ABŞ-ın Kaliforniya ştatında yaşayan erməni hüquq müdafiəçisi, jurnalist-araşdırmaçı və “Ermənistan siyasi forumu” (PFA) analitik mərkəzinin üzvü, ən əsası, Baş nazir Nikol Paşinyanın inqilabçı tərəfdaşı Ara Manukyan pedofiliyada ittiham olunur. Bu haqda Kaliforniya məhkəməsinin sənədlərinə əsasən sosial şəbəkələrin erməni seqmentində məlumat yayılıb.
Bildirilir ki, Manukyana qarşı 2019-cu il avqustun 6-da seksual xarakterli cinayətlər, daha dəqiqi, pedofiliya ilə bağlı ittihamlar irəli sürülüb. Kaliforniyanın Cinayət Məcəlləsinə əsasən, ittiham 14 yaşına çatmamış şəxslərə qarşı seksual cinayətləri nəzərdə tutur.
Məlumatda deyilir ki, Manukyanın barəsində girov əvəzində məhkəməyə qədər sərbəst buraxılma tədbiri seçilib. O, 1 milyon 330 min dollar girov qoyub. İttihamlar üzrə Manukyanı 10 il həbs gözləyir.
Erməni KİV-inin araşdırmasında bildirilir ki, Manukyanın fəaliyyətindən narazılıq çoxdur. Çünki o, ABŞ-dakı bütün erməni icmasını parçalayıb. Bildirilir ki, hazırda Paşinyanın hökumətini dəstəkləyən bu şəxs əvvəl “Sasna tsrer” hərəkatının üzvü olub. Paşinyanın silahdaşlarının belə biabırçı işlərlə məşğul olması nəyi söyləməyə əsas verir?
Qabil Hüseynli: “Bütün bunlar onu deməyə əsas verir ki, Ermənistanın həm diasporu, həm də hakimiyyəti kriminal mahiyyətlidir”
Politoloq Qabil Hüseynli qəzetimizə bildirdi ki, bu faktın özü ermənilərin bütün dünyada biabırçı işlərlə məşğul olduğunu sübut edir: “Sözügedən şəxs Paşinyanın yaxın silahdaşı sayılır. İnqilabla bağlı ona böyük maddi və informasiya dəstəyi verib. Ermənilərin ən sıx məskunlaşdığı Kaliforniyada qərar tutub və erməni diasporunun aparıcı isimlərindən sayılırdı. Yayılan informasiyalardan görünür ki, oradakı ermənilərin özü Manukyanın ifşa olunmasında maraqlıdırlar. Çünki informasiya məhz onlar tərəfindən ictimailəşdirilir. Ancaq ortada konkret fakt var. ABŞ-da belə məsələlərə olduqca ciddi yanaşılır. Bu bir də sübut edir ki, erməni diasporunun xaricdəki nümayəndələri bütün cinayətlərlə məşğul olurlar. Qısa müddət əvvəl onların Avropada böyük mafiyası ifşa olundu. Mərc oyunlarından tutumuş, fahişəxanaları himayə etməyə kimi adları hallanırdı. Ermənistan həm də terror təşkilatlarını, radikal faşistləri dövlət səviyyəsində dəstəkləyir. Bütün bunlar onu deməyə əsas verir ki, Ermənistanın həm diasporu, həm də hakimiyyəti kriminal mahiyyətlidir. Bu yalnız Paşinyanın əhatəsinə aid deyil. Bundan əvvəlki prezident Sarkisyanın da “qanuni oğru”lara diplomatik pasport verdiyi üzə çıxmışdı. İndi fikir verin ki, Ermənistan diaspordan alınan pulların, ianələrin hesabına yaşayır. Görün ölkənin təməli nəyin üzərində dayanır. Hansı əxlaqda olan adamlar erməni elitasını təmsil edirlər. Məhz buna görədir ki, onlar işğalçı siyasətlərindən də əl çəkmirlər. Manukyanın qoyduğu girovun məbləğinə diqqət edin. Deməli, bunun arxasında ciddi güc var. Yaranmış vəziyyət, eyni zamanda, xaricdəki erməni diasporu arasında ziddiyyətlərin kulminasiya nöqtəsinə çatdığını şərtləndirir. Əvvəl nə olsaydı da, ermənilər bir-birini ifşa etmirdi. İndi isə bir-birinin qanını içməyə hazırdırlar. Bu fakt Ermənistan hakimiyyətində təmsil olunan adamların əsl mahiyyətini ortaya qoyur. Belə deyim var: dostunu göstər, deyim sən kimsən”.
Məhəmmədəli QƏRİBLİ
