Sentyabrın 2-də Bakıda Azərbaycan, Türkiyə və Gürcüstan hərbi qulluqçularının iştirakı ilə “Eternity-2019” kompüter dəstəkli komanda-qərargah təlimi başlayır.
Müdafiə Nazirlliyindən verilən məlumata görə, Silahlı Qüvvələrin Hərb Oyunları Mərkəzində və səhra şəraitində keçiriləcək nəzəri və praktiki hissədən ibarət olan təlimdə üç ölkənin hərbi bölmələri və aidiyyəti dövlət qurumlarının nümayəndələri regional iqtisadi layihələrin mühafizəsinin təşkili üzrə tapşırıqları icra edəcək.
Təlim sentyabrın 6-dək davam edəcək.
Çox maraqlıdır ki, Ermənistan KİV-i və cəmiyyəti bu təlimlərin keçirilməsindən böyük narahatlıq ifadə edir. Üçtərəfli hərbi təlimlərdə onları qorxudan mahiyyət nədən ibarətdir?
Daşdəmir Əliyev: “Hər üç ölkənin silahlı qüvvələrinin birgə təlimləri onların operativ uyğunluğunu artırır ki...”
Hərbi Ekspert Daşdəmir Əliyev “Bakı-Xəbər”ə bildirdi ki, ermənilərin təşvişinin ciddi əsasları var: "Üç ölkənin hərbi sahədə əməkdaşlığı regional sabitliyə töhfə verə bilər. Qonşu ölkələrin hərbi-müdafiə sahəsində əməkdaşlığı regional sabitliyə xidmət edir. Nəzərə almaq lazımdır ki, Türkiyə NATO üzvüdür. Gürcüstanda NATO üzvlüyünə can atan bir ölkədir və NATO ilə çox sıx əməkdaşlıq edir. Bu baxımdan, üçlük çərçivəsində müdafiə və hərbi sahədə əməkdaşlıq Azərbaycan ordusunda standartların artması baxımından faydalıdır".
Ekspertin sözlərinə görə, Türkiyə-Azərbaycan-Gürcüstan formatı istənilən baxımdan hər üç dövlətin maraqlarına və mənafeyinə uyğun bir formatdır: “Bu format xeyli vaxtdır fəaliyyətdədir. Bu təlim də hərbi sahədə əməkdaşlığın inkişafı istiqamətində növbəti önəmli addım sayılır.
Həm Azərbaycanın, həm də Gürcüstanın çox ciddi təhlükəsizlik problemləri var. Hər iki ölkənin problemləri bir-birinə çox oxşardır. Bu problemləri aradan qaldırmaq hər iki dövlətin əsas məsələsidir. Təbii ki, hər iki tərəf bu məsələdə xaricdən müttəfiqlər axtarmağa bir növ məcburdur. Müttəfiq qismində də ilk növbədə bu regiona ən yaxın, eyni zamanda regionda ciddi maraqları olan dövlətlərdən biri kimi Türkiyə ola bilər.
Hər üç ölkənin silahlı qüvvələrinin birgə təlimləri onların operativ uyğunluğunu artırır ki, onlar gələcəkdə bir yerdə istər sülhməramlı əməliyyat çərçivəsində, istərsə də gələcəkdə bir ittifaq daxilində olarlarsa, o ittifaq daxilində də birgə müdafiə təlimləri görmək üçün faydalı ola bilər. Düşünürəm ki, ermənilərin keçirdiyi narahatlıq bununla bağlı ola bilər”.
Məhəmmədəli QƏRİBLİ
