20/09/2019 23:10
728 x 90

ABŞ jurnalı Gəncə hadisələrinin arxasında dünya radikal islamçılarının dayandığını öncədən demişdi...

img

Azərbaycan Prezidentinin ictimai-siyasi məsələlər üzrə köməkçisi Əli Həsənov ötən il Gəncədə baş vermiş terror aktlarının ildönümü ilə bağlı KİV-ə xüsusi açıqlama verib. Həmin açıqlamada diqqətçəkən bir çox vacib məqama toxunulub.

Dövlət rəsmisinin açıqlamasında vurğulanır ki, Gəncədə baş verə biləcək hadisə ilə bağlı ABŞ-ın nüfuzlu nəşri məlumat verib: “Xatırladım ki, bu teraktdan bir ay əvvəl, 2018-ci il mayın 28-də ABŞ-ın nüfuzlu "Foreign Policy" nəşri "Gəncə keçidi"nin Qərb üçün əhəmiyyəti haqqında yazı dərc edərək, baş verəcək təxribatlar haqqında xəbərdarlıq edirdi. Bu gün terroru təbliğ edən radikalların və onların havadarlarının yenidən fəallaşması, Azərbaycana təhdidlər ünvanlamaları isə Gəncə hadisələrinin ildönümü ilə yanaşı, TANAP-ın istifadəyə veriləcəyi vaxta təsadüf edir. Qəribə deyil ki, Azərbaycan dövləti və onun müstəqil siyasətinin əleyhinə son dövrlərdə Ermənistan, bəzi dövlətlərdəki klerikal dairələr, ekstremistlər, xarici ölkələrə qaçmış, sadəcə, pula və məişət rahatlığının təminatına can atan bəzi azərbaycanlılar tərəfindən aparılan təmərküzləşmiş, təhlükəli ideoloji təxribat bu günlərdə yenidən canlanıb”.

Göründüyü kimi, ABŞ nəşrinin irəli sürdüyü versiya tam özünü doğrultmuş olub. Təbii ki, KİV-ə bu məlumat çox ciddi mənbələrdən sızdırıla bilərdi. ABŞ xüsusi xidmət orqanları radikal dini qruplarla bağlı ciddi iş aparırlar. Bu heç kim üçün sirr deyil. Böyük ehtimalla, Gəncə ilə bağlı məlumat da həmin mənbələr üzərində aparılan əməliyyat tədbirləri zamanı əldə edilib. Bütün bunlar onu deməyə əsas verir ki, Gəncədəki hadisənin arxasında doğrudan da radikal dini dairələr dayanıb.  

  • Yeganə Hacıyeva: “Azərbaycan dövlətinin sayıqlığı nəticəsində radikal dini dairələrin planlaşdırdığı böyük bir layihənin tam həyata keçirilməsi mümkün olmadı”

Politoloq Yeganə Hacıyeva “Bakı-Xəbər”ə açıqlamasında bildirdi ki, Gəncə hadisələri ilə bağlı  manipulyasiyalara çox rast gəlinir: “Həmin hadisələrin mahiyyəti, inkişaf dinamikasına baxmaq kifayət edir ki, aydın təsəvvür formalaşsın. Cinayəti törədən şəxsin kimliyi, keçdiyi həyat yolu da çox mətləblərdən xəbər verir. Hadisələri icra başçısının əhali ilə sərt davranması ilə bağlamağa çalışsalar da, bu o qədər də inanıdırıcı görünmür. İcra başçısına güllə atan Yunus Səfərov Azərbaycan ərazisindən kənarda olan silahlı qruplaşmaların tərkibində fəaliyyət göstərib. Xarici ölkələrdən birində dini təsil alıb. Yəni personanın seçilməsi də təsadüfi deyil. Hadisə və sonrakı yaşananlar sübut etdi ki, bu, radikal dini dairələrin təşkil etdiyi aksiya olub. Hörmətli Əli Həsənovun açıqlamasında qeyd olunan məqamlar çox düşündürücüdür. ABŞ mətbuatının məhz Gəncə ilə bağlı əvvəldən həyəcan təbili çalması onu deməyə əsas verir ki, həmin istiqamətdə işlər aparılırmış. Bilirsiniz ki, ABŞ terrorla ciddi mübarizə aparan ölkələrdəndir. Həmin supergücün informasiya əldə etmək üçün ciddi maliyyəsi və imkanları var. Təbii ki, məqaləni yazan jurnalist belə müfəssəl və dəqiq məlumata malik ola bilməzdi. Burada xüsusi xidmət orqanlarının dəst-xətti sezilir. Yəni bu cür səhih məlumatı ancaq onlar sızdıra bilərdi. Çox təəssüflər olsun ki, bizim bəzi radikal dairələr də Gəncə hadisələri ilə bağlı fərqli davranış ortaya qoydular. Bir növ, həmin hadisələri dəstəkləyirlər. Azərbaycan dövlətinin sayıqlığı nəticəsində radikal dini dairələrin planlaşdırdığı böyük bir layihənin tam həyata keçirilməsi mümkün olmadı. Həmin hadisələrə başqa don geydirmək yersizdir”.

Məhəmmədəli QƏRİBLİ

Son xəbərlər