Rusiya Prezidenti Vladimir Putin Ermənistanın hazırda həbsdə olan eks-prezidenti Robert Köçəryana 65 illik yubileyi münasibətilə təbrik məktubu göndərib. Məktub Kremlin rəsmi saytında dərc olunub.
Putin Köçəryanın İrəvanla Moskva arasında “müttəfiqlik münasibətlərinin möhkəmlənməsindəki ciddi rolunu” qeyd edir: “Hörmətli Robert Sedrakoviç, 65 illiyiniz münasibətilə səmimi təbriklərimi qəbul edin. Öz çoxillik dövlətçilik fəaliyyətinizlə Siz həmvətənləriniz arasında və xaricdə hörmət qazanmısınız, müasir Ermənistanın inkişafına, Zaqafqaziyada təhlükəsizliyin və stabilliyin təmin olunmasına əhəmiyyətli töhfə vermisiniz”.
Putin habelə Köçəryana “möhkəm cansağlığı və dözüm” də arzulayır.
R.Köçəryan Azərbaycan ərazilərinin işğalına başçılıq edənlərdən və azərbaycanlılara qarşı hərbi cinayətlər törədənlərdən biridir. Hazırda o, 2008-ci il 1 mart hadisələrinə görə mühakimə olunur, dövlət quruluşunu zorla dəyişdirmək cəhdi, dinc nümayişçilərə qarşı silah işlədilməsinə əmr vermək kimi ağır cinayətlərdə ittiham olunur. Köçəryan Dağlıq Qarabağda baş qaldıran separatizmə rəhbərlik edən şəxslərdən biri olub. Əlində silah, səhra komandiri kimi, müharibədə iştirak edib. Faktiki olaraq, Cənubi Qafqazda yeni münaqişə ocağının yaranmasında Köçəryanın müstəsna xidmətləri olub. Belə olan təqdirdə, ona “Zaqafqaziyada təhlükəsizliyin və stabilliyin təmin olunmasına əhəmiyyətli töhfə vermisiniz” epitetini yaraşdırmaq olarmı?
Hatəm Cabbarlı: “Köçəryandan çox sülhə, təhlükəsizliyə zərər vuran adam olmayıb”
Siyasi elmlər doktoru Hatəm Cabbarlı “Bakı-Xəbər”ə bildirdi ki, Rusiya Prezidenti Vladimir Putinin Ermənistanın sabiq rəhbəri, hazırda həbsdə olan R.Köçəryana göndərdiyi təbrik və həmin təbrik mətnində ona ünvanladığı ifadələr olduqca maraqlıdır: “İstər Cənubu Qafqazda sülhə və təhlükəsizliyə onun verdiyi fayda, Ermənistan-Rusiya münasibətlərinin yaxşılaşdırılmasında onun oynadığı rolla bağlı deyilənlərə birmənalı yanaşmaq olmaz. Məktub həm də Ermənistan-Rusiya münasibətlərinin Paşinyana qədər olan dönəmi və ondan sonrakı zamanı dəyərləndirmək baxımından yaxşı vasitə sayıla bilər. Bu, birinci dəfə deyil ki, Rusiya rəhbəri həbsdəki Köçəryana təbrik ünvanlayır. Belə vurğulama göstərir ki, Ermənistan Rusiyanın vassalı olub və olmaqda davam edir. Xüsusilə də imperiyanın Qafqaz siyasətinin həyata keçirilməsi baxımından bir mexanizm rolunu oynayıb. Bu həm də onu deməyə əsas verir ki, mövcud Ermənistan hakimiyyəti ilə Rusiya rəhbərliyi arasında ixtilaf var və münasibətlər sərindir. Bunu Paşinyan hakimiyyətinə bir təzyiq metodu kimi də dəyərləndirmək olar. Artıq hiss edilir ki, Rusiya Ermənistanın daxilində gedən proseslərlə razı deyil. Xüsusilə də Ermənistanın yeni rəhbərliyi islahatlara başladıqları ilə bağlı bir anons verdikləri ərəfədə belə addımın atılması Ermənistanda daxili gərginliyin artacağına dəlalət edir. Rusiya Köçəryanı əvvəldən müdafiə edir. Hətta Rusiyanın həmin ölkədəki səfiri gedib onun məsələsini Konstitusiya Məhkəməsinin hakimi ilə şəxsən müzakirə edirdi. Ancaq məktubda Köçəryanın Cənubu Qafqazdakı sülhə və təhlükəsizliyə böyük töhfə verən adam kimi xarakterizə olunması isə, ümumiyyətlə, qəbul edilən deyil. Çünki Köçəryan Azərbaycana qarşı həyata keçirilən qanlı hərbi əməliyyatların, işğalın başında durub. Özü əlində silah vuruşub. Belə bir adam necə sülhə töhfə verə bilər? Ola bilər ki, onun hərbi sahədəki addımları Rusiyanı tam qane edib və edir. Bu başqa məsələdir. Ona görə də hər detalı öz adı ilə çağırmaq gərəkdir. Əksinə, Köçəryandan çox sülhə, təhlükəsizliyə zərər vuran adam olmayıb”.
Məhəmmədəli QƏRİBLİ
