Ermənistan xaricdə seçki pulu dilənir, qondarma “Artsax”da seçki maliyyələşdirir...
Ermənistan KİV-in yaydığı məlumata görə, avqustun 22-də bu ölkənin hökuməti "tanınmamış Qarabağda seçkiləri izləmək üçün ilk dəfə olaraq xarici QHT-lərə vəsait ayırdı". Üstəlik, bu "görünməmiş bir qərar" kimi qələmə verilir. Onların təbirincə, "Ermənistan hökuməti həmişə demokratiya üçün pul istəmək rolunda olubsa, indi donor rolunda çıxış edir".
Ermənistan mediasının yaydığı bu məlumatlarla bağlı açıqlamasında Xarici İşlər Nazirliyinin mətbuat katibi Leyla Abdullayeva bildirib ki, Azərbaycan ərazilərini işğal edən Ermənistan ilk dəfə deyil ki, bu ərazilərdə "seçkilər" və ya "referendum" adlandırdığı müxtəlif tamaşalar keçirir.
L.Abdullayeva qeyd edib ki, onların nəticələrinə görə, beynəlxalq ictimaiyyət yekdilliklə Azərbaycanın suverenliyinə və ərazi bütövlüyünə dəstək, qanunsuz rejimin, eləcə də onun tərəfindən keçirilən hər hansı bir "seçki"nin tanınmaması ilə bağlı prinsipial mövqeyini daim bəyan edir: "Azərbaycanın işğal olunmuş ərazilərində “seçkilər”in izlənməsi üçün vəsait ayıran Ermənistan hökuməti bir daha ölkəmizin Dağlıq Qarabağ bölgəsinə və ona bitişik inzibati rayonlarına nəzarəti həyata keçirdiyini etiraf etmiş olur və bununla da 2015-ci ildə Avropa İnsan Hüquqları Məhkəməsinin “Çıraqovlar və digərləri Ermənistana qarşı” işi üzrə qəbul etdiyi qərarın müvafiq müddəalarının doğru olduğunu təsdiqləyir”.
Bütün bunlarla yanaşı, məsələnin gülünc tərəfi odur ki, Ermənistan bir dövlət olaraq hər zaman pul dilənməklə məşğul olub. Rəsmi səviyyədə bir sıra dövlətlərdən, beynəlxalq maliyyə qurumlarından pul almaqdan ötrü min dona girən, müxtəlif xeyriyyə marafonlarından kömək uman Ermənistanın digər dövlətin ərazisində qanunsuz olaraq xarici QHT-lərə vəsait ayırması gülüncdür. Gülünc olmaqla yanaşı, beynəlxalq hüquqa ziddir. Ancaq çox qəribədir ki, Qarabağ münaqişəsinin tənzimlənməsində vasitəçi olan ATƏT-in Minsk Qrupu bunu sükutla seyr edir. Halbuki, Ermənistanın bu addımı nümayişkəranə şəkildə beynəlxalq hüququn pozulması deməkdir.
Maraqlıdır, Minsk Qrupu buna niyə susur?
- Məhəmməd Əsədullazadə: “Sözügedən qurum birbaşa müdaxilə edib işğalçı ölkənin belə fəaliyyətlərinin qarşısını almalıdır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadə buna bir necə aspektdən yanaşdı: “Ermənistanın işğal olunmuş ərazilərdə qondarma “seçkiyə” vəsait ayrıması bir daha göstərir ki, rəsmi İrəvan danışıqları bu kimi fəaliyyəti ilə sabotaj edir. Burada keçirilən qondama “seçkilər” terrorçuların legitimlik qazanmasına gətirməyəcək. Yalnız Ermənistan bununla münaqişədə üçüncü tərəf yaratmağa cəhd edir. Azərbaycan xarici bəzi QHT-nin burada müşahidə aparmasına diqqət etməlidir və bəzi ölkələrə nota verməlidir. Qeyd edim ki, ATƏT-ın Minsk Qrupu həmsədrlərinin bu prosesə seyrçi qalması belə bir formatın artıq tükənməsi deməkdir. Hansı ki, sözügedən qurum birbaşa müdaxilə edib işğalçı ölkənin belə fəaliyyətlərinin qarşısını almalıdır. Münaqişənin həlli istiqamətində bu kimi faktorlara qarşı mübarizə aparmalıdır. Görünən odur ki, ATƏT bunda maraqlı deyil. Hesab edirəm ki, Ermənistan bu gün az büdcə vəsaitli ilə belə bir oyun oynayırsa, bu, Paşinyanın Qarabağdakı erməniləri öz əhatəsində birləşdirmək cəhdidir. Belə olan təqdirdə bu, danışıqlar prosesində Paşinyanın bir avantürasıdır və belə bir siyasi gediş Qarabağda növbəti hərbi əməliyyatlara rəvac verəcək. Beynəlxalq təşkilatlar çalışmalıdırlar k, Cənubi Qafqazda konfliktlər həll edilsin. Bunun üçün də münaqişənin həllinə mane olan Ermənistana təzyiqlər edilməlidir”.
Vidadi ORDAHALLI
