“Paşinyana müxalif olan qüvvələr Amulsar amilindən ona qarşı məharətlə istifadə edəcəklər”
Ermənistanın cənubunda yerləşən Amulsar qızıl yatağının istismarı məsələsi ölkədə böyük narazılığa səbəb olsa da, belə görünür ki, ölkə rəhbərliyi bunda qərarlıdır. Bir sıra etirazlara rəğmən, Paşinyan hakimiyyəti geri çəkilmək istəmir.
Ard-arda bununla bağlı bir sıra etiraz aksiyaları keçirilir. Son aksiyalar zamanı İrəvanda 200 qadın uşaq arabası ilə Amulsar qızıl-filiz yatağının istifadəyə verilməsinə qarşı çıxıb. Uşaq arabalarında üzərlərində "Amulsar dağdır, vəssalam", "Yataqlarsız gələcək" yazılmış bannerlər var. Etirazçılar Milli Assambleyanın binasına doğru hərəkət edərkən polis təhlükəsizlik tədbirləri çərçivəsində onlara əraziyə girməyi qadağan edib. Nümayişçilərin bəziləri xəbərdarlıqlara məhəl qoymayaraq irəliləməyə çalışan zaman polis güc tətbiq edib və ərazini boşaldıb, bəzi etirazçılar isə saxlanaraq polis bölməsinə aparılıb.
Aksiya ilə paralel olaraq, Ermənistan Prezidentinin iqamətgahında Baş nazir Nikol Paşinyan, Vayotsdzor vilayətinin qubernatoru, Cermuk şəhərinin meri, icma rəhbərləri və ekoloqların iştirakı ilə Amulsar yatağının istismarı ilə bağlı iclas keçirilib. Görüşün yekununda Baş nazirin mətbuat katibi Vladimir Karapetyan jurnalistlərin qarşısına çıxaraq bildirib ki, iclas zamanı bütün yanaşmalar diqqətdən keçirilib, buna baxmayaraq, hökumət yatağın fəaliyyətini bərpa etməyi məqbul sayır. Etirazların artdığını görən Baş nazir Nikol Paşinyan “Facebook” səhifəsində canlı yayım zamanı bildirib ki, beynəlxalq ekspertizanın rəyi belə nəticəyə gəlməyə imkan verir: qızıl yatağının işlənməsi ekologiyaya ziyan vurmayacaq. O cümlədən də söhbət mədənin yaxınlığında yerləşən Cermuk kurort şəhərinin mineral sularından, Sevan gölünün və yaxın çayların suyundan gedir. Paşinyan bəyan edib ki, yaxın zamanda Amulsarda qızıl hasilatının ziyanlı olduğunu sübut edən amillər ortaya çıxmazsa, mədənin işlənməsinə icazə veriləcək.
Onu da qeyd edək ki, bu günlərdə Ermənistan İstintaq Komitəsi "Advanced Resources Development" (ELARD) mütəxəssislərinin Amulsar barədə hesabatını dərc edib. Hesabatda 16 bəndin nəzərə alınacağı təqdirdə ekoloji risqlərin idarə oluna biləcəyi göstərilib.
Onu da qeyd edək ki, təmiz qızıl ehtiyatına görə ölkənin ikinci yatağı olan Amulsar yatağı eyniadlı dağda, 3 min metr yüksəklikdə, Arpa və Vorotan çaylarının vadisində, kurort şəhəri olan Cermukdan 13 km aralıda yerləşir. Geoloqların fikrincə, yataqda təxminən 31 milyon ton qiymətli filiz və 40 ton təmiz qızıl var.
Belə görünür ki, Ermənistan hakimiyyəti gəlir əldə etmək üçün yatağın istismarında qərarlıdır. Ancaq buna qarşı ölkədə müxtəlif səviyyələrdə etirazların səngimək bilməməsi bunun heç də asan olmayacağından xəbər verir.
- Ramil Hüseynov: “İstənilən halda, mədənin istismarı asan olmayacaq”
Sözügedən məsələ ilə bağlı fikirlərini “Bakı-Xəbər”lə bölüşən VİP-in sədr müavini Ramil Hüseynovun fikrincə, vəziyyətin bu cür davam etməsi ondan xəbər verir ki, mədənin istismarı heç də asan olmayacaq: “Düzdür, Amulsarın istismarı yoxsul Ermənistan iqtisadiyyatı üçün böyük əhəmiyyət kəsb edir. Həmin mədən istismara verilsə, ölkə iqtisadiyyatı bundan faydalancaq. Ancaq bu yatağın istismarının ekologiyaya vuracağı zərər də qaçılmazdır. Paşinyan bununla bağlı nə qədər arqumentlər səsləndirsə də, ona inananlar azdır. Ən azından ona görə ki, Amulsar mədəni ilə Sevan gölü və Cermuk arasında məsafə yaxınlığı var. Belə olan halda, mümkün deyil ki, istismar zamanı yaranan tullantılar ora təsir etməsin. Mənə elə gəlir ki, Paşinyana müxalif olan qüvvələr Amulsar amilindən ona qarşı məharətlə istifadə edəcəklər. Ola bilsin ki, bu, Ermənistan cəmiyyətində Paşinyana qarşı ciddi sosial narazılıqlara rəvac versin. İstənilən halda, mədənin istismarı asan olmayacaq”.
Vidadi ORDAHALLI
