Ermənistanın Baş naziri Nikol Paşinyan ölkənin xaricdəki səfirlərinin işini bəyənmir. Erməni KİV-nin yazdığına görə, N.Paşinyan, xüsusən Ermənistanın ABŞ-dakı səfiri Varujan Nersisyanın fəaliyyətindən narazıdır.
Paşinyan avqustun 27-də Ermənistanın xaricdəki diplomatik nümayəndəliklərinin rəhbərləri ilə görüşündə deyib ki, səfirlər ölkə iqtisadiyyatı üçün heç bir iş görmürlər:
"Səfirlər nə investisiya cəlb edirlər, nə də digər dövlətlərlə iqtisadi əlaqələri inkişaf etdirirlər".
O, Ermənistanın ABŞ-dakı səfiri Varujan Nersisyana qəzəblənib. Nəşrin mənbəsi bildirib ki, buna səbəb səfirin Paşinyanın ABŞ rəhbərliyi, xüsusilə də Prezident Donald Tramp və ya dövlət katibi Mayk Pompeo ilə görüş təşkil edə bilməməsidir.
Qeyd edək ki, Ermənistanın yeni hakimiyyəti hələ də ABŞ rəhbərliyi ilə görüşməyib. N.Paşinyan və xarici işlər naziri Zohrab Mnatsakanyan bir neçə dəfə ABŞ rəhbərliyi ilə görüşə cəhd etsə də, qarşı tərəf buna məhəl qoymayıb. Paşinyan səfirləri bu şəkildə danlamaqla nəyə işarə etmək istəyir?
Elşən Mustafayev: “Paşinyan bütün bu uğursuzluğunu səfirlərin üzərinə atmaqla öz səriştəsizliyini ört-basdır etmək istəyir”
Politoloq Elşən Mustafayev “Bakı-Xəbər”ə bildirdi ki, Paşinyanın narahatlığının kökündə başqa amillər durur: “Hakimiyyətə gəldiyi dönəmdən indiyə kimi verdiyi vədlərin heç birinə əməl edə bilməyib. Ölkədəki iqtisadi vəziyyət daha da pisləşir. Siyasətdən elementar anlayışı olan hər kəs bilir ki, ABŞ kimi ölkənin rəhbərliyinin hansısa dövlət başçısını qəbul etməsi, onunla görüşməsi səfirə bağlı olan məsələ deyil. Səfir nə qədər mahir diplomat olsa da, bunu etmək gücünə malik deyil. ABŞ rəhbərliyinin Paşinyanı qəbul etməməsinin kökündə başqa amillər durur. Bu, Ermənistanın yeni hakimiyyətinin yürütdüyü qeyri-müəyyən siyasətlə bağlıdır.
Ermənistanda baş verən məxməri inqlabı ABŞ-da diqqətlə izləyiblər. Bunun əsasında özləri üçün çıxarış edərək, müəyyən gözləntiləri formalaşdırıblar. Onlar hesab edib ki, Ermənistanda baş verən dəyişiklik Ermənistan-ABŞ münasibətlərinə müsbət təsir edəcək. Bu müddət ərzində Ermənistan tərəfindən xüsusi fəallığın olmaması səbəbindən keçən inqlabın ilk dövründə açılan əməkdaşlıq pəncərəsi artıq bağlanıb. Baş nazir Nikol Paşinyanın ABŞ-ı ən çox tənqid edən Ermənistan rəhbəri olması barədə bəyanatını ABŞ-da diqqətlə izləyiblər. Bunu Paşinyanın özü etiraf etmişdi. Təbiidir ki, Rusiyanın xoşuna gəlmək üçün həmin addımı atırdı. Amerikalılar ABŞ tərəfini tənqid etməklə Rusiyanı qazanmaq siyasətini qəbul edə bilmirlər. Son zamanlar yüksək vəzifəli ABŞ məmurları ümumiyyətlə Ermənistana səfər etmir. Hətta Ermənistan müxalifəti belə bunu acınacaqlı hal sayır və müzakirə olunmasını tələb edir. Onlar hesab edirlər ki, yaranmış vəziyyət Ermənistan-ABŞ münasibətlərinin normallığı görüntüsünü yaratmır. Tramp və Paşinyan arasında görüş ehtimalı isə yaxın zamanlar üçün mümkün deyil. Paşinyan bütün bu uğursuzluğunu səfirlərin üzərinə atmaqla öz səriştəsizliyini ört-basdır etmək istəyir. Bununla bir daha sübut olunur ki, Ermənistanda bütün sahələrdə olduğu kimi, xarici siyasətdə də acınacaqlı vəziyyət yaranıb”.
Məhəmmədəli QƏRİBLİ
