Məlum olduğu kimi, Lerikdəki “Relaks” adlanan istirahət mərkəzində Vergilər Nazirliyinin əməkdaşları və mərkəzin rəhbərliyi arasında toqquşmadan sonra deputat İqbal Məmmədovun oğlu Mirhəmid Nərimanlı və digər 5 nəfər barəsində həbs-qətimkan tədbiri seçilib. Hadisə ətrafında müzakirələr hələ də davam edir.
Qısa xatırlama üçün qeyd edək ki, ötən həftə nazirliyin əməkdaşları "Relaks" istirahət və turizm mərkəzinə vergidən yayınma əsaslarına görə vergi yoxlaması aparmaq üçün gediblər. Bu zaman Vergilər Nazirliyinin və hüquq-mühafizə orqanlarının əməkdaşları ilə istirahət mərkəzinin rəhbərliyi arasında qarşıdurma baş verib.
Sosial mediada yayılan və həmin insidentdən olduğu deyilən videogörüntülərdə İqbal Məmmədovun oğlu M.Nərimanlı və qardaşı oğlu olduğu iddia olunan Orxan Məmmədovun vergi əməkdaşları ilə dalaşdığı görünür. Videogörüntülərdə O.Məmmədov olduğu iddia olunan şəxs vergi əməkdaşlarını və polis əməkdaşı geyimində olan şəxsləri hadisə yerindən qovmağa çalışır və təhqiramiz ifadələrdən istifadə edir.
Onlar Cinayət Məcəlləsinin vəzifə səlahiyyətlərini ağır nəticələrə səbəb olmaqla aşma və hakimiyyət nümayəndələrinə həyat və sağlamlıq üçün təhlükəli olan zor tətbiq etmə maddələri ilə məhkəmənin qərarına əsasən həbs olunublar. Vergilər, Daxili İşlər nazirlikləri və Baş Prokurorluğun yaydığı birgə məlumatda deyilir ki, avqustun 16-da nəzarət tədbirlərini həyata keçirmək üçün "Relaks" istirahət və turizm mərkəzinə gələn Vergilər Nazirliyinin əməkdaşları müqavimətlə üzləşib və əraziyə buraxılmayıblar.
Məlumatda deyilir ki, mərkəzə gələn Lerik Rayon Polis Şöbəsinin əməkdaşlarının, Lerik Rayon İcra Hakimiyyəti nümayəndələrinin məsələyə müdaxiləsi nəticə verməyib və özünü istirahət mərkəzinin vəzifəli şəxsləri kimi təqdim etmiş şəxslər vergi əməkdaşları və polis işçilərinə hücum təşkil edərək onlara müxtəlif xəsarətlər yetiriblər.
Həmçinin, qeyd olunur ki, Vergilər Nazirliyinin xidməti istifadəsində və nazirlik əməkdaşlarının şəxsi istifadələrində olan avtomaşınlara daş parçaları ilə zədələr yetiriblər. Rəsmi məlumatda deyilir ki, "Relaks" istirahət və turizm mərkəzinin dövlət büdcəsinə ödədiyi vergilər kəskin azaldığına görə mərkəzin real vergi potensialını ölçmək məqsədilə ərazidə vergi yoxlamaları keçirilib. Sahəsi 14 hektardan çox ərazidə yerləşən, qonaqların qalması üçün 142 nömrədən və müxtəlif təyinatlı 20 obyektdən ibarət olan mərkəz 2018-ci ildə 10 min 726 manat, 2019-cu ilin ötən dövrü ərzində isə 972 manat vergi ödəyib.
Bunun ardınca yayılan başqa məlumatda bildirilir ki, “Relaks”ın “Azərenerji”yə də 30 min manat məbləğində borcu olub. İndiyədək istirahət mərkəzinin məsul şəxsləri “Azərenerji”nin əməkdaşlarına sayğaca baxış keçirməyə icazə verməyiblər.
Bütün bir xronologiyanı verməkdə məqsədimiz budur ki, oxucuda hadisəyə hakimiyyətin və radikal müxalifətin necə reaksiya verməsi ilə bağlı aydın təsəvvür yaransın. Qeyd edək ki, bu hadisə ətrafındakı müzakirələr media və sosial şəbəkələrin gündəmindən düşmür. Hadisəyə iki fərqli münasibət sezilir. Hakimiyyətlə radikal müxalifətin baxışları arasındakı fərq tam şəkildə təzad təşkil edir. Gəlin bu hadisə ilə bağlı hakimiyyətin atdığı addımlara diqqət edək. Yayılan rəsmi məlumatlardan da görünür ki, kimə məxsus olmağından asılı olmayaraq, vergi işçilərinin əlində həmin obyektdə yoxlama aparmaq üçün tam əsas olub. Əgər bir istirahət mərkəzi 8 ay ərzində cəmi 972 manat vergi ödəyirsə, burada vergidən yayınma cinayətinin olması ilə bağlı şübhələr üçün əsas var. Bir daha xatırladırıq ki, dövlət qurumu üçün obyektin kimə məxsus olması heç bir əhəmiyyət daşımayıb və onlar gəlib yoxlamalarını aparmaq istəyiblər. Orada baş verən qanunsuzluqdan sonra polis insidenti törədənlərin hamısını həbs etdi. Burada da kimin kimin oğlu və ya qohumu olması məsələsinə baxılmadı. Hətta millət vəkili İqbal Məmmədovun oğlu da həbs edildi. Sonra məhkəmə onlar barəsində həbs-qətiimkan tədbirinin seçilməsi barədə qərar çıxardı. Yəqin ki, bu əməli törədənlərlə bağlı cinayət işinin sonunda məhkəmə tərəfindən ittiham hökmü də çıxarılacaq. Bu, tanınmış bir insanın obyektində baş verən harın hərəkətlə bağlı dövlətin ortaya qoyduğu mövqedir. İndi gəlin baxaq görək, radikal müxalifət bu hadisədən necə dividendlər əldə etmək istəyir? Həmişəki kimi, istənilən hadisəni siyasiləşdirib, ondan öz təbliğatları üçün istifadə etmək cəhdləri nəzərə çarpır. Onlar qeyd edirlər ki, guya bu, hakimiyyətdaxili klanların mübarizəsinin nəticəsində meydana çıxan hədisədir. Bəzi radikallar isə niyə bu hadisənin törədildiynə dair hətta hökumətə sual ünvanlayırlar. Yəni dövlətin vətəndaşının xeyrinə olan addımına onlar tərəfindən ciddi dəstək hiss edilmir. Əslində isə hətta ən radikal müxalifət belə, dövlətin konkret situasiya ilə bağlı atdığı qanuni addımları dəstəkləməli idi. Çünki hakimiyyət bu məsələdə bütün varlığı ilə qanunun aliliyi prinsipindən çıxış edib.
Məhəmmədəli QƏRİBLİ
