Artıq AXCP sədri Əli Kərimli guya olmayan gücü və elektoratına söykənərək hakimiyyətlə hədə tonunda danışmağa başlayıb. Buna səbəb hansısa bir gənclə onun partiyasında təmsil olunan başqa bir gənc arasında yaranan virtual çəkişmə olub. Həmin gəncin silahla çəkdirdiyi şəkilləri əsas gətirən Əli Kərimli bütün məsuliyyəti hakimiyyətin üzərinə atmaq istəyir.
Azərbaycan Prezidentinin köməkçisi Əli Həsənov AXCP sədri Əli Kərimlinin bir sıra iddialarına cavab verib. Ə.Həsənov özünün sosial şəbəkədəki hesabında aşağıdakı yazını paylaşıb:
"Özlərini hakimiyyətə “opponent” hesab edən, siyasi fəaliyyətləri sosial şəbəkələrdə əsassız, qərəzli, şantaj xarakterli iddialar irəli sürməkdən ibarət olan ayrı-ayrı qrup və fərdlər ölkədə ictimai narazılıq formalaşdırmaq üçün ən səviyyəsiz və primitiv üsullara əl atmaqdan belə çəkinmirlər. Öncə də qeyd etdiyim kimi, AXCP sədri Əli Kərimli başının dəstəsi ilə birlikdə ölkədə və dünyada baş verən bütün mənfi yüklü halları Azərbaycan hakimiyyətinin və dövlətinin adı ilə bağlamağa cəhd göstərir. Bu mənada, əlində silah foto çəkdirib özünü “fədai” kimi reklam edən birisini hakimiyyətlə əlaqələndirmək də həmin absurd iddiaların davamından başqa bir şey deyil.
Silahlı dəstələr yaratmaq, insanları silahla hədələmək, onların evlərinə basqın etmək, itaət etməyənləri döyüb avtomobilin yük yerinə salmaq və digər bu kimi hüquqazidd əməllər Əli Kərimlinin dövlət müşaviri olduğu AXC-Müsavat hakimiyyətinin üsul-idarəsi üçün xarakterik hallar olub. Bugünkü Azərbaycan hüquqi dövlətdir, burada heç bir cinayətkar cəzasız qalmır, günahı olmayan da cəza almır. Dövlətin hansısa “fədailər qrupu”na və digər bu kimi qeyri-qanuni dəstələrə ehtiyacı yoxdur, onun asayişi yaradan, qanunlara əməl olunmasını təmin edən hüquq-mühafizə sistemi və ədaləti bərpa edən məhkəməsi var. Buna görə də öz siyasi ambissiyalarını reallaşdırmaq məqsədilə şər-böhtan yaymaq və ictimaiyyəti çaşdırmaq lazım deyil. Belə əməllərə yol verən onun hüquqi məsuliyyətini də dərk etməyi bacarmalıdır.
Əli Kərimliyə xatırlatmaq istərdim ki, əli silahlı şəkil çəkdirib paylaşmaq onun özünün ortaya qoyduğu bir nümunədir. Əgər bu gün kimsə bu “qəhrəmanlığı” təkrarlayırsa, bunun səbəbini hakimiyyətin siyasətində yox, AXCP-nin və onun başçısının əməllərində axtarmaq daha düzgün olar.
O ki qaldı Əli Kərimlinin “özünüzü yığışdırın”, “məsuliyyətli olun” tipli hədələrinə, demək istərdim ki, nə o özü, nə də arxalandığı çevrələr Azərbaycan hakimiyyəti ilə təhdid dilində danışa bilməz. Buna görə də həmin ifadələri onun özünə qaytararaq deyirəm: “Əli Kərimli, reallıq hissini itirmə!”.
Göründüyü kimi, Əli Kərimlinin hakimiyyətlə hədə tonunda danışdığını və “özünüzü yığışdırın”, “məsuliyyətli olun” kimi ifadələrdən istifadə etdiyini Prezident köməkçisi də vurğulayır. Əli Kərimlinin siyasi gücü göz qabağındadır. Hakimiyyətin resursları və elektoratı ilə müqayisə aparılsa, Əli Kərimlinin heç bir icra başçısı ilə hədə tonunda danışmağa imkanı yetərli deyil. Onda isə niyə Əli Kərimli bütün hakimiyyəti hədəf alaraq hədə ritorikasına üstünlük verir, bununla nə əldə etməyi düşünür?
Elşən Həsənov: “Onlar arasında sanki kim daha radikal formada hakimiyyəti tənqid edə bilirsə, o ana müxalifət sayılır kimi bir lüzumsuz yarış da gedir”
Azərbaycan Sosialist Partiyasının sədri Elşən Həsənov baki-xeber.com-a bildirdi ki, ənənəvi müxalifətin nəyə qadir olduğu ortadadır: “Biz həm hakimiyyət, həm də ənənəvi müxalifətlə bərabər məsafədə dayanan siyasi qüvvəyik. Kimlərsə sanki müxalifət brendini özününküləşdirmiş kimi davranır. Sanki onlara elə bu lazımdır. Ənənəvi müxalifət daxilində mübarizənin daha çox bu müstəvidə getdiyinin şahidi oluruq. Fikir verin, özlərini daha güclü müxalif qüvvə sayanların hamısı arasında didişmə gedir. Maraqlıdır ki, onlar birləşib bu gücü hakimiyyətə göstərə bilmirlər. Müxalifliyin də bir fəlsəfəsi, qaydaları olmalıdır. Nə qədər güclü hakimiyyət olursa-olsun sən 30 ildir irəliləyə bilmirsənsə, zəifliyini etiraf edib, siyasi səhnəni başqalarına güzəştə getməlisən. Onların əsas bəhanəsi bu idi ki, hakimiyyət təbliğat imkanlarını məhdudlaşdırıb. İndi baxın, sizə virtual məkanı verib. Hamınız ordasınız, bütün internet televiziyalara, səhifələrə çıxışınız var. Neçə ildir bu platformadan sağına-soluna istifadə edirsiniz. Niyə nəticə yoxdur? Məhz bütün bu nəticəsizliyi, uğursuzluğu ört-basdır etmək üçün radikal liderlər, bir bəhanə tapıb, hakimiyyəti daha sərt tənqid etmə yolunu tuturlar. Onlar arasında sanki kim daha radikal formada hakimiyyəti tənqid edə bilirsə, o ana müxalifət sayılır kimi bir lüzumsuz yarış da gedir. Hesab edirəm ki, Əli Kərimlinin son ritorikası da məhz bundan qaynaqlanır. Burada başqa səbəb görmürəm. Hakimiyyəti sözdə hədələməklə iş keçmir. Bunun üçün müxalif liderin arxasında güc olmalıdır. Hələlik isə bizim heç bir müxalifət partiyasının arxasında deyilən qüvvə yoxdur”.
Məhəmmədəli QƏRİBLİ
