Qondarma “DQR”in “prezidenti” Bako Saakyan Leonid Azqaldyana ölümündən sonra “Artsaxın qəhrəmanı” fəxri adını verib. Həmin şəxs “Miatsum” şüarını səsləndirən ilk şəxs kimi tanınır.
Səhra komadiri kimi döyüşlərdə iştirak edib və 1992-ci ildə ölüb. Ermənistan mətbuatının özü də Saakyanın bu addımını birmənalı qarşılamır. Xüsusilə də qeyd edilir ki, onun bu addıımı məhz “prezidentlik” dönəminin sonunda və Azqaldyanın ölümündən 27 il keçəndən sonra atması maraqlı və təəccüblü görünməyə bilməz.
Xatırladaq ki, həmin şüarı Ermənistan rəhbərlərindən ilk dəfə Nikol Paşinyan Xankəndidə keçirilən 5 avqust mitinqində səsləndirib. Hətta erməni KİV-i də ehtimal edir ki, Saakyanın Azqaldyanı “qəhrəman” etməsinin kökündə də “Qarabağ klanı” ilə Paşinyanın arasında olan ziddiyyət dayanır. Çünki Paşinyan həmin bəyanatı verməklə Ermənistandakı və Dağlıq Qarabağdakı millətçi ermənilərin dəstəyini qazanmağı hədəf seçib. Ancaq Saakyan şüarın əsl müəllifini göstərməklə, Paşinyanın çıxışının elə də böyük əhəmiyyət kəsb etmədiyini nəzərə çatdırıb. Gəlinən bu qənaəti nə dərəcədə əsaslı saymaq olar?
Yeganə Hacıyeva: “Xüsusilə də gənc nəslin yadına saldı ki, həmin şüarla bağlı Paşinyan qəhrəmanlıq etməyib, əsl plagiata yol verib”
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistanın Baş naziri Nikol Paşinyan işğal altındakı Azərbaycan ərazilərində səsləndirdiyi “Miatsum” şüarı ilə özünü pis vəziyyətə salmış oldu: “Beynəlxalq aləm üçün həmin şüarın səsləndirilməsi bir vacib faktı aydınlaşdırmış oldu. Sübut edildi ki, Paşinyan həqiqətən siyasi diletantdır. Hətta ondan radikal mövqedə olan, Qarabağdakı hərbi əməliyyatlarda birbaşa iştirak etmiş prezidentləri belə bir şüarı səsləndirməmişdi. Bununla Paşinyan işğala dəstək verdiyini, danışıqların onunla aparılmasının mənasız olduğunu sübut etdi. Yəni beynəlxalq aləmdə özünü ikiüzlü siyasətçi kimi tanıtdı. Bir tərəfdən danışıqlara gedir, digər tərəfdən isə prosesin tamamilə ziddinə olan bir şüar səsləndirir. Hətta vəziyyət o həddə çatdı ki, Ermənistan Xarici İşlər Nazirliyi Paşinyanın sərsəm bəyanatını malalamağa çalışdı.
İrəvan iddia edir ki, Baş nazirin fikirləri, sadəcə, Dağlıq Qarabağın təhlükəsizliyinə qarant rolunu oynayır. Amma fakt budur ki, N.Paşinyan “Dağlıq Qarabağ Ermənistandır, nöqtə" deməklə faktiki olaraq xəstə “Miatsum” xülyasını dəstəkləyərək, danışıqların üzərindən qara xətt çəkmiş oldu. Azərbaycanın Prezident Administrasiyası, XİN-i və Dağlıq Qarabağın Azərbaycanlı İcmasının rəhbərliyi bəyanatlarında Ermənistanın hökumət başçısının savaşı tətikləyən mövqeyini kəskin tənqid etməklə yanaşı, beynəlxalq aləmi real durumla bağlı xəbərdar etməyə çalışdılar. Görünür, Paşinyan geri dönəndən sonra bəyanatlarının “barıt”ını çox elədiyinin fərqində olub və təcili düzəliş etməyə qərar verib. Yeri gəlmişkən, N.Paşinyan hakimiyyətinin ilk günlərində onunla bağlı fərqli yanaşmalar var idi. Hesab olunurdu ki, Sarkisyan-Köçəryan cütlüyündən fərqli olaraq, Nikol müharibə partiyasının üzvü olmadığı üçün konstruktiv mövqe tutacaq və danışıqlarda effektli nəticənin əldə olunmasına səy göstərəcək. Ancaq yeni hökumət başçısının mövqeyi bir çox hallarda radikallıq baxımından sələflərindən çox uzağa getdi. Faktiki olaraq, Paşinyanın “Miatsum” şüarı özünə beynəlxalq dəstək qazanmadı, Ermənistanın mövqeyini xeyli zəiflətdi. Belə olan təqdirdə Paşinyan milliyyətçi kəsimin arasında itirilən nüfuzu bərpa etmək istədi. Sanki şüarın ona məxsus olduğu və Ermənistanın ilk rəhbəri kimi belə cəsarətdə olduğu ilə fəxr edirdi. Bako Saakyan bunun da üstündən xətt çəkdi. Xüsusilə də gənc nəslin yadına saldı ki, həmin şüarla bağlı Paşinyan qəhrəmanlıq etməyib, əsl plagiata yol verib”.
Məhəmmədəli QƏRİBLİ
