10/12/2019 04:08
728 x 90

Eks Azərbaycan nazirləri radikal söyüşçülərin maliyyələşdirilməsi ittihamına hələlik susur...

“Hər iki halla bağlı kriminal fəaliyyətdən söhbət gedir”

img

Milli Məclisin İctimai birliklər və dini qurumlar komitəsinin sədri, YAP-ın icra katibinin müavini Siyavuş Novruzovun sabiq nazirlərlə bağlı verdiyi şok açıqlamalar ətrafında müzakirələr hələ səngiməyib.

O, YAP-ın üzvü olaraq vaxtilə yüksək vəzifə tutmuş sabiqlərin vəzifələrindən uzaqlaşdıqdan sonra “qeybə” çəkildiklərini, hakimiyyətə qarşı əks təbliğat aparanlara susduqlarını bildirib, ittihamlar səsləndirib: “Keçmişdə dövlət rəhbərliyində işləmiş nazirlər var. Biri 20 il işləyib, biri 18 il, biri 15 il, digəri 10 il. Bunlar hamısı çəkilib qırağa, mövqeyini bildirmir. Soruşan gərək, atan, baban sənə vəzifə vermişdi?!”.

S.Novruzov xatırladıb ki, vaxtilə həmin eks-məmurların törətdiyi əməllərə, yol verdikləri qanunsuzluqlara görə hakim komanda hədəf olub: “Hələ bəzi problemləri də elə siz, keçmişdə nazir vəzifələrində çalışanlar yaradırsınız, bunu unutmayın! Ya çıxın, ortaya mövqeyinizi qoyun, ya da sizinlə bizim davamız daha gərgin olacaq! Hərəsi milyardı yığıb altına, qaçıb gizləniblər. Ona görə gəl ortaya, rəhmətlik ulu öndər demişkən, “mövqeyini bildir!”

S.Novruzov eks-nazirlərlə bağlı dosyenin masa üzərində olduğunu deyərək şok ittiham irəli sürüb: “Xaricdə oturanları maliyyələşdirmə! Masamın üzərində hamınızın siyahısı var, kimə nə verirsiniz. Mən onların hər birinə mətbuat vasitəsilə xəbərdarlıq edirəm. Ya mövqeyini bildir, ya da ki, başqa məsələlərə əl atılacaq!”

Bu xəbərdarlıq və ittihamların konkret olaraq kimə ünvanlandığı ilə bağlı isə S.Novruzov bunları deyib: “Mən konkretləşdirmək istəmirəm. Amma keçmişdə nazir vəzifəsində işləyiblər, yerinə yeniləri gəlib, onları nəzərdə tuturam. O insanlar ulu öndərə, cənab Prezidentə minnətdar olmalıdır ki, neçə illər ərzində bu dövlətin naziri kürsüsündə oturub. Amma bu gün onlar tamam başqa yol tutublar. Nə səsləri çıxır, nə sorağı. Dövlətin sizə borcu var idi? Sən dövlət yaratmısan?! Dövləti biz yaratmışıq, mübarizə ilə. Xalq hərəkatında olmuşuq, müharibələrdən keçmişik, digər işləri görmüşük. Sən də gəlib oturmusan, dövlətin naziri olmusan. Nazirlikdən çıxandan sonra elə bil ki, küskün bir adam kimi çəkilib qırağa. Atan vermişdi sənə, ya adına yazılmışdı bu vəzifə?!”

Siyavuş Novruzovun bu sərt açıqlamasında əsasən iki istiqamət nəzərə çarpır. O, sabiq nazirləri hakimiyyətin mövqeyini qorumaqla bağlı susqunluqda günahlandırır və onları xaricə sığınmış  söyüşcül, radikal müxalifəti maliyyələşdirməkdə ittiham edir. Kifayət qədər sərt olan bu ittihamla bağlı hələlik sabiq nazirlərdən heç də hamısı cavab verməyib. Yalnız bir-iki sabiq nazir “Siyavuş müəllimlə biz dostuq, məni nəzərdə tutmaz” kimi fikir bildirməklə kifayətləniblər. Siyavuş Novruzovun səsləndirdiyi fikirlərlə bağlı kənar partiyaların nümayəndələri nə düşünürlər?

  • Fazil Mustafa: “Səslənən ittihamlar mütləq hüquqi yanaşmanı tələb edir”

Millət vəkili, Böyük Quruluş Partiyasının sədri Fazil Mustafa “Bakı-Xəbər”ə açıqlamasında bildirdi ki, Siyavuş Novruzovun açıqlamalarını YAP-ın öz daxili məsələsi saymaq olar: “YAP funksioneri həmin partiyaya üzv olmuş şəxslərin fəaliyyətindən konkret narazılığını ifadə edib.  Görünür, əllərində konkret informasiyalar var ki, belə fikirlər səsləndiriblər. Bu həm də hakimiyyətin öz daxilində olan bəzi qüvvələrin destruktiv fəaliyyəti ilə bağlı verilən açıqlamadır. Hər iki halla bağlı kriminal fəaliyyətdən söhbət gedir. Hesab edirəm ki, buna hüquq-mühafizə orqanları mütləq qiymət verməlidirlər. Çünki həm korrupsiya, həm də xaricdəki söyüşcül müxalifəti maliyyələşdirmək ağır cinayət əməli kimi xarakterizə edilə bilər. Zaman axımı baxımından da həmin cinayətlərin üstündən elə də çox vaxt keçməyib. Hüquqi cəhətdən bu araşdırmaların aparılmasına nəsə mane ola bilməz. Bu həm də bəzi vəzifəli şəxslərin korrupsiyaya qurşanması ilə bağlı əvvəllər deyilənlərin təsdiqi sayıla bilər. Bayanatı verən YAP funksioneridir. Ortada ciddi ittihamalr var. Hesab edirəm ki, əldə konkret faktlar olmadan belə ittihamları irəli sürmək olmaz. Bəzi sabiq nazirlərin bu açıqlamaya reaksiya verdiyini müşahidə etdik. Ancaq səslənən ittihamlar mütləq hüquqi yanaşmanı tələb edir. Bu məsələ bəyanatlar səviyyəsində həllini tapa bilməz”.

Məhəmmədəli QƏRİBLİ

Son xəbərlər