Son günlərdə işğalçı Ermənistanda xüsüsi diqqət mərkəzində yer alan məsələlərdən biri də sabiq prezident Serj Sarkisyanın həbsə atılacağı ilə bağlıdır. Robert Köçəryandan sonra Serj Sarkisyanın da həbsə atılması Nikol Paşinyan iqtidarının “Qarabağ klanı”na növbəti böyük zərbəsi olacaq.
Xatırladaq ki, Serj Sarkisyanın həbs olunacağına dair məlumatı onun kürəkəni Mikael Minasyan səsləndirib. Mikael Minasyan ölkəsində ötən il baş tutan “məxməri inqilab”ı şərh edərkən bildirib ki, 2018-ci ildə Ermənistanda inqilab yox, hakimiyyət dəyişikliyi baş verib. Ermənistanın Vatikandakı sabiq səfiri olan Mikael Minasyan onu da qeyd edib ki, ötən ilin aprel-may hadisələrini hakimiyyət dəyişikliyi kimi səciyyələndirmək olar. Onun sözlərinə görə, həmin dövrdə ölkədə inqilabi şərait yetişsə də, bu hadisə heç də “məxməri inqilab” olmayıb: “İndiki hakimiyyətin dövrünü isə ən təhlükəli – dərin məyusluq və növbəti kədərli nəticələr doğuracaq şərait kimi qiymətləndirmək olar. Hakimiyyət dəyişikliyindən sonra yeni hakimiyyət xalqı birləşdirmək, qurmaq və yaratmaq, bir sözlə, əsl inqilabi prosesləri həyata keçirmək imkanı qazandı. İnsanların görünməmiş dəstəyindən isə dövlətçilik və xalq naminə istifadə etmək olardı. Bunun üçün keçmişin zəncirlərindən qurtulmaq, yazılmamış qanunların əsiri olmamaq və yeni komanda yaradaraq qeyri-adi nəticələr əldə etmək lazım idi. Aprelin 23-dən sonra Ermənistan üçün uçuş zolağı açıq idi və əlverişli hava mövcud olub”. Amma Paşinyan hakimiyyətinin tamamilə başqa yol seçdiyini təəssüflə qeyd edən diplomat vurğulayıb ki, yeni hökumət islahatları deyil, köhnə qvardiyadan intiqam və qisas yolunu seçdi. O əlavə edib ki, heç bir peşəkar kadr öz fəaliyyətini və həyatını qisasçı hakimiyyətlə birləşdirmək istəməz və qisasın daha bir qisas doğuracağını hamı başa düşür: “Peşəkarların olmadığı hər hansı hakimiyyət isə öz varlığını qorumaq üçün mütləq yeni repressiyalara əl atır. Biz açıq gözlə artıq bu mərhələyə daxil olmuşuq və erməni xalqı inqilab əvəzinə mənasız hakimiyyət dəyişikliyi əldə edib”. Keçmiş diplomat bu fonda Serj Sarkisyanın da həbsə atılmasının gözlənilən olduğunu vurğulayıb.
Ermənistan Respublika Partiyasının sədr müavini Armen Aşotyan bununla bağlı bildirir ki, Serj Sarkisyanın yaxın vaxtlarda tutulması haqqında Mikayel Minasyanın müsahibəsi siyasi və informasiya partlayışına təsir edib: “Bu çoxdan bəlli idi. Üçüncü prezidentin həbs olunması hazırkı baş nazir qrupunun sonuncu jokeridir. Şəxsi laqeydlik, siyasi gücsüzlük, ölkənin gündən-günə ağırlaşan problemlərində uyğunsuzluq və acizliyi ört-basdır etmək üçün qalmaqallı şouların səhnələşdirilməsi məsələlərində ixtisaslaşmış Nikol Paşinyan yaxın günlərdə özünün sonuncu silahına - Serjin həbs olunmasına müraciət edib. İllərlə davam edən yalan, fırıldaqçılıq, nifrət kampaniyası və “günahkar sağ Serjdir” primitiv konseptinin xaç atası əsərləri cəmi bir il yarım müddətdə o qədər pisləşib ki, o, şəxsi siyasi həyatı bir neçə ay uzatmaq üçün bu sonuncu mümkün addıma müraciət edəcək”. Aşotyan qeyd edib ki, Paşinyanın qorxulu yuxuları artıq başlayıb və bu onun sonunu gətirəcək: “Serj oturmağa hazırdır. Serj xalqın xətrinə oturacaq ki, 15 ay əvvəl onun istefasına sevinən minlərlə insan nəhayət hipnozdan çıxmaq üçün tarixi şans qazansın. Yaxşı, onu da oturtdunuz, sonra nə edəcəksiniz? İnsanlara necə izah edəcəksiniz ki, Serjin həbsxanada oturmasından sonra nə üçün onların həyatı yaxşılaşmır, maaşlar artmır, Qarabağ məsələsi maksimal ermənipərəst həllini tapmır, ölkə ətrafında geosiyasi dairə sıxılır? Və vaxtında səhv etmiş, problemlərdən yorulmuş insanlar görəcəklər ki, reallıqda sağ Serj günahkar deyil. Və həqiqi günahkarı çox tez tapacaqlar. Serjin həbs olunması insanların gözlərini açacaq və bu, Nikolun sonunun başlanğıcı olacaq. Onun oturmaq üçün problemi yoxdur. O həmişə xalq marağının tələb etdiyi yerdə olub. Yaxşı, Nikol, indi də səni görüm. Ermənistanı səndən azad etmək üçün bizə kömək et. Serj hazırdır”.
