Ermənistanın baş naziri Nikol Paşinyanın Qarabağ münaqişəsi ilə bağlı son açıqlamaları onun konfliktin dinc müstəvidə həllində maraqlı olmadığını aydın nümayiş etdirdi. Ekspertlər isə Paşinyanın münaqişə barədə vaxtaşırı sərsəm mövqelər sərgiləməsini ölkə daxilində yaranan problemlərlə izah edir. Bildirilir ki, Paşinyan üzləşdiyi çətinliklər fonunda diqqəti məhz Qarabağ münaqişəsi vasitəsilə yayındırmağa çalışır.
Hazırda Ermənistanın baş naziri “Qarabağ klanı” ilə mübarizədə mövqelərini itirməkdədir. O, işğalçı ordunun Ermənistandakı və Azərbaycan ərazilərindəki tör-töküntüləri üzərində tam nəzarətə sahib deyil. Eyni zamanda, Azərbaycanın Dağlıq Qarabağ bölgəsində “stəkanda fırtına qoparmaq” niyyətini həyata keçirə bilməyib. Həm Ermənistanda, həm də işğal edilmiş ərazilərdə yaşayan ermənilərin sosial həyatında müsbətə doğru hər hansı dəyişiklik baş verməyib. Əksinə, işğalçı ölkənin təcrid olunması prosesi daha da dərinləşib. Məhz bu vəziyyətdə Paşinyana qarşı etirazlar artır. Elə bu səbəbdən Paşinyan özündən əvvəlki iqtidarın taktikasını davam etdirərək Qarabağ məsələsi vasitəsilə cəmiyyətin diqqətini yayındırmağa can atır. Amma Ermənistanın Milli Təhlükəsizlik Xidmətinin sabiq rəisi David Şahnazaryan bildirir ki, bu gediş də artıq Paşinyanın köməyinə çatmayacaq. O vurğulayıb ki, erməni xalqının oyanışı Nikol Paşinyanın hökuməti üçün təhlükəli həddə çatıb. Şahnazaryan burada Qarabağ amilinin də mühüm rol oynadığıın bildiriö O qeyd edib ki, milyarder Corc Sorosun qrantından istifadə edən beynəlxalq təşkilatlar Ermənistanda baş vermiş “məxməri inqilabı” Dağlıq Qarabağda da həyata keçirməyə çalışırlar. Siyasətçinin sözlərinə görə, bu proseslərə orada keçiriləcək “seçkilərin müşahidə missiyası” tərəfindən rəvac veriləcək.
D.Şahnazaryan bildirib ki, Dağlıq Qarabağda “məxməri inqilab” bu yaxınlarda hökumətdən 33,6 milyon dram qrant almış erməni təşkilatı və məşhur “Transparency International” tərəfindən həyata keçiriləcək. O diqqətə çatdırıb ki, korrupsiya ilə mübarizə apardığını qeyd edən bu beynəlxalq təşkilatın “seçkilərin” müşahidəsi ilə məşğul olması ən azından heyrət doğurur. Siyasətçi xatırladıb ki, sabiq prezident Sarkisyanın da istefasında İrəvan-Qarabağ kartları oynanıb: “Qarabağda hakimiyyətin İrəvana müqavimət göstərdiyini görən Paşinyan orada özünün mənafeyinə uyğun rejim yaratmaq üçün yuxarıda göstərdiyim təşkilatların köməyinə müraciət edib”. Erməni siyasətçi əlavə edib ki, guya məramı korrupsiya ilə mübarizə olan “Transparency International” Paşinyan hökumətində baş verən bu cür hallar barədə bir kəlmə belə deməyib: “Açıq-aşkardır ki, əvvəl mövcud olan korrupsiya mexanizmləri nəinki aradan qaldırılmayıb, hətta onları daha da təkmilləşdiriblər. Yeni hökumət, ən azı, daha üç yeni mexanizm yaradıb”. Şahnazaryanın sözlərinə görə, indi Paşinyanın həyat yoldaşı tamamilə qeyri-şəffaf fondlar yaradır, onun adamları iri və orta biznes nümayəndələrinə qarşı reketçilikdən istifadə edirlər. Milli Təhlükəsizlik Xidmətinin sabiq başçısı onu da bildirib ki, Ermənistan hökuməti “inqilab” adı altında ölkədə vətəndaş cəmiyyətini məhv edib. Məsələn, mətbuat azadlığının qorunması ilə məşğul olan təşkilatlar müstəqil medianı boğmağa başlayıblar.
