23/09/2019 12:16
728 x 90

Xaricdəki mühacir azərbaycanlı radikalların öz gücləri ilə internet TV açmaq imkanları – pərdəarxası qüvvələri ifşa edən suallar...

Azər Həsrət: “Müəyyən dairələr həmin adamlara internet televiziyası açaraq bundan öz məqsədləri üçün istifadə edirlər”

img

“Belələri öz ruhlarını şeytana satmış insanlardır”

 

Məlum olduğu kimi, xaricdə məskunlaşan bəzi radikal mühacir azərbaycanlılar internet televiziyası açıb dövlətə qarşı dağıdıcı xarakterli qərəzli kampaniya aparırlar. Sözügedən kanallarda ancaq müəyyən sifarişlərə uyğun olaraq təbliğat aparılır. Bu cür telekanalların maliyyə mənbələri qaranlıqdır. Telekanal açanlar bəyan edirlər ki, bunu öz vəsaitləri hesabına açıblar. Bu və digər məsələlərlə bağlı media eksperti Azər Həsrətə bir sıra suallar ünvanladıq.

- Azər müəllim, xaricdə internet televiziyası açanlar bəyan edirlər ki, bunu öz vəsaitləri hesabına açıblar. Bu nə dərəcədə realdır?

- Əvvəla xaricdə o cür internet televiziyası açanların böyük əksəriyyəti Azərbaycanda uğursuz adamlar olub. Yəni onlar burada, faktiki olaraq, heç bir iş görə bilmirlər və görmək də istəməyiblər. Çünki tənbəl və bacarıqsız olublar. Görüblər ki, ölkədə havayı çörək yoxdur, siyasətlə məşğul olmaq adı altında Avropaya gediblər. Siyasətlə heç vaxt heç bir əlaqələri olmadığı halda, qaçıb gedib Avropa ölkələrində özlərini siyasi mühacir kimi qələmə veriblər. Təbii ki, avropalılar ağılsız deyil. Onların real siyasi mühacir olmadıqlarını anladıqlarına görə həmin şəxslərdən istədikləri kimi istifadə edirlər. Burda təkcə avropalılardan söhbət getmir. Həm də ermənilərə işləyən mərkəzlər, eləcə də ayrı-ayrı ermənilər bu adamlardan istifadə edirlər. Müəyyən dairələr həmin adamlara internet televiziyası açaraq bundan öz məqsədləri üçün istifadə edirlər. Mümkün deyil ki, həmin radikal mühacirlər öz vəsaitləri hesabına internet TV aça bilsinlər. Bunun üçün böyük vəsait lazımdır. Ona görə də üçüncü qüvvələr bu adamlardan istifadə edirlər. Biz yeni texnologiyanın içində olan adamlar olaraq bilirik ki, ən adi vebsaytın saxlanması belə, böyük pullar hesabına başa gəlir. İnternet TV üçün xüsusi avadanlıqlar, yayım imkanları, yüksək sürətli internet lazımdır. Mühacirlərin şəxsi vəsaiti hesabına bunu ərsəyə gətirmək mümkün deyil.

- Onlardan bəziləri iddia edirlər ki, şəxsi avtomobilini satıb televiziya açıb. Bu nə dərəcədə mümkündür?

- Bu cür fikirlər, ümumiyyətlə, gülünc təsir bağışlayır. Çünki avtomobilin pulu ilə internet televiziyası açmaq mümkün və ağlabatan deyil. Kiminsə başının altına yastıq qoymasınlar. Azərbaycan cəmiyyəti nəyin nə olduğunu yaxşı bilir. Bu cür televiziyalar xaricdəki müəyyən dairələr tərəfindən maliyyələşdirilir. Məqsəd Azərbaycan dövlətini zəiflətməkdir. Yəni sözügedən mühacirlər öz ruhlarını şeytana satmış insanlardır. Belə insanlardan hər cür istifadə edilir.

- Ən qəribəsi odur ki, görürsən, ümumiyyətlə, jurnalistika ilə əlaqəsi olmayan adamlar bu işlə məşğul olurlar.

- Həqiqətən də belə hallar var və bu paradoksal mənzərə yaradır. Bu adamlar siyasətdə olmadıqları kimi, jurnalistikada da olmayıblar. Ancaq Azərbaycandakı radikal partiyalardan arayış almaqla bu cür fəaliyyətlə məşğuldurlar. Deməyim odur ki, bunlar mediaya aidiyyəti olan adamlar yox, fırıldaqçılardır. Fırıldaqçı olduqlarına görə də Avropadakı üçüncü qüvvələr onlardan hər cür istifadə edə bilir.

- Bu cür televiziyalara ancaq müxalif mövqedən çıxış edən şəxslər dəvət edilir və interaktiv bölmədə yalnız onların mövqeyindən çıxış edən şəxslərin şərhləri yerləşdirilir. Hansısa əks fikrin ifadə olunmasına imkan verilmir. Buna nə ad vermək olar?

- Bu onların sifarişlə işlədiyini sübut edir. Şərh bölməsinə əks fikir yazanda dərhal bloklayırlar. Dəfələrlə olub ki, bizim etik çərçivədə normal müzakirə aparmaq qabiliyyəti olan dostlarımız o müzakirələrə qatılıb öz fikirlərini səsləndirmək istəyiblər. Bu zaman həmin adamlar dərhal bloklanıb. Yəni özləri məqsədli şəkildə bu cür fikirlərin səslənməsinin qarşısını alıblar. Hansı ki, belədə fikir azadlığından, demokratiyadan dəm vururlar. Ancaq başda özləri buna əməl etmir və dözümlü yanaşmırlar.

- Bəzən elə olur ki, həmin internet TV-lərdə yayımlanan canlı bağlantı zamanı əlaqə kəsilir. Texniki baxımdan belə halların yaşanması gözləniləndir. Ancaq həmin televiziyanı açanlar belə hallar zamanı dərhal bunu hakimiyyətlə əlaqələndirirlər.

- Bu bir daha onların qərəzli olmasını ortaya qoyur. Nəzərə almaq lazımdır ki, Azərbaycan hakimiyyətinin onlarla bağlı problemi yoxdur. Ölkə hakimiyyəti ifadə azadlığına sadiq bir hakimiyyətdir. İstənilən şəxsin tənqidi fikirlərini ifadə etməsinə dözümlü yanaşır. Onların apardığı fəaliyyət fikir müxtəlifliyi yox, anti-Azərbaycan fəaliyyətidir.

Vidadi ORDAHALLI

Son xəbərlər