10/12/2019 00:28
728 x 90

Paşinyan pul gözləyirdi, Rusiyada erməni biznesmenlər onun özünə qarşı birləşir...

“Erməni əsilli iş adamlarının Paşinyana qarşı birləşməsi onun üçün yaxşı heç nə vəd etmir”

img

“Taşir” şirkətlər qrupunun sahibi, erməni milyarder Karen Karapetyanın başçılığı ilə Moskvada bir sıra erməni mənşəli iş adamlarının iştirakı ilə Ermənistan Sahibkarlar Birliyi adlı təşkilat yaradılıb.

Erməni mətbuatının yazdığına görə, Assosiasiya Moskvada qeydiyyata alınıb və Ermənistanın sabiq baş naziri Karen Karapetyan birliyin prezidenti seçilib.

Birliyin təsisçiləri arasında Karapetyanla yanaşı, onun nəzarətində olan “Fora Bank”ın prezidenti Hayk İqnatyan, “Comedy Club”un təsisçisi Artur Janibekyan, “Taşir” şirkətlər qrupunun birinci vitse-prezidenti Varuzxan Artenyan, “Luding” şərab müəssisəsinin həmtəsisçisi Armen Şahazizyan və başqaları var.

Onu da qeyd edək ki, Rusiyada fəaliyyət göstərən Karen Karapetyan İrəvandan Moskvaya bir müddət əvvəl qayıdıb. O, İrəvanda olarkən Ermənistanın sabiq prezidenti Serj Sərkisyan və keçmiş hakimiyyətin nümayəndələri ilə görüşüb. Karapetyanın bu görüşləri Ermənistanın mövcud hakimiyyəti tərəfindən birmənalı qarşılanmayıb. Kremlə yaxınlığı ilə seçilən Karapetyanın son dönəmlərdəki bu fəallığı Baş nazir Nikol Paşinyanın başçılığındakı iqtidara qarşı yeni siyasi partiyanın qurulması iddialarına yol açıb.

Həbsdə olan sabiq prezident Robert Köçəryanın liderlik etdiyi “Qarabağ klanı”nın da dəstək verdiyi bu siyasi hərəkatın payızda genişmiqyaslı mitinqlərə başlayacağı xəbərləri yayılıb. “Qarabağ klanı”na yaxınlığı ilə seçilən media qurumlarının “Erməni payızı” adlandırdıqları proses artıq Paşinyan iqtidarını da narahat etməyə başlayıb. Karapetyanın liderliyində Moskvada yeni ittifaqın qurulması isə Paşinyan iqtidarına qarşı gizli qiyamın hazırlanması iddiasını yenidən gündəmə gətirib.

Paşinyan Rusiyada yaşayan erməni iş adamlarından sərmayə gözləyirdi. Ancaq, göründüyü kimi, bu baş vermədi. Əvəzində Rusiyadaki erməni əsilli zəngin iş adamları Paşinyana qarşı birləşdilər. O baxımdan yaranan vəziyyəti ekspertlər necə dəyərləndirirlər?

  • Elşən Manafov: “Baş nazirin bütün səylərinə və istəklərinə baxmayaraq, onlar Ermənistandakı iqtisadi vəziyyətə dəstək verməkdən imtina edirlər”

Məsələyə münasibət bildirən politoloq Elşən Manafovun sözlərinə görə, Rusiyadaki bir sıra iş adamlarının Paşinyana qarşı birləşməsi təsadüfi deyil: “Karen Karapetyan 2016-cı ilin sentyabrından 2018-ci il mayın 8-nə qədər Ermənistanın baş naziri olub. Eyni zamanda, sözügedən şəxs kifayət qədər vəsaiti olan bir şəxsdir və onun Rusiyadakı oliqarx sistemi ilə, erməni əsilli iş adamları ilə münasibətləri də bəllidir. Bütün bu proseslərin arxasında Paşinyan hökumətinin yeritdiyi Qərbyönümlü siyasətdən narazılıq dayanır. Məsələ ondadır ki, Paşinyan nə qədər manevr etməyə çalışsa da, onun Qərbə yönəlik siyasəti Kremlin diqqətindən yayınmır. Ona görə də məhz Kreml tərəfindən olan sifarişin nəticəsidir ki, Rusiyadaki erməni əsilli iş adamları Paşinyana qarşı birləşirlər. Paşinyanın bütün səylərinə və istəklərinə baxmayaraq, onlar Ermənistandakı iqtisadi vəziyyətə dəstək verməkdən imtina edirlər. Digər tərəfdən, burada geosiyasi faktorlar, klanlararası savaş və Respublkaçılar Partiyasının revanş götürmək istəyi də göz qabağındadır. Bu mənada, Paşinyanın bütün səylərinin nəticəsiz qalması ortadadır. Bu günlərdə Köçəryanla bağlı məhkəmə prosesində bir daha məlum oldu ki, məhkəmə sistemində və güc strukturlarında “Qarabağ klanı”nın təmsilçiləri, tərəfdarları yetərincə çoxdur. Eyni zamanda, bu günlərdə Putinin Köçəryanla bağlı yubiley təbriki Rusiyanın “Qarabağ klanı”na stavka etməsi ilə bağlı bir mesaj idi. Bu həm də Dağlıq Qarabağdakı separatçı rejimə bir siqnal idi. O mənada ki, Paşinyanın bütün səylərinə rəğmən, o özünə yaxın olan adamı separatçı quruma rəhbər təyin edə bilməyib. Bütün hallarda, Rusiyadakı erməni əsilli iş adamlarının Paşinyana qarşı birləşməsi onun üçün yaxşı heç nə vəd etmir”.

Vidadi ORDAHALLI

Son xəbərlər