23/09/2019 12:17
728 x 90

Rusiya Paşinyana qarşı daha bir siyasi nümayiş göstərdi – Poqosyan təhvil verilmədi...

“Poqosyanın təhvil verilməməsi iki ölkə münasibətlərinə təsirsiz ötüşməyəcək”

img

Rusiya Baş Prokurorluğu Ermənistan Məhkəmə Qərarlarının İcbari İcrası Xidmətinin sabiq rəhbəri, Respublikaçılar Partiyasından keçmiş millət vəkili Miqran Poqosyanı ölkəsinin hüquq-mühafizə orqanlarına təhvil verməkdən imtina edib.

Rusiya Federasiyası Baş Prokurorluğundan verilən məlumata görə, M. Poqosyanı Ermənistana təhvil verilməsi istəyini təmin etmək mümkün deyil. Bunu onunla əlaqələndirirlər ki, 1993-cü ildə imzalanan beynəlxalq konvensiya buna imkan vermir.

Qeyd edək ki, 2008-2017-ci illərdə qeyd olunan vəzifədə işləmiş, sonradan 2018-ci ilədək millət vəkili olmuş M.Poqosyan külli miqdarda mənimsəmələr və vəzifə səlahiyyətlərindən sui-istifadələrdə ittiham olunaraq cari ilin aprel ayından axtarışa verilib.

Erməni mediasında Rusiyanın bu addımı birmənalı qarşılanmayıb. Ermənistan Baş Prokurorluğunun mətbuat katibi Arevik Xaçatryan qarşı tərəfin 1993-cü ildə qəbul edilmiş Mülki, Ailə, Cinayət İşlərinə Dair Hüquqi Yardım və Hüquqi Münasibətlər Konvensiyasına istinad etdiyini diqqətə çatdırıb.

Ermənistanın “1in.am” saytı yazır ki, Rusiyanın Poqosyanı ekstradisiya etməkdən imtina etməsi iki ölkə arasında çox ciddi siyasi böhrandan xəbər verir: “Ermənistanın bir nömrəli strateji müttəfiqi hesab edilən dövlətin belə bir münasibəti onu deməyə əsas verir ki, xarici siyasət, Ermənistan diplomatiyası tam iflas olub. Özü də bütün istiqamətlərdə. İnqilabın xarici siyasətdə nəticələri kapitallaşmayıb və bunu hakimiyyət nümayəndələri də etiraf edirlər. Hazırkı məsələ ilə bağlı söhbət tək xırda uğursuzluqlardan və yaxud ayrı-ayrı epizodlardan deyil, konseptual problemlərdən gedir”.

Müəllif yazır ki, hakimiyyət iddia edirdi ki, inqilab xarici siyasətdə hər hansı bir dəyişikliyi nəzərdə tutmur: “Nikol Paşinyanın bu tezisi məzmunca səhv idi, çünki müasir dünyada xarici və daxili siyasətdə mexaniki sərhəd mövcud deyil. Hətta vahid məntiqdə nəzərdən keçirilir. Ötən ilyarım göstərdi ki, xarici siyasətin fəlsəfəsində belə hər hansı bir dəyişiklik baş vermədi. Nəticə də budur ki, Ermənistanın Rusiyadan birtərəfli qaydada asılılığı nəinki azaldı, həm də Ermənistan-Rusiya münasibətlərində dərin institusional böhran yaşandı. Miqran Poqosyanla bağlı epizod yalnız bunun lokal təzahürüdür”.

Bütün bu deyilənlərin fonunda, Poqosyanın təhvil verilməməsi Ermənistan-Rusiya münasibətləri kontekstində nə deməkdir?

  • Məhəmməd Əsədullazadə: “Moskvanın israrlarına rəğmən, Köçəryanın həbsdə qalması Moskvanın da analoji addım atmasına gətirir”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Poqosyanın təhvil verilməməsi iki ölkə münasibətlərinə təsirsiz ötüşməyəcək: “Rusiya-Ermənistan əlaqələrinin inkişafı, demək olar ki, mümkün görünmür. Nikol Paşinyan hakimiyyəti Rusiyada inamsızlıq yaradıb. Ona görə də iki dövlət arasında hüquqi proseslərdə problemlər olacaq. Qeyd edim ki, Moskvanın israrlarına rəğmən, Köçəryanın həbsdə qalması Moskvanın da analoji addım atmasına gətirir. Hesab edirəm ki, oktyabrda Putinin Ermənistana gözlənilən səfərində də münasibətlər düzəlməyəcək. Ermənistan hakimiyyətinin siyasi kursunda ciddi problemlər var. Onun daxili və xarici siyasəti fiaskoya gedir. Rusiyanın Ermənistanın tələblərinə baxmayaraq, Poqosyanı təhvil verməməsində əsas problem Paşinyan iqtidarından qaynaqlanır. Ona görə də iki ölkə arasında münasibətlərin inkişafından söhbət belə gedə bilməz. İki ölkə arasında etimadsızlıq hökm sürür. Paşinyan hesab edir ki, Kreml onu devirmək istəyir. Kreml də hesab edir ki, Paşinyan Qərbə üz tutur, Moskvadan üz döndərir. Bu kontekstdə təbii ki, ikitərəfli hüquqi məsələlərdə anlaşmamaq etimadsızlıqdan irəli gəlir”.

Vidadi ORDAHALLI

Son xəbərlər