Erməni siyasətçi ölkə vətəndaşlarını beynəlxalq təşkilatların fəaliyyətini nəzarətdə saxlamağa çağırıb və onları maliyyələşdirən Corc Soros fondunun rəhbərinin bu ölkədə “məxməri inqilab”a kömək etdikləri barədə bəyanatını xatırladıb. O, hüquq-mühafizə orqanlarını da beynəlxalq təşkilatların ölkənin daxili işlərinə müdaxiləsi ilə bağlı tədbirlər görməyə, onların fəaliyyətini qadağan etməyə səsləyib, Paşinyan hökumətini isə vətəndaşların vergiləri hesabına qondarma Qarabağ respublikasında özünə sərf edən rejim qurmaqda təqsirləndirib. Siyasətçi əlavə edib ki, bu cür oyunların Ermənistan hökuməti üçün ağır nəticələri olacaq.
Ermənistan parlamentinin keçmiş vitse-spikeri Eduard Şarmazanov da eynir mövqedədir. Şarmazanova görə, Ermənistanda hakimiyyətin ələ keçirilməsindən bir il sonra, praktiki olaraq, “sehrli çubuğ”un sıçrayış inkişafı mifologiyasını sıfıra endirməklə, ugursuzluğa uğrayan tərəf populizmin növbəti mərhələsinə keçid edir: “Ermənistan hakimiyyətini sümürgənlər və cəlladlar idarə edir. Biz bununla sərt mübarizə aparacağıq. Nikol, geri sayım başlayacaq, son mərmini at. Yalanın ayaqları gödəkdir”.
Hələlik isə görünən budur ki, Paşinyan ölkəsində və işğal altında olan Azərbaycan ərazisində yaşayan ermənilər arasında ultramillətçi əhval-ruhiyyəni gücləndirməklə diqqəti sosial, hakimiyyətdaxili problemlərdən, yarıtmaz idarəetmədən, iflasa uğrayan xarici siyasətdən yayındırmaq istəyir. Amma bunlar Paşiynanın özü üçün getdikcə ciddi problemə çevrilir. Digər tərəfdən o da faktdır ki, Azərbaycanın yürütdüyü siyasət nəticəsində bölgədəki reallıqlar artıq fərqli məzmun alıb. Paşinyan bu durumda Qarabağ məsələsində sərsəm açıqlamalar verməklə, sadəcə, özü üçün yeni sərt zərbələr hazırlayır. Çünki Ermənistanın həm siyasi, həm də hərbi müstəvidə həyata keçirmək istədiyi bütün təxribatların qarşısını Bakı lazımi qaydada alacaq və dövriyyəyə Azərbaycanın Silahlı Qüvvələrinin daxil edilməsi Paşinyan üçün ən ağır zərbə olacaq. Bunu rusiyalı politoloq Vitali Arkov da təsdiq edir. Onun fikrincə, Paşinyan ölkədə iqtisadiyyatın çökdüyü bir vaxtda öz reytinqini bərpa etmək təlaşındadır: “Paşinyanın iqtisadi sahədə möcüzə yaratmaqda acizliyi elə bəri başdan bəllidir, amma əhalinin yoxsulluqda yaşayan çoxluğunu hər cür nağılla aldatmaq çətin deyildi. Paşinyan hakimiyyəti tərəfindən Dağlıq Qarabağın köhnə kadrlardan təmizlənməmiş ərazi olması baş naziri və onun arxasındakı qrupları xeyli narahat edir. Bu durumda Qarabağ münaqişəsi ətrafında verilən açıqlamalar isə savaşı qızışdırsa, Paşinyan gözləmədiyi böyük problemlərlə üzləşəcək”.
Tahir TAĞIYEV
