Avqustun 26-da Azərbaycanın Birinci vitse-prezidenti Mehriban xanım Əliyeva doğum gününü qeyd etdi. 55 yaşı münasibətilə onun ünvanına çoxlu sayda təbriklərin göndərildiyinin şahidi olduq. Sosial mediada çoxlu sayda sadə azərbaycanlının xanım Əliyevaya səmimi təbriklərini görmək mümkün idi.
Qonşu Rusiyanın dövlət elitasının əhəmiyyətli hissəsinin də ayrı-ayrılıqda bu təbrikə qoşulduğu özünü göstərdi. Mehriban xanım Əliyevanı təbrik edən Rusiya rəsmiləri arasında Rusiya prezidenti Vladimir Putinin, Rusiya Hökumətinin sədri Dmitri Medvedyevin, Rusiya Federasiyası Federal Məclisi Federasiya Şurasının sədri Valentina Matviyenkonun adlarına rast gəlinirdi. Təbrikə qoşulanların sırasında Rusiyanın baş naziri Dmitriy Medvedyevin həyat yoldaşı da vardı. Rusiya dövlət və siyasi elitasının Mehriban xanımın şəxsinə verdiyi bu önəm həm də Azərbaycana bəslənən münasibətin təzahürüdür. Çünki Mehriban xanım yalnız ölkənin birinci ledisi deyil, həm də vəzifə ardıcıllığına görə Prezidentdən sonra ikinci şəxs sayılır. Maraqldır ki, biz analoji münasibətin digər dövlətlərin rəsmilərinə bəsləndiyini görmürük. Məsələn, Nikol Paşinyan Ermənistanda Baş nazir seçiləndən sonra Rusiya rəhbərliyi uzun müddət ona təbrik məktubu ünvanlamadı. Paşinyan belə məzmunda təbriki yalnız bir neçə dəfə Moskvaya ayaq döyəndən sonra ala bildi. Rusiya dövlət elitasının Mehriban xanıma göstərdiyi bu diqqət nəyin təzahürü sayıla bilər?
Politoloq Yeganə Hacıyeva “Bakı-Xəbər”ə açıqlamasında bildirdi ki, bu diqqəti yüksək dəyərləndirir: “Təbriklərin mətnindən də görünür ki, Mehriban xanıma ölkə başçısının xanımı kimi deyil, dövlət xadimi kimi xitab edilir. Bu, Rusiyanın Azərbaycan dövlətinə, onun rəhbərliyinə bəslədiyi dost münasibətin təzahürü olmaqla yanaşı, həm də Mehriban xanımın fəaliyyəti və şəxsi keyfiyyətlərinə bağlı olan məsələdi. Müsəlman ölkəsində dünyəvi qadın lider nümunəsi və həmçinin müsəlman ölkəsində dini milli dəyərlərə sədaqətli, sülhpərvər bir dövlət xadimi olaraq Mehriban xanımın bəşəriyyətə çox faydası dəyib. Mehriban Əliyeva, həmçinin, qlobal səviyyədə dinlərarası mədəniyyət sahəsinin inkşafına töhfə vermiş dövlət xadimidir, qaynar ocaqlarda sülhün və mədəniyyətin bərqərar olması istiqamətində maarifçilik təhsil layihələrini həyata keçirən xanım siyasətçidir.
Əfqanıstan, Pakistan , Somali və s. kimi qaynar ocaqlarda yerli müsəlman cəmiyyətlərin inkişfına səbəb olacaq qız uşaqlarının təhsili layihələrini həyata keçirmiş, məktəb açmış bir dövlət xadimdir. Rusiyanın dövlət rəsmilərinin ard-arda təbriklərini şərtləndirən əsas məqam vətəndaşlarının çoxunun müsəlman dinindən olması və bu müsəlman çoxluğun, xüsusilə ölkənin cənubunda müsəlman çoxluğun rəğbət bəslədiyi bir xadim kimi nüfuz sahibi olması şərtləndirir.
Bilirsiniz ki, dini bayramlar ərəfəsi Rusiya məscidlərində Heydər Əliyev Fondunun aktivləri mütərəqqi islamın inkişafı layihələrinin həyata keçirilməsi kimi bir fəaliyyətlə məşğul olurlar. Diğər tərəfdən, Mehriban xanım Əliyeva həm də xristian məbəd və kilsələrinin təmirinə böyük dəstək verib. Bu da müsəlman və xanım olan dövlət xadiminin dinlərarası sülhə verdiyi töhfənin göstəricisidir”.
Politoloqun sözlərinə görə, təbiidir ki, biz Rusiyadan bu cür diqqəti Ermənistana və onun rəhbərlərinə münasibətdə görmürük: “Çünki onlarda deyilən standartlara cavab verən dövlət xadimi yoxdur. Rusiya heç onların birinci şəxsinə belə diqqət göstərməyib. Bütün bunlar göstərir ki, Azərbaycan bir ölkə olaraq öz çəkisini qoruyub saxlamağı bacarır. Bu həm ölkəmizə , həm də dövlət rəhbərlərimizə bəslənən hörmət və ehtiramda özünü aydın göstərir”.
Məhəmmədəli QƏRİBLİ