Bütün bunlarla bağlı “lragir.am” portalı yazır ki, baş verənlər Ermənistan daxilində yeni qarşıdurmanı daha da dərinləşdirəcək: “Ermənistanın Vatikandakı keçmiş səfiri, 2018-ci ildə Ermənistanda inqilabın yetişdiyi, amma başa çatmadığı haqda post edən Mikael Minasyan bir sıra yeni maraqlı açqılamalar verib. Birincisi, o, Serj Sarksyanın və bir sıra generalların tezliklə həbsini ağlabatan sayır, ikincisi, işarə edir ki, Ermənistanın yeni hökuməti, ən azı, üç önəmli məsələni həll etməlidir – Amulsar, İstanbul konvensiyası və Dağlıq Qarabağ problemini. Ermənistan Respublika Partiyasının sədr müavini Armen Aşotyan da bundan sonra “Serjin xalqın xatirinə həbsdə əyləşməyə hazır olduğu” və Serj Sarksyanın həbsinin “geri sayımın” başlanğıc atəşi ola biləcyi haqda bildirib.
Minasyan və Aşotyanın bəyanatlarının tonuna görə, Serj Sarksyanın həbsi, praktik olaraq, həll olunub. Və Ermənistanın bir sıra siyasi, informasiya və biznes çevrələrinə Minasyanın təsir imkanları nəzərə alınarsa, istisna deyil ki, Ermənistanda bununla hansısa proseslərə start veriləcək. Yönlər göstərilib – Amulsar, İstanbul konvensiyası və Qarabağ problemi. Amulsara gəlincə, hər şeyə əsasən, mədənin istismarı üzrə hökumətin müsbət qərarı, ekoloqlar və ictimai qrupların polislə toqquşmaya gətirə biləsi sərt müqaviməti gözlənilir. İstanbul konvensiyasının mümkün ratifikasiyası da siyasi qarşıdurma vasitəsinə çevrilir: konvensiyanın mahiyyəti, demək olar, müzakirə olunmur və söhbət daha çox iğtişaşlar törədəcək hansısa etirazlara hazırlıqdan gedir. Qarabağ probleminə dair isə Azərbaycanda qeyri-adi fəallıq görmək olar. Bundan başqa, Azərbaycan mediasında Nikol Paşinyanın “Qarabağ Ermənistandır və nöqtə” bəyanatının danışıqlar prosesini batırdığından xəbər verdiyi haqda ideya yaradılır ki, bu da savaşın başlanmasına gətirər. Bakı Rusiya ekspertlərini yardıma çağırmağa, onların dili ilə Nikol Paşinyana danışıqlar formatını dəyişməyin yolverilməzliyi “xəbərdarlığı” etməyə çalışır. Ermənistanın əvvəlki hakimiyyəti Nikol Paşinyanın bəyanatını birbaşa pisləməyib, amma eskalasiya və ya tənzimləmədə arzuolunmaz proseslər halında onu ittiham etmək bəhanəsini qaçırmayacaq. Son həftə hadisələrinin mozaikasına əsasən güman etmək olar ki, Ermənistanın payızı gərgin olacaq. Xüsusən də oktyabrın 1-də İrəvanda Avrasiya İqtisadi Birlyinin sammiti baş tutacağına və Rusiya və Ermənistan KİV-lərində Putinin İrəvanda Robert Köçəryanla görüşmək istədiyi haqda məlumat güclü şəkildə şişirdildiyinə görə”.
Tahir TAĞIYEV
