İşğal altındakı Azərbaycan ərazilərində, təmas xəttinin Füzuli-Xocavənd istiqamətində dislokasiya olunmuş erməni hərbi hissəsinin 19 yaşlı əsgəri, avqustun 12-də Azərbaycan tərəfə keçən Araik Kazaryanın qardaşı onun zabitlərlə probleminin olduğunu deyib.
Hazırda Ermənistan ordusunda müqavilə əsasında xidmət keçən Armen Kazaryan “Aykakan jamanax” qəzetinin əməkdaşı ilə söhbətində həmin informasiyanı ona Beynəlxalq Qırmızı Xaç təşkilatından verdiklərini bildirib.
Lakin Armen Kazaryan deyib ki, o, qardaşının qulluq etdiyi hərbi hissəyə gedə və təfərrüatları öyrənə bilməyib. “Mənə hərbi hissəyə getməyə icazə vermədilər. Ancaq Stepanakertdə (Xankəndidə - red.) hərbi polisdə oldum, oradan məni geri göndərdilər, hərbi hissəyə buraxmadılar”, - Kazaryan əlavə edib.
Armen Kazaryanın bildirdiyinə görə, ona deyiblər ki, qardaşının Azərbaycan tərəfə keçməsi ilə bağlı məsələ məxfidir: “Ailə üzvlərimizdən də gizlədirlər”.
Hərbi hissədə qardaşına təzyiq edildiyi, döyüldüyü haqda xəbərlər barədə isə Armen Kazaryan bunları deyib: “Mən bilirdim ki, onun problemləri var, lakin bu problemlərlə bağlı getdik, adamlarla görüşdük, hər şey qaydasına düşdü”.
Kazaryan əlavə edib ki, qardaşının problemi əsgərlərlə yox, zabitlərlə olub. Görünür, Müdafiə Nazirliyi bu səbəbdən faktları gizlədir.
Xatırladaq ki, Beynəlxalq Qırmızı Xaç nümayəndələri artıq fərari erməni əsgərlə görüşüblər. Azərbaycan Müdafiə Nazirliyinin bildirdiyinə görə, Araik Kazaryan qulluq etdiyi hərbi hissədə müntəzəm döyüldüyünü, alçaldıldığını danışıb, onun başında, kürəyində və əlində xəsarət izləri olub. Qeyd edək ki, Ermənistanın rəsmi dairələri əsgərin hərbi hissədə incidildiyinə dair məlumatları təkzib edirdilər. Faktiki olaraq, onun qardaşı Ermənistanın yalan siyasətini ifşa etmiş olub. Qardaşının məhz zabitlər tərəfindən incidildiyinə dair açıqlama verib. Bu amil Ermənistan ordusu ilə bağlı hansı təsəvvürləri yaratmış olur?
Əhməd Şahidov: “Onun qardaşı əsl həqiqəti danışmaqla Ermənistanın yalan siyasətini ifşa etmiş olub”
Məsələyə münasibət bildirən Azərbaycanlı Əsir və Girovlarla bağlı Məlumat Mərkəzinin koordinatoru, hüquq müdafiəçisi Əhməd Şahidov qəzetimizə dedi ki, avqustun 12-də, səhər saatlarında, cəbhənin Füzuli rayonu istiqamətində Ermənistan ordusunun fərarilik etmiş hərbi qulluqçusu Kazaryan Araik Xaykoviç Azərbaycan əsgərləri tərəfindən saxlanıb: “İlkin dindirilmə nəticəsində müəyyən olunub ki, erməni hərbçisinin fərarilik etməsinə səbəb xidmət etdiyi hərbi hissədə baş verən özbaşınalıq, hərbi qulluqçulara qarşı edilən dözülməz və qeyri-insani münasibətdir. Azərbaycan tərəfində saxlanan erməni hərbçisi Araik Kazaryana tibbi yardım göstərilib, onun vəziyyəti normaldır. Azərbaycan Ombudsmanının nümayəndələri də erməni hərbçisinə baş çəkiblər, Araik Kazaryan saxlanma şəraitindən narazı deyil. Hərbi əsirlə Azərbaycan tərəfi beynəlxalq konvensiyalar çərçivəsində davranır: “2000-ci il təvəllüdlü Ermənistan Respublikası vətəndaşı, Ermənistanın Vayotsdzor vilayətinin Exegis kənd sakini Araik Kazaryan 8 aydır hərbi xidmətdə idi və komandirləri tərəfindən davamlı təqib və təzyiqlərə məruz qaldığından, qarşı tərəfə keçmək qərarına gəlib. Bu fakt Ermənistan ordusunda işgəncə hallarının olmasından xəbər verir. Məhz bu faktların aşkara çıxmasından narahat olan Ermənistan hakimiyyəti bir-birinə zidd açıqlamalar verməkdədir. Amma əsir düşdüyü zaman Araik Kazaryanın üzərindəki işgəncə faktları əsl gerçəkləri ortaya çıxarmış oldu”.
Faktla bağlı erməni cəmiyyətində ciddi müzakirələr getdiyini deyən hüquq müdafiəçisi Əhməd Şahidov Ermənistan hakimiyyətinin faktı gizlətməyə çalışdığını və bu məqsədlə Araik Kazaryanın ailəsinə təzyiqlərə start verdiyini deyib: “Araik Kazaryanın böyük qardaşı da Ermənistan ordusunda xidmət edir. Məhz bu hadisədən sonra onu hərbi qarnizona çağırıblar və istintaqa cəlb ediblər. Araik Kazaryanın qardaşı hazırda Dağlıq Qarabağdadır və sorğu-sual olunur. Araikin anası da yerli hakimiyyət orqanları tərəfindən davamlı təzyiqlərə məruz qalıb, nəticədə onun səhhəti pisləşib və xəstəxanaya aparılıb. Bütün bu təzyiq və təqiblər rəsmi İrəvanın Ermənistan ordusundakı işgəncə və şiddət faktlarını gizlətmək cəhdidir. Ermənistan hakimiyyəti Araik Kazaryanın ailəsini və yaxınlarını hər vəchlə susdurmağa çalışır. Ancaq, göründüyü kimi, onun qardaşı əsl həqiqəti danışmaqla Ermənistanın yalan siyasətini ifşa etmiş olub”.
Məhəmmədəli QƏRİBLİ
