Paşinyan indi də "qanuni oğrulara" müharibə elan edib. Ermənistanın Baş naziri Nikol Paşinyan "oğru dünyası" ilə mübarizəni gücləndirmək üçün ölkənin Cinayət Məcəlləsinə dəyişiklikləri elan edib.
Baş nazir Facebook səhifəsində artıq hökümət tərəfindən qanuna dəyişikliklə bağlı qərar qəbul edildiyini bəyan edib. Onun sözlərinə görə, qanunun məqsədi mütəşəkkil cinayətkar qruplaşmalar yaradanların və onlara başçılıq edənlərin cinayət məsuliyyətinə cəlb edilməsini təmin etməkdir. Ədliyyə naziri Rüstəm Badasyan isə hökumətin iclası zamanı qanunda, xüsusilə Cinayət Məcəlləsinin 222 və ya 223-cü maddələrində ("Banditizm" və "Cinayətkar qrup yaratmaq və ya cinayətkar qrupda iştirak etmək") cinayətkar qrup yaradanların və ya onlara rəhbərlik edənlərin məsuliyyətə cəlb edilməsini təklif edib.
"Kriminal subkulturaya mənsub olanlar həbsxananı öz evi hesab edir, buna görə də onları evlərinə göndərmək lazımdır", - N.Paşinyan deyib.
Ədliyyə naziri isə mütəşəkkil cinayətkar qruplaşma yaradanlar və ya onlara başçılıq edənlər kateqoryasına nəinki “qanuni oğruların”, həmçinin bu titulu daşımayan kriminal avtoritetlərin də düşəcəklərini deyib.
O da məlumdur ki, Paşinyan hakimiyyətə gələndən bir sıra vədlər verir, amma bütün bunlar elə vəd olaraq qalır. Bir vaxtlar Paşinyan ölkədə ciddi islahatların keçiriləcəyini və bunun nəticəsində çevik dövlət aparatının qurulacağını deyirdi. Ancaq Paşinyanın bu vədi reallaşmadı. Əksinə, yeni qurumlar yaradıldı ki, bu da ölkədəki birokratik sistemi bir az da gücləndirdi. Paşinyanın ən böyük vədlərindən biri də iqtisadiyyata sərmyələrin cəlbi ilə bağlı idi. Əmin edirdi ki, yaradılacaq sistem sayəsində Qərbdən ölkəyə sərmayə axını artacaq. Ancaq bu da baş vermədi. Eyni zamanda, əsgər analarına orduda islahatların aparılacağını, qeyri-döyüş şəraitində ölüm hallarına son qoyulacağını deyirdi. Ancaq bunların heç biri baş vermədi. Dağlıq Qarabağda müxtəlif dövrlərdə ölən erməni əsgərlərinin anaları tez-tez etiraz aksiyası keçirir. Müxtəlif dövrlərdə ölən əsgərlərin anaları yenidən hökumət qarşısında etiraz edir. Bəyan edirlər ki, orduda islahatlarla bağlı verilən vədlərin heç biri həyata keçməyib.
Göründüyü kimi, Paşinyanın əvvəliki islahat vədləri fiaskoya uğrayıb. Son qərarı da bunlardan biri ola bilər. Bununla belə, güman etmək olarmı ki, Paşinyan kriminal avtotitetlərə qarşı müharibə elan etməklə əvvəlki islahat vədlərini yerinə yetirə bilməməsini kompensasiya etmək üçün cəmiyyətdə hörmət qazanmaq istəyir?
Arzuxan Əlizadə: “Nə qədər ki, ölkə iqtisadiyyatı yerində sayır, bu cür tədbirlərlə cəmiyyətdə sosial dayaqları gücləndirmək mümkün olmayacaq”
Məsələyə münasibət bildirən AMİP-in baş katibi Arzuxan Əlizadənin sözlərinə görə, Paşinyan müxtəlif vasitələrlə çalışır ki, cəmiyyətdə sürətlə aşağı düşən reytinqini bərpa etsin: “Ona görə də müxtəlif vasitələrə əl atır. Əslində Paşinyan özü də bilmir nə edir. Bir il dörd aydır ölkənin baş naziridir. Ötən bu müddət ərzində həyata keçirmək istədiyi islahatlar, layihələr cəmiyyətdə birmənalı qarşılanmadı. Cəmiyyətin müxtəlif təbəqələri tərəfindən bu ya qıçıqla, ya da istehza ilə qarşılanır. Xüsusən də Ermənistan cəmiyyətinin Paşinyandan əsas gözləntisi iqtisadiyyatla bağlı idi. Ancaq müşahidələr göstərir ki, Ermənistan iqtisadiyyatında əsaslı inkişaf meylləri özünü göstərmir. Bunun kökündə duran başlıca problem sərmayə qıtlığıdır. Xarici sərmayələrin ölkəyə axını ötən müddət ərzində özünü göstərməyib. Baxmayaraq ki, Paşinyan bir sıra ölkələrə səfərlər etdi, investorlara vədlər verdi. Eyni zamanda gözləyirdi ki, beynəlxalq maliyyə qurumları kredit verəcəklər. Ancaq bunların heç biri reallaşmadı. Digər tərəfdən, ölkənin xarici borcu artır, demoqrafik göstəricilər pisləşir. Ona görə də kriminal avtoritetlərə qarşı mübarizə adı altında Paşinyan aşağı düşən reytinqini qaldırmaq istəyir. Ancaq bu onu xilas edə bilməyəcək. Nə qədər ki, ölkə iqtisadiyyatı yerində sayır, bu cür tədbirlərlə cəmiyyətdə sosial dayaqları gücləndirmək mümkün olmayacaq”.
Namiq QULİYEV
