23/09/2019 12:13
728 x 90

Radikal mühacirlərin xaricdə dalbadal açdıqları internet TV-lər - Azərbaycanın daxili işlərinə təhlükəli müdaxilə əməliyyatları hazırlanır

“Elələri var ki, konkret olaraq əhalini itaətsizliyə və inqilaba çağırır”

img

Son vaxtlar mühacirət adı ilə ölkəni tərk edib xaricə sığınan bəzi şəxslərlə bağlı maraqlı tendensiya müşahidə edilir. Hiss olunur ki, onlar planlı şəkildə hansısa proseslərə doğru istiqamətləndirilirlər. Son prezident seçkiləri ərəfəsində məhz xaricdəki radikal mühacirlərdən ibarət dəstəyə söyüş söymək kimi rol verilmişdisə, hazırda bu fəaliyyət növünü bir qədər dəyişiblər. 

Söyüş layihəsini təşkil edənlər gördülər ki, həmin mübarizə metodu Azərbaycan üçün effektli deyil. Çünki bizim mental dəyərlərimizdə söyüş söyən adama birmənalı olaraq mənfi münasibət  bəslənir. Planın uğursuzluğa düçar olduğunu hiss edənlər indi formatı bir qədər dəyişməyə üstünlük verirlər. Radikal mühacirlərin bəzilərinə internet TV-lər açmaq məsləhət görülür. Müşahidələr göstərir ki, həmin proses çox sürətlə həyata keçirilir. Hətta jurnalistika və siyasətlə indiyə kimi yaxından və uzaqdan əlaqəsi olmayanlar da bu işə istiqamətləndirilir. Həmin TV-lərin başlıca fəaliyyət istiqaməti radikal məzmunlu çağırışlar etmək, hakimiyyətə qarşı ən barışmaz mövqedə olan siyasiləri öz efirlərinə dəvət edib, onların monoloqlarını Azərbaycan vətəndaşına çatdırmaqdan ibarətdir. Bəllidir ki, bu cür fəaliyyətlər müəyyən maddi vəsait tələb edir. Hansısa mühacirin sığındığı ölkədən aldığı cüzi yardımla belə miqyaslı işləri görmək qeyri-mümkündür. Bu da həmin TV-lərin yaradılmasında maraqlı olan qüvvələrin mövcudluğuna şübhə yeri qoymur. Yəni mahnını sifariş edən başqalarıdır, bizim mühacirlər isə bu prosesdə icraçı rolunu oynayırlar.

Məlumdur ki, Azərbaycanın daxili işlərinə müdaxilə cəhdləri, ölkəyə müxtəlif üsullarla olunan təzyiqlər əsasən mühüm hadisələr ərəfəsində daha geniş vüsət almağa başlayır. Biz bunu ölkəmizin evsahibliyi etdiyi mötəbər tədbirlər ərəfəsində dəfələrlə görmüşük. Hazırda da Azərbaycan mühüm tədbirlər və hadisələrin həyata keçməsinin astanasındadır. Qısa müddətdən sonra ölkədə parlament seçkiləri keçiriləcək, həmçinin, Azərbaycanın təşəbbüsü ilə reallaşan TANAP layihəsinin tam istifadəyə veriləcəyi gözlənir. Bütün bunlar onu deməyə əsas verir ki, Azərbaycana qarşı daimi pressinq fürsətini gözləyən qüvvələrin bu il fəallaşacağına şübhə yeri qalmır. Budəfəki təzyiq vasitəsi kimi isə radikal müxaliflərin idarə etdiyi və sayı günü-gündən artan internet televiziyalarının seçildiyi sezilir.

  • Aqşin Əliyev: “Cəzasızlıq mühitindən istifadə edərək, Azərbaycanın qanunvericiliyi ilə uzlaşmayan təbliğatla məşğul olurlar”

Ekspert Aqşin Əliyev “Bakı-Xəbər”ə bildirdi ki, xaricdən idarə olunan internet televiziyalarının  fəaliyyətinə, apardıqları təbliğata baxmaq onları məqsədlərinin nədən ibarət olduğu haqda ilkin rəyə gəlməyə kifayət edir: “Həmin internet TV-lər heç də obyektiv təbliğatla məşğul olmurlar. Əsasən radikal dairələrin mesajlarını cəmiyyətə çatdırmaq yolunu tutublar. Elələri var ki, konkret olaraq əhalini itaətsizliyə və inqilaba çağırır. Bir sözlə, cəzasızlıq mühitindən istifadə edərək, Azərbaycanın qanunvericiliyi ilə uzlaşmayan təbliğatla məşğul olurlar. Onların öz gücləri ilə bu işin öhdəsindən gələ bilməsi inandırıcı görünmür. Fəaliyyətlərini izlədikdə sanki vahid mərkəzdən idarə olunduqlarına dair rəy formalaşır. Təbii ki, bu yolla Azərbaycanı istəməyən bəzi dairələr ölkəmizə təzyiq metodundan istifadə etmək istəyirlər. Bütün bunların bir adı var: Azərbaycanın daxili işlərinə kobud müdaxilə cəhdləri. Bununla bağlı həmin mühacirlərin fəaliyyət göstərdiyi ölkələrə müraciət olunmalıdır. Gəlin görək, Azərbaycandan hansısa Avropa ölkəsi ilə bağlı belə radikal çağırışlar olsa, analoji fəaliyyətə üstünlük verən internet TV-lər fəaliyətə başlasa, onların reaksiyası necə olar? Təbii ki, qəbul etməzlər. Özləri üçün rəva bilmədikləri qanunsuzluğun bizə yönəlməsinə də imkan verməməlidirlər”.

Məhəmmədəli QƏRİBLİ

Son xəbərlər