“Azərbaycanın Dağlıq Qarabağ bölgəsinin azərbaycanlı icması olaraq erməni icmasına səslənirik və onları tez bir zamanda əsarəti altında yaşadıqları qanunsuz cinayətkar rejimin nəzarətindən qurtulmağa və Azərbaycanın ərazi bütövlüyü çərçivəsində hər iki icmanın ədalətli və daimi sülh şəraitində birgə yaşaması üçün çağırışımızı qəbul etməyə dəvət edirik”.
Bu fikirlər Azərbaycan Respublikası Dağlıq Qarabağ bölgəsinin azərbaycanlı icmasının ölkəmizin işğal edilmiş ərazilərindəki qondarma cinayətkar rejimin qeyd etdiyi "müstəqillik günü” ilə bağlı bəyanatında yer alıb. Bəyanatda deyilir ki, Ermənistan KIV-ində yayılan məlumata əsasən, 2 sentyabr 2019-cu il tarixində Azərbaycanın işğal edilmiş ərazilərindəki qondarma cinayətkar rejim “müstəqillik günü” adı altında növbəti təxribat xarakterli “tədbirlər” keçirməklə məşğuldur: “Cinayətkar hərbi xunta tərəfindən məsxərə xarakterli növbəti “müstəqillik günü tədbirlərinin” qeyd edilməsi bir daha təsdiq edir ki, Ermənistan və onun əlaltısı olan cinayətkar rejim münaqişənin sülh yolu ilə tənzimlənməsində maraqlı deyil”. Qeyd edilir ki, Ermənistan işğalçı siyasəti ilə özünü iqtisadi, siyasi və s. cəhətlərdən regionda inkişafdan geri salmaqla və özünü uçuruma aparmaqla kifayətlənməyərək, Azərbaycanın Dağlıq Qarabağ bölgəsinin erməni icmasını aldadaraq, öz məkrli siyasəti üçün istifadə etməkdə davam edir: "Erməni icması bu yalançı və saxta “matriks"dən azad olmalı və yeganə çıxış yolu olan - azərbaycanlı icma ilə bir yerdə Azərbaycanın beynəlxalq tanınmış sərhədləri çərçivəsində ədalətli və daimi sülhün bərqərar olması üçün addım atmalıdır”.
Reallıq ondan ibarətdir ki, Dağlıq Qarabağdakı erməni icması Ermənistandakı xunta rejiminin və bir qrup separatçının girovuna çevrilib. İşğalın davam etməsi erməni icmasının ağır siyasi və iqtisadi şərtlər altında yaşamasına rəvac verir. Hansı ki, Azərbaycanın tərkibində olsalar, o zaman mənzərə daha fərqli olar. Ona görə də Qarabağdakı erməni icması xunta rejiminə qarşı nə qədər tez qalxsa, bu bir o qədər onların xeyrinə olar. O baxımdan ekspertlər bunu necə dəyərləndirirlər?
Fikrət Sadıqov: “Bunun üçün də erməni icması özündə güc tapıb xunta rejiminə qarşı çıxmalıdır”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Qarabağdakı erməni icması bu çağırışdan nəticə çıxarmalı və xunta rejiminə qarşı mövqe ortaya qoymalıdır: “Məsələ ondadır ki, uzun illər Dağlıq Qarabağda azərbaycanlılarla ermənilər normal şəkildə birgə yaşayıblar. Qarabağ Azərbaycanın tərkib hissəsi kimi inkişaf edib. O cümlədən, bir sıra uğurlara nail olub. Bu çağırış o deməkdir ki, bundan sonra normal yaşamaq, inkişaf etmək istəyirsinizsə, o zaman Bakı ilə yaxınlaşın. Nicat yolu azərbaycanlı icması ilə birgə yaşamaqdan keçir. Bunun üçün də erməni icması özündə güc tapıb xunta rejiminə qarşı çıxmalıdır. Ayağa qalxıb öz sözlərini deməlidirlər. Nə vaxta qədər iqtisadi baxımdan təcrid olunmuş vəziyyətdə yaşayacaqlar? Bir qrup separatçı tərəfindən erməni icmasının idarə olunması onlara heç bir gələcək vəd etmir. Mövcud vəziyyətlə barışsalar, onların taleyi acınacaqlı olacaq. Qarabağdakı separatçı rejim artıq dalana dirənir. Ona görə də Dağlıq Qarabağ bölgəsinin azərbaycanlı icmasının çağırışı sağlam əsaslara söykənir. Erməni icması bunu nə qədər tez başa düşsə, bu bir o qədər onların xeyrinə olacaq. Çünki Azərbaycan heç vaxt işğalla barışmayacaq. Bu baxımdan hesab edirəm ki, erməni icması bundan müsbət mənada nəticə çıxarmalıdır”.
Vidadi ORDAHALLI
