22/08/2019 07:28
728 x 90

Paşinyanın Xankəndidə Azərbaycana meydan oxumasına Türkiyədən tutarlı reaksiya...

img

Türkiyənin xarici işlər naziri Mövlud Çavuşoğlu səfirlərlə görüşü zamanı deyib ki, ölkəsi bütün sahələrdə, o cümlədən, Dağlıq Qarabağ probleminin nizamlanması məsələsində hər zaman Azərbaycanı dəstəkləyəcək.

M.Çavuşoğlu vurğulayıb ki, Azərbaycan Türkiyə üçün qardaş ölkədir. Onun bu cür konkret bəyanatla çıxış etməsi maraqlı dönəmə təsadüf edir. Söhbət Cənubi Qafqazda münasibətlərin gərginləşdiyi, İran ətrafında vəziyyətin normal olmadığı, Suriyada münaqişənin yenidən alovlana bilmə ehtimalının olduğu və ən əsası da Ermənistanın Baş nazirinin Qarabağda sülh danışıqlarını yerə vuran bəyanatla çıxış etməsi ilə eyni zamana təsadüf edir. Bu həm də Azərbaycana qarşı olan qüvvələrə verilən çox sərt və dəqiq ismarıc anlamına gələ bilər. Məhz belə gərgin atmosferdə Türkiyədən nümayiş edilən açıq dəstəyin ölkəmiz üçün nə kimi əhəmiyyəti var?

  • Nəzakət Məmmədova: “Bu cür mövqeyi o, kimlərəsə, hansısa güclərə arxayın olub verirsə, bu mənada, Türkiyənin mesajı lap yerinə düşmüş olur”

Politoloq Nəzakət Məmmədova “Bakı-Xəbər”ə bildirdi ki, Türkiyə kimi böyük regional dövlətin diplomatiyasının başında duran Çavuşoğlu kimi nüfuzlu, təcrübəli diplomatın fikirləri çox önəmlidir: “Bu həm Türkiyə dövlətinin sarsılmaz mövqeyidir, həm də Türkiyə rəhbərliyinin Azərbaycana şəxsi münasibətindən, Prezident İlham Əliyevlə şəxsi dostluğundan doğan bir ifadədir. Təbii ki, Türkiyənin də dünyada, regionda öz maraqları var və Azərbaycan bu maraqların təmin olunmasında müstəsna rolu olan ölkələrdəndir. Türkiyə Azərbaycanın sayəsində Avropanın enerji təchizatında söz sahibinə çevrilib, Azərbaycan Türkiyəyə böyük yatırımlar qoyub, FETÖ ilə mübarizədə daim Türkiyənin yanında olub, Rusiya-Türkiyə münasibətləri pisləşəndə Azərbaycan rəsmiləri barışıq prosesində iştirak ediblər. Məsələn, Çavuşoğlu özü etiraf və təşəkkür etmişdi ki, Azərbaycan rəsmiləri Rusiya ilə Türkiyənin münasibətlərinin yaxşılaşmasında fəal iştirak ediblər. Gördüyümüz kimi, Azərbaycan daim Türkiyənin yanında olub, bu gün də o mövqeyindədir. Üstəlik, bu yaxınlarda ölkələrimiz arasında viza prosedurunda da müsbət irəliləyiş oldu. Doğrudur, bu gün Türkiyə böyük problemlərlə üzləşib və Yaxın Şərqdə onun bilavasitə sərhədlərində böyük münaqişə alovlanıb. Türkiyə bu prosesə cəlb olunub. Lakin nüfuzlu, “Böyük 20-liyə” daxil olan, nəinki Yaxın Şərqdə, bəzi məsələlərdə dünyada söz sahibi olan Türkiyənin dəstəyi, xüsusilə erməni diasporuna qarşı Türkiyə ilə birlik, həmrəylik bizim üçün də, onlar üçün də vacibdir. Odur ki, Mövlud Çavuşoğlunun bu fikirləri çox məntiqli, əsaslı, doğru fikirlər kimi qəbul olunmalıdır”.

Politoloqun sözlərinə görə, Çavuşoğlunun bu fikirləri, eyni zamanda, Paşinyanın Qarabağda verdiyi sərsəm, separatçı bəyanatlarla eyni dönəmə təsadüf edir: “Təbii ki, bununla Paşinyan dünyaya meydan oxuyub. Açıq deyib ki, işğal etdiyi torpaqları qaytarmaqdan söhbət belə gedə bilməz. Bu cür mövqeyi o, kimlərəsə, hansısa güclərə arxayın olub verirsə, bu mənada, Türkiyənin mesajı lap yerinə düşmüş olur. Yəni bunun qısa məzmunu belədir ki, Dağlıq Qarabağ məsələsində Türkiyə sona qədər Azərbaycanın mövqeyini qoruyacaq. Bizm üçün təbii ki, həm qardaş, həm də dünyanın güclü ölkələri sırasında yer alan Türkiyənin bu mövqeyini eşitmək xoş və əhəmiyyətlidir. Bundan bəzi dairələr də ciddi nəticə çıxarmış olacaqlar. Türkiyə ilə Azərbaycan hər zaman bir-birilə qardaş olublar. Zaman-zaman bunu belə bəyanatlarla da dünyaya xatırlatmaq lap yerinə düşür”.

Məhəmmