Radikal müxalifətin sosial şəbəkələrdə Gəncə terrorçularına təəssübkeş münasibətinin kökü...

Məlum olduğu kimi, ötən ilin yayında Gəncədə Azərbaycan dövlətçiliyinə qarşı terror aktı oldu. Həyata keçirilən istintaq tədbirləri nəticəsində ortaya çıxan faktlar bir daha təsdiqlədi ki, Gəncə hadisələri bəzi qonşu ölkələrin radikal-klerikal dairələrinin, separatçıların və ölkə daxilində siyasi fəaliyyət pərdəsi altında şəxsi ambisiyalarını həyata keçirmək istəyən qrupların birgə yer aldığı anti-Azərbaycan qüvvələri tərəfindən dövlət və milli maraqlarımıza qarşı törədilən məkrli təxribat idi.

Ancaq milli təhlükəsizliyimizə qarşı həyata keçirilən bu təxribatın qarşısı qətiyyətlə alındı və bir daha sübut olundu ki, Azərbaycan dövləti milli maraqlarımıza qarşı istənilən təhlükəni dəf etmək gücündədir.

Azərbaycan xalqı Gəncə terroruna sərt reaksiya göstərərək, dövlətin ətrafında sıx birləşdi. Bununla anti-Azərbaycan qüvvələrin milli maraqlarımıza qarşı planlarının həyata keçirilməsində iştirak edən terrorçuları, vətən xainlərini qəbul etmədiyini, bundan sonra da qəbul etməyəcəyini nümayiş etdirdi.

Ancaq dəhşətli məqamlardan biri ondan ibarətdir ki, xalqın adından, demokratiyadan, dünyəvi dövlətdən danışmağa iddia edən radikal müxalifət təmsilçiləri, fəalları məlum hadisələr zamanı sosial şəbəkələrdə terrorçuların təəssübünü çəkən mövqedən çıxış ediblər. Faktiki olaraq onlar bu cür fəaliyyətləri ilə terroru, ifrat ekstremizmi təşviq edən mövqe ortaya qoyublar. Onların bununla bağlı təəssübkeş mövqedən çıxış etməsi açıq şəkildə özünü göstərib. Sözügedən hadisələrdən bir il ötsə də, radikal müxalifət təmsilçiləri indinin özündə də terrorçuların təəssübkeşi qismində çıxış edirlər. Bütün bunlar onu sübut edir ki, radikal müxalifətin  radikalizmi, ifrat dini fundamentalizmi dəstəklədiyi göz önündədir.

Bütün bunlarla yanaşı, maraqlıdır, Gəncə hadisələri zamanı radikal müxalifət təmsilçilərinin, fəallarının sosial şəbəkələrdə terrorçuların təəssübünü çəkən mövqedən çıxış etməsi nə ilə bağlıdır?

• Seyid Camal Əzimbəyli: “Onlar Azərbaycana qarşı ən məkrli mövqedən çıxış edən qüvvələrlə belə əməkdaşlıq etməyə hazırdırlar”

Məsələyə münasibət bildirən şərqşünas Seyid Camal Əzimbəyli bunu bir sıra faktorlarla əlaqələndirdi: “Bunun başlıca səbəbi radikal müxalifətın xisləti ilə bağlıdır. Sözügedən qüvvələr öz şəxsi ambisiyaları üzündən nəyə desən gedərlər. Onlar Azərbaycana qarşı ən məkrli mövqedən çıxış edən qüvvələrlə belə əməkdaşlıq etməyə hazırdırlar, təki hakimiyyət dəyişsin və qanunsuz yolla hakimiyyətə gəlsinlər. Fikirləşmirlər ki, belə məqsədlərin həyata keçirilməsi dövlətçiliyimiz üçün təhlükəli nəticələrə gətirib çıxara bilər. Bax, budur onların əsl çirkin məqsədləri. Nəzərə almaq lazımdır ki, onların apardığı mübarizə sağlam əsaslara söykənmir. Sağlam əsaslara söykənsəydi, o zaman hakimiyyət uğrunda sivil mübarizə aparardılar. Dövlətçiliyimizə zərbə vurmaq istəyən radikal dini ekstremist qüvvələrlə əməkdaşlıq edib onların təəssübünü çəkməzdilər. Göründüyü kimi, onlarda dövlətçiliyin maraqlarını qorumaq istəyi yoxdur. Radikal müxalifət təmsilçiləri yaxşı bilirlər ki, cəmiyyətdə onların sosial dayaqları yoxdur. Bu səbəbdən onlar radikal ekstremist qüvvələri dəstəkləməklə ümid edirlər ki, guya bu yolla hakimiyyətə gələcəklər. Ancaq bu mümkün olan iş deyil. Ona görə ki, Azərbaycan dövləti güclüdür və xalq Prezidentin ətrafında sıx birləşib”.

Vidadi ORDAHALLI