Almaniyanın Brandenburq federal torpağında keçirilən seçkilərə Qarabağ separatçıları da müşahidəçi qismində qatılıblar. Ermənistan KİV-inin verdiyi məlumata görə, millətçi “Almaniya üçün alternativ” partiyasının dəvətilə seçkiləri müşahidə edənlər arasında qondarma “Azad Vətən Partiyası”nın üzvləri Qaqik Petrosyan və Vaqram Poqosyan da olub.
Qeyd edək ki, separatçı qurum bütün istiqamətlər üzrə özünü təbliğ etməyə çalışır. Xüsusilə də bəzi Avropa ölkələrindəki yerli subyektlərlə əlaqələrin qurulmasına üstünlük verir. Həmin ölkələr də reaksiyalarında bildirirlər ki, bu, dövlətin mövqeyini əks etdirmir, yerli qurumların müstəqil qəbul etdiyi qərarlardır. Ancaq Azərbaycan diplomatiyasının apardığı uzun təbliğatdan sonra isə bu istiqamətdə kardinal dəyişiklik oldu. Məsələn, Fransanın bir neçə məhkəməsi həmin ölkənin yerli subyektlərinin qondarma “DQR”in bəzi şəhərləri ilə bağladıqları “müqavilələri” ləğv etdi. Məhz belə bir məqamda Almaniyanın atdığı bu addımı necə dəyərləndirmək olar?
Məhərrəm Zülfüqarlı: “Onda biz almanların nümayəndələrinin diqqətinə bu cür beynəlxalq hüquqa zidd olan hərəkətlərini çatdırarıq”
Azərbaycanda dərin seçki təcrübəsinə malik olan AVCİA-nın rəhbərliyində təmsil olunan professor Məhərrəm Zülfuqarlı “Bakı-Xəbər”ə bildirdi ki, Almaniyanın atdığı bu addım tamamilə qanunsuzdur: “Bir çox hallarda həmin nümayəndələr ora Ermənistan pasportları ilə gedib özlərini “DQR” nümayəndəsi kimi qələmə verirlər. Təəssüflər olsun ki, biz ilk dəfə deyil belə halla rastlaşırıq. Bütün məsələlərə ayrılıqda, fərdi yanaşma ortaya qoyduqdan sonra bəzi irəliləyişlər əldə edirik. Qərbin bəzi ölkələri demokratiya adı ilə belə qanunsuzluqlara yol verirlər. Biz bunu Fransa ilə də bağlı müşahidə edirdik. Artıq orada “DQR”in “kitabını” məhkəmələr vasitəsilə bağladılar. Ruhdan düşməmək lazımdır, hər bir belə qanunsuz halı ictimailəşdirib, arxasınca getməliyik. Belə demokratiya oyunları hər zaman onların öz başında çatlayır. Artıq separatizm Avropanı bürüyür. İspaniyada Kataloniya məsələsi ortaya çıxıb. Bir azdan almanların özü də belə problemdən əziyyət çəkməyə başlayacaq. Çox təəssüflə qeyd etməliyik ki, demokratiyadan danışan bir ölkədə keçirilən seçkilərə bu cür qondarma qurumun nümayəndələri dəvət alıb. Hesab edirəm ki, Azərbaycan Xarici İşlər Nazirliyi mütləq bu məsələyə rəsmi etiraz etməli və Almaniyadan izahat istəməlidir. Onların təqribən nə cavab verəcəyi də məlumdur. Deyəcəklər ki, onları hansısa partiya dəvət edib, dövlətin siyasətinə heç bir aidiyyəti yoxdur. Qoy nə deyirlər desinlər. Biz müraciətimizi mütləq etməliyik. Bilsinlər ki, belə məsələlərə ciddi nəzarət edilir. Sabah Azərbaycanın da onlara deməyə sözü olsun. Bizdə də seçkilər keçiriləndə onların nümayəndələri gəlib burada yüksək dəyərlərdən danışırlar. Bu il bələdiyyə, gələn il parlament seçkilərinə hazırlaşırıq. Onda biz almanların nümayəndələrinin diqqətinə bu cür beynəlxalq hüquqa zidd olan hərəkətlərini çatdırarıq. Bilirsiniz, “DQR” üçün nəyin qanuni, nəyin qanuni olmadığı maraqlı deyil. Onların əsas məqsədi adlarının hallanmasıdır. Mənfi və ya müsbət mənada onlara fərq etmir. Bu üsullarla separatizmi təbliğ edirlər”.
Məhəmmədəli QƏRİBLİ
