Başdan-ayağa çirkab, zorakılıq içində olan, bir sözlə, zülmün ərşə çıxdığı Ermənistan cəmiyyətində bütün növ cinayətlər törədilir. Həmin ölkədə ailə-məişət zəminində də kifayət qədər qətl, zorakılıq hadisələri baş verir. Lakin Ermənistan mətbuatı belə məsələlərin tirajlanmasına elə də əhəmiyyət vermir. Azərbaycanda baş verən hadisələri addım-addım izləyən erməni mediası ölkəmizdə yaşanan kiçik bir məişət hadisəsini belə kütləvi olaraq tirajlamağa maraq göstərir.
Respublikamızda ailə-məişət zəminində təsadüfən baş verən qətl olayı, eləcə də hansısa zorakılıq halları dərhal erməni mediasında gündəmin əsas xəbərlərinə çevrilir. Əlbəttə, onlar bu informasiyanı Azərbaycan mediasına istinadən verirlər.
Bu günlərdə Tovuzda oğulun atasını təqaüd kartına görə çəkiclə öldürməsi hadisəsi, demək olar ki, bir sıra erməni mediasında xəbərə çevrilib və tirajlanıb. Bu xoşagəlməz hadisə Azərbaycanda baş verən nadir hadisələrdən biridir və bunun Ermənistana heç bir aidiyyəti yoxdur. Bu olayın və ailə-məişət zəminində baş verən digər hadisələrin Ermənistan mətbuatı tərəfindən geniş şəkildə tirajlanmasının səbəbi nə ilə bağlıdır?
Azər Həsrət: “Düşmən azərbaycanlıların neqativ obrazını yaratmaq üçün əlinə düşən hər fürsətdən istifadə edir”
Media üzrə tanınmış ekspert, respublikanın əməkdar jurnalisti Azər Həsrət “Bakı-Xəbər”ə bildirdi ki, ermənilərin Azərbaycan cəmiyyətində baş verən ən xırda cinayət hadisələrini belə tirajlamaqda əsas məqsədləri beynəlxalq ictimaiyyətdə azərbaycanlılarla bağlı “vəhşi, zorakı” xalq obrazı yaratmaqdır. A.Həsrət hesab edir ki, ermənilər beynəlxalq ictimaiyyətdə bizimlə bağlı yanlış təsəvvürlər yaratmaq üçün ölkəmizdə ailə-məişət zəminində baş verən hadisələri tirajlamağa meyl edirlər. “Əlbəttə, ermənilərin maraq və məramı aydındır, onlar bu məlumatları məqsədli şəkildə tirajlayırlar. Düşmən azərbaycanlıların neqativ obrazını yaratmaq üçün əlinə düşən hər fürsətdən istifadə edir. Yəni Azərbaycanda ailə-məişət zəminində baş verən hadisələri də tirajlayaraq yaymaqla dünyaya göstərmək istəyirlər ki, baxın, bu ölkədə ata oğulu, ana qızını, qardaş qardaşı öldürür, azərbaycanlılar vəhşi xalqdır və biz onlarla birlikdə yaşaya bilmərik”.
A.Həsrətin sözlərinə görə, burada məsələnin bir başqa tərəfi də var, həmin məlumatlar ermənilərə öz mediamız vasitəsilə çatır. Bu cür məlumatların Azərbaycan mediasında tirajlandığını deyən A.Həsrət qeyd etdi ki, ailə-məişət zəminində baş verən bu kimi olaylar bütün cəmiyyətlərdə, o cümlədən də Ermənistanda da baş verir. O bildirdi ki, Ermənistanda bu kimi hallar adi hala çevrilib. “Bu kimi kiçik məsələləri, ailə-məişət zəminində baş verən hadisələri bizim media bu şəkildə tirajlamamalıdır. Əslində, bu xəbərləri bilmədən, yaxud düşünmədən ermənilərə özümüz ötürürük. Digər tərəfdən də bilirsiniz ki, anti-Azərbaycan qüvvələri də durmadan çalışırlar. Təəssüflər olsun ki, onların içində azərbaycanlılar da var. Onlar bu cür xəbərləri bir yerə toplayıb yaymaqla məşğuldurlar. Məqsəd Azərbaycan hakimiyyətini gözdən salmaqdır. Ən kiçik bir hadisə baş verdikdə belə onu Azərbaycan hakimiyyəti ilə əlaqələndirməyə cəhd edirlər. Hardasa suda kimsə boğulur, kimsə kimisə döyür, kimsə haradansa kiçik oğurluq edir, bütün bunları Azərbaycan hakimiyyətinin ayağına bağlayıb, hakimiyyəti gözdən salmağı hədəfə götürüblər. Yəni bu cür məlumatların tirajlanması öz-özünə baş vermir. Bizim media ailə-məişət zəminində baş verən hadisələri yayarkən diqqətli olmalıdır. Tutalım, haradasa bir oğul atasını döyüb öldürüb, bunun bizim cəmiyyət üçün nə qədər əhəmiyyəti var? Düzdür, bu hadisə arzuolunmaz və acı hadisədir. Ümumiyyətlə, bu olay bizim cəmiyyətimiz üçün xarakterikdirmi? Əlbəttə ki, deyil. Azərbaycanda belə hadisələr 5-10 ildə baş verir, ya vermir, bizim mətbuat bunu xəbərə çevirir, yayır, düşmən də yatmır, hər an mediamızı izləyir və bu kimi xəbərləri tirajlayıb yayır. Əmin olun ki, ermənilər Azərbaycanda ailə-məişət zəminində baş verən bu məlumatları yalnız öz medialarında yaymaqla kifayətlənmirlər, bu tip xəbərləri bülletenlər, toplular şəklində nəşr edib bütün dünyaya yayırlar. Ona görə də mediamız bu cür xəbərləri yayarkən diqqətli olmaldır” - deyə A.Həsrət vurğuladı.
İradə SARIYEVA
