayandırmasına gətirib çıxara bilər”

img

Məlum olduğu kimi, ABŞ Ermənistanın humanitar missiya adı altında Suriyaya hərbi heyət göndərməsinə mənfi mövqedən yanaşır. Dəfələrlə müxtəlif səviyyələrdə buna Vaşinqtonun yaxşı baxmadığı Ermənistan rəsmilərinin diqqətinə çatdırılıb.

Erməni mətbuatının yazdığına görə, hətta bu günlərdə ABŞ administrasiyası Ermənistan hakimiyyəti qarşısında hərbi kontingentin Suriyadan geri çəkilməsi haqda tələb qoyub. Bununla əlaqədar Ermənistanın müdafiə nazirinin, xarici işlər nazirinin və bir neçə səfirin iştirakı ilə qapalı toplantı keçirildiyi deyilir. Məlumatda o da deyilir ki, ABŞ Ermənistanın Suriyaya hərbi kontingent göndərməsi ilə bağlı narazılığını bu ölkənin BMT-dəki səfiri Mqer Marqaryan vasitəsilə çatdırıb. Bildirilib ki, bu məsələ Ermənistan-ABŞ münasibətlərinə zərbə vurur. Əgər kontingent çıxarılmasa, bunun ikitərəfli münasibətlərə təsiri olacaq, üstəlik, ABŞ Ermənistana verdiyi minatəmizləyən avadanlığın Suriyada istifadə edilməsinə qadağa qoyacaq.

Məsələnin maraq doğuran tərəfi ondan ibarətdir ki, Ermənistan ABŞ-ın icazəsi olmadan minatəmizləyən avadanlıqları Suriyada istifadə edir. Nəzərə alsaq ki, ABŞ Ermənistanın Rusiyanın rəhbərliyi altında Suriyada iştirakına qarşıdır, o zaman bu, tərəflər arasında münasibətlərə təsirsiz ötüşməyəcək. Çünki neçə ildir ABŞ müxtəlif proqramlar çərçivəsində minatəmizləmə sahəsində Ermənistana texniki yardım göstərir. Ancaq aydın olanda ki, həmin avadanlıqlar Suriyada da istifadə edilməkdədir, o zaman ABŞ-ın Ermənistanla bu sahədə əməkdaşlığının axırı necə ola bilər?

  • Ramil Hüseynov: “Son günlər bəzi erməni mətbuat orqanlarında yazılanlar məsələnin ciddi olmasından xəbər verir”

Məsələyə münasibət bildirən VİP-in sədr müavini Ramil Hüseynovun sözlərinə görə, məsələ bir qədər də böyüyərsə, ABŞ bununla bağlı Ermənistanla əməkdaşlığı dayandıra bilər: “Fikrimcə, ABŞ hələ gözləmə mövqeyindədir. Vaşinqton ümid edir ki, Paşinyan bəlli bir mərhələdə Ermənistanın Suriyadakı hərbçilərini çıxaracaq. Ona görə də indiki məqamda bu məsələdə tələsmir. Unutmaq olmaz ki, Suriya məsələsində ABŞ-ın Ermənistandan tələbləri get-gedə daha qabarıq müstəvidə özünü göstərir. Son günlər bəzi erməni mətbuat orqanlarında yazılanlar məsələnin ciddi olmasından xəbər verir. Ermənistan hələlik tələbləri yerinə yetirmədiyi üçün Paşinyan yüksək səviyyədə ABŞ-a rəsmi səfərə dəvət edilmir. Hesab edirəm ki, proseslərin gedişindən asılı olaraq, minatəmizləyən avadanlıqların Suriyada istifadə edilməsi ABŞ-ın bu sahədə Ermənistanla əməkdaşlığı dayandırmasına gətirib çıxara bilər. Lakin Vaşinqton ehtiyat edir ki, İrəvana aşırı təzyiqlər Rusiyayönümlü “Qarabağ klanı”nın yenidən ölkədə hakimiyyətə gəlməsinə səbəb ola bilər. Bu da ABŞ-ın maraqlarına uyğun deyil. Ona görə də rəsmi Vaşinqton bir qədər ehtiyatla bu işi aparır”.

Vidadi ORDAHALLI

Son xəbərlər