Təlim uçuşları zamanı qəzaya uğrayan hərbi təyyarənin pilotu Rəşad Atakişiyevin nəşi torpağa tapşırıldı. Məlum olduğu kimi, pilotun cəsədi qəzadan xeyli sonra, uzun axtarışların nəticəsində dənizin dibindən tapıldı. Dövlət öz şəhidini təmtəraqlı, adına layiq şəkildə dəfn etmək üçün üzərinə düşən bütün işləri gördü. Hətta şəhidin dəfni üçün İkinci Fəxri Xiyabanda yer ayırdı.
Mərhum pilotun yaxınlarının mediaya verdiyi məlumatlardan aydın olur ki, dövlət bütün dəfn xərclərini də öz üzərinə götürüb. Bunları təsadüfən xatırlatmırıq. Bu hadisədən də siyasi dividend götürmək istəyən siyasi qruplar, partiya sədrləri olduğu səbəbilə məsələnin mahiyyətinə detallı şəkildə varmaq istəyirik. Azərbaycan dövləti bütün məsələlərdə milli-mənəvi dəyərlərə söykənən siyasət həyata keçirir. Yəni heç vaxt dövlət səviyyəsində kiminsə siyasi mənsubiyyətinə görə hansısa dəfn mərasimində iştirakının qarşısı alınmayıb.
Dəfndən öncəki gün mərhum pilotun qaynatası, tanınmış politoloq Qabil Hüseynlinin bir müraciəti yayıldı. Qabil Hüseynli müxtəlif siyasi partiya üzvlərindən və siyasi qruplardan keçiriləcək vida mərasiminə qatılmamağı xahiş edirdi. O, R.Atakişiyevlə vida mərasimindən müxtəlif siyasi məqsədlər üçün istifadə etmək arzusunda olan şəxslərə aşağıdakı məzmunda müraciət ünvanladı: "Ailəmiz çox çətin, ağır və kövrək bir dönəmdən keçir. Ailəmizin, hətta xalqımızın sevimlisi, rəşadətli pilotumuz Rəşad Atakişiyevi itirmişik. Mərhumun dəfni ilə bağlı həyata keçirilən vida mərasiminə dövlət öz dəstəyini göstərir. Müəyyən siyasi partiyaların və qrupların tədbirə qatılmaq və mərasim vasitəsilə siyasi dividend əldə etmək istəkləri barədə məlumatlar əldə etmişik. Həmin şəxslərdən artıq dərəcədə xahiş edirik ki, sabah keçiriləcək vida mərasiminə qatılmasınlar. Rica edirəm ki, bu ağrılı günümüzdə bizi başa düşsünlər".
Qabil Hüseynli sıradan bir adam olsaydı, bu cür müraciəti kiminsə diqtəsilə etdiyinə dair səslənən iradları qəbul edə bilərdik. Dövlət müşaviri kimi mühüm postda çalışmış, uzun illər politoloq kimi ölkənin ictimai-siyasi həyatında tanınan və ən nəhayət, professor elmi dərəcəsində olan bir adama bu cür bəyanatı verməyi diqtə etdirmək inandırıcı görünmür. Təəssüflər olsun ki, radikal müxalif elektoratın xaç atası kimi özünü aparan Əli Kərimli bu məsələdən də siyasi dividend əldə etmək istəyib. O, sosial şəbəkədəki hesabında yaranmış vəziyyəti hakimiyyətin üzərinə yıxmağa cəhd edib. Hətta bir az da irəli gedərək, hakimiyyəti faşist, aparteid siyasəti yürütməkdə ittiham edib. Əli Kərimli qatılmaq istədiyi bəzi tədbirlərdə ona maneçiliyin necə törədildiyinə dair müxtəlif misallar da çəkib. Ancaq məsələnin əsl mahiyyətinə toxunmayıb. Niyə deməyib ki, onu məclislərdə şəhid ailələrinin özləri görmək istəmirlər. Axı bunun dövlətlə heç bir əlaqəsi yoxdur. Əli Kərimlinin Xocalı faciəsinin anımı, 20 Yanvar şəhidlərinin yad olunması ilə bağlı göstərdiyi siyasi şoular hamının yadındadır. O heç vaxt sakit şəkildə, tədbirin mahiyyətinə uyğun tərzdə davranmır. Bir topa özünə yaxın olan bloger və jurnalistin açdığı canlı yayımın müşayiətilə hərəkət etməyə üstünlük verir. Tədbirin mahiyyəti ilə uzlaşmayan siyasi şüarlar səsləndirməyə göstəriş verir. Məsələn, 2016-cı ilin aprel hadisələri dövründə bütün xalq tarixi qələbə əhval-ruhiyyəsində olduğu halda, Əli Kərimli məsələnin mahiyyətini təhrif etdi, ordumuza qarşı kampaniya təşkil etməyə çalışdı. Həmin hadisələrlə bağlı dəfn mərasiminə başının dəstəsilə gəldi. Bütün yol boyu müxtəlif KİV-ə müsahibələr verdi. Onun kimiləri dəfndə görmək istəməyən Qabil Hüseynli müxalif cameə üçün yad adam sayılmır. Uzun müddət Müsavat Partiyasının funksioneri olub. Yəni Əli Kərimlini və digərlərini bizdən yaxşı tanıyır, onların nəyə qadir olduğunu gözəl bilir. Biz başqa müxalif partiya liderlərinin də bu məsələ ilə bağlı davranışlarını gördük. Onların əksəriyyəti mərhum pilotun ailəsinin çağırışına hörmətlə yanaşıb, məclisə qatılmadılar, yalnız mərhumun ailəsinə sosial şəbəkə və KİV üzərindən başsağlığı verməklə kifayətləndilər. Ancaq bütün məsələlərdə olduğu kimi, Əli Kərimli bu hadisədə də siyasi dividend qazanmaq naminə məsələni siyasiləşdirdi. Bu istiqamətdə yeni müzakirələrin aparılmasına şərait yaratmış oldu. Əli Kərimlinin hərəkətləri şəhidlərimizə, onların yaxınlarına hörmətsizlikdən başqa bir şey deyil. Hansı şəxs əzizinin yas mərasimini siyasi avantüra vasitəsinə çevirmək istəyənləri bu mərasimdə görmək istəyər?
Əslində, Əli Kərimlinin özü üçün də bu cür qələbəlik yerlərdə görünməmək xeyirdir. Çünki ona qarşı xalqın içindəki münasibət birmənalı deyil. Hətta müxalif cameənin özündə belə ona böyük aqressiya ilə yanaşanlar var. Hər an üzərinə hücum olunub, döyülə bilər. Bunu heç kim istisna edə bilməz. Ən azı onunla bağlı aparılan müzakirələrdə biz AXCP-dən kənar müxalif qüvvələrin Əli Kərimli personasına bəslədiyi kin-küdurəti görürük. Bu qadağanı tətbiq etməklə Qabil Hüseynli ən böyük yaxşılığı elə Əli Kərimliyə edib. Onu növbəti xalq qınağı və danlağından xilas edib.
Məhəmmədəli QƏRİBLİ
.jpg)
.jpg)
