Ermənistan Müdafiə Nazirliyinin keçirdiyi və Rusiyanın ORSİS şirkətinin yeganə iştirakçısı olduğu tenderin dayandırılmasına görə cinayət işi qaldırılıb. Ermənistan mediasında bu barədə qısa məlumat verilib. Qeyd olunur ki, söhbət güllə istehsal edəcək zavodun tikintisi ilə bağlı yaranan vəziyyətdən gedir. Rusiya mediası isə tenderdən kənarlaşdırılan ORSIS şirkətinin mövqeyini dərc edib.
Şirkətin təmsilçisinin sözlərinə görə, Ermənistan 2019-cu ilin may ayında öz tarixi ərzində ilk dəfə tender elan edib və bir neçə milyon dollar həcmində hərbi texnika almaq istəyini açıqlayıb. Müsabiqənin şərtlərinə yalnız Rusiyanın ORSİS şirkəti əməl edə bilib. Lakin gözlənilmədən tender bağlı elan edilib və bu barədə şirkətə heç bir məlumat verilməyib. Bundan sonra ORSİS-nin maraqlarını müdafiə edən hüquqşünaslara Ermənistan Cinayət Məcəlləsinin “vəzifə səlahiyyətlərinə səhlənkar yanaşma” maddəsi ilə cinayət işi açılması ilə bağlı fəaliyyətə keçmələri tapşırılıb. Nəticədə Ermənistan CM-nin 376-cı maddəsi (vəzifə səlahiyyətlərinə səhlənkar yanaşma) ilə cinayət işi başlanıb. Şirkət rəsmisinin sözlərinə görə, təmsil etdiyi qurum artıq Ermənistanın Rusiyadakı səfirliyinin hərbi attaşesinə müraciət edərək, silah çatdırılması ilə bağlı yaranan problemə aydınlıq gətirilməsini tələb edib.
ORSİS-dən onu da bildiriblər ki, onlar “Sənaye texnologiyaları” şirkətinə daxil olan qurum kimi illərdir Ermənistana silah, güllə, optik cihazlar çatdırır: “Bütün xidmətlərimizdən sonra bizim şirkət birdən-birə Ermənistan Müdafiə Nazirliyinin “qara siyahı”sına düşüb ”.
Şirkət nümayəndəsi onu da deyib ki, Ermənistan tərəfi onların zəruri sənədləri təqdim etmədiyini iddia edir: “Lakin bu məlumatlar həqiqətə uyğun deyil. Ermənistan Müdafiə Nazirliyinin son həftələr ərzində tələb etdiyi bütün sənədləri vaxtında təqdim etmişik. Onlar isə bizə bildiriblər ki, guya silahların təhvil verilməsi və alınması ilə bağlı aktları verməmişik. Lakin bunların hamısı əsassızdır. Ermənistanın bizi “qara siyahı”ya salmasının heç bir hüquqi və digər əsası yoxdur”.
Şirkət nümayəndəsi bəyan edib ki, yaranmış vəziyyət Ermənistanda güllə istehsal edəcək zavodun tikilməsi ilə bağlı layihənin taleyini də sual altında qoyur: “Bu müəssisəyə bir neçə milyon ABŞ dolları həcmində sərmayə qoyuluşu nəzərdə tutulurdu”.
Ermənistan Müdafiə Nazirliyi sözügedən məsələ ilə bağlı cinayət işinin başlandığını təsdiq edib. Ermənistan MN-dən bildiriblər ki, istintaq işini yekunlaşdırdıqdan sonra ictimaiyyətə geniş məlumat veriləcək.
Ermənistanın güllə istehsal edəcək bir Rusiya şirkəti ilə bu cür davranışı nəyi deməyə əsas verir?
Azad İsazadə: “Rusiya şirkətinin oyundan kənar salınması ABŞ təsiri ilə bağlıdır”
Hərbi ekspert Azad İsazadə qəzetimizə açıqlamasında bildirdi ki, bu məlumatla o da tanışdı: “Ancaq məlumatda bir natamamalıq hiss etdim. Sanki ortada olan əsl səbəbi demək istəmirlər. Söhbət adi bir sahəni əhatə edən tenderdən getsəydi biz burda ilkin olaraq korrupsiya amilini qabarda bilərdik. Adətən tenderlərdə belə qaranlıq məqamlar çox olur. Söhbət “otkat” və ya udan firmanın sifarişçiyə əlavə vəsait ödəməsindən gedir. Ancaq burda düşünmürəm ki, bu cür amil başlıca rol oynasın. Çünki söhbət starteji olan hərbi sahəni əhatə edən bir zavodun tikintisindənn gedir. Ermənistan müharibə şəraitində yaşayır. Ölkənin belə bir zavoda ehtiyacının olduğu şübhəsizdir. Rəsmi İrəvanın öz gücünə belə bir layihəni maliyyələşdirə bilməz. Ordakı iqtisadi vəziyyət hamıya bəllidir. Adətən belə hərbi layihələr və silah alışı ilə bağlı məsələdə onlar Rusiyanın xidmətindən istifadə edirlər. Yəni Rusiya həmin pulu kredit şəklində Ermənistana verir. Ancaq bu həmin məsələyə bənzəmir. Çünki belə olsaydı, Ermənistan şirkəti kənarda saxlamazdı. Tenderdə cəmi bir şirkət iştirak edibsə, deməli, Ermənistanın əvvəl Rusiya şirkətinin iştirakına razılığı olub. Əks halda onu heç tək firma kimi tenderdə iştiraka buraxmazdılar. Deməli, burada hansısa başqa motiv var. Hiss olunur ki, şirkət bundan bərk qəzəblənib və məsələnin hətta hüquq müstəvisində araşdırılmasına səy göstərir. Böyük ehtimalla, burda başqa səbəb var və o siyasidir. Bilirsiniz ki, ABŞ Rusiyanın bir çox silah istehsal edən firmalarının adını sanksiya siyahısına salıb. Ola bilər ki, Rusiyanın həmin şirkətinin də adı orda var. Layihəni Rusiya maliyyələşdirmirsə, deməli erməni diasporu donor kimi çıxış edib. Ermənistanın bu cür iri layihələrini adətən onlar maliyyələşdirirlər. Yəqin ki, ABŞ-ın təzyiqi ilə onlar Ermənistanın qarşısında bu şərti qoyublar. Güman edirəm ki, Rusiya şirkətinin oyundan kənar salınması ABŞ təsiri ilə bağlıdır. Yaxın günlərdə bunun detalları tam üzə çıxmış olacaq”.
Məhəmmədəli QƏRİBLİ
