Rusiya Prezidenti Vladimir Putinin Ermənistanın keçmiş prezidenti Robert Köçəryanı yubileyi münasibətilə təbrik etməsindən sonra Qarabağ klanının tərəfdarları küçələrə çıxıb. Belə ki, sentyabrın 3-də Köçəryana qarşı irəli sürülən ittihamların konstitusiyaya uyğunluğu barədə müraciəti ilə bağlı İrəvanda iclas keçirən Konstitusiya Məhkəməsinin binası qarşısında mitinq başlayıb. R.Köçəryanın 100-dək tərəfdarı onu dərhal azadlığa buraxmağı tələb edib.
Xatırladaq ki, iyunun 25-də Apelyasiya Məhkəməsinin qərarı ilə həbs edilən R.Köçəryana qarşı 2008-ci il prezident seçkilərindən sonra kütləvi iğtişaşlarla bağlı konstitusiya quruluşunu devirmək və külli miqdarda rüşvət almaq ittihamları irəli sürülüb.
Ermənistan mətbuatında hətta belə iddialar irəli sürülür ki, oktyabr ayında Ermənistana Avrasiya İqtisadi Birliyinin toplantısına qatılmağı nəzərdə tutan Rusiya Prezidenti həbsdə olan eks-prezident R.Köçəryanla görüşmək istəyə bilər. Köçəryanla bağlı Ermənistanda yaranan canlanmada Rusiya faktoru nəzərə çarpırmı və hansı gözləntilər ola bilər?
Nəzakət Məmmədova: “Bütün bu proseslər Ermənistanı böyük xaosa doğru sürükləyir”
Politoloq Nəzakət Məmmədova “Bakı-Xəbər”ə bildirdi ki, Putinin təbriki ilə Köçəryan tərəfdarlarının fəallaşması arasında təbii ki, əlaqə var: “Putinin təbriki adi təbrik yox, Köçəryana hərəkətə keçmək üçün siqnal idi. Paşinyan hakimiyyətə gələndə hər kəs Rusiyanın buna səssiz qalmasına təəccüb edirdi, hətta hərbi çevriliş edəcəyi gözlənilirdi. Lakin keçən müddət sübut etdi ki, Rusiya Paşinyana hakimiyyətdə qalmaq fürsəti verməklə onun nüfuzunun itməsini, reytinqinin xeyli aşağı düşməsini gözləyib və onu elə gəldiyi kimi xalq etirazları adı altında mitinqlər təşkil etməklə yola salmaq fikrindədir.
Köçəryan tərəfdarlarının mitinqi Paşinyana xəbərdarlıq olmaqla yanaşı, Rusiyanın Ermənistanı digər xarici güclərə güzəştə getmək niyyətinin olmadığını, sonadək burada qalmaq qətiyyətinin nümayişidir. Təbii ki, Rusiya öz planlarını Köçəryan kimi sadiq adamları vasitəsilə həyata keçirir, özü də həmin adamlara sadiqliyini göstərməkdə davam edir. İstisna deyil ki, Paşinyan devriləcəyi təqdirdə Rusiya yenidən Köçəryanı hakimiyyətə gətirəcək. Artıq Ermənistanda bu narazılıq bütün sferalarda hiss edilməyə başlayıb. Paşinyan hakimiyyəti heç bir sahədə özünü doğrulda bilməyib. Daxili və xarici siyasət sahəsindəki uğursuzluqlar bir-birini əvəz edir. Ölkə iqtisadi problemlər içində boğulursa, xalqın alternativ axtarışına çıxacağı təbiidir. Bütün bu proseslər Ermənistanı böyük xaosa doğru sürükləyir. 2020-ci ilin, bütövlükdə, Cənubi Qafqaz regionu üçün həlledici il olacağı, üstəlik, separatçı rejimin Dağlıq Qarabağda qondarma "prezident" seçkiləri keçirməyə hazırlaşdığı nəzərə alınarsa, Ermənistanda və Qarabağda vəziyyətin son dərəcə gərginləşəcəyi labüddür”.
Məhəmmədəli QƏRİBLİ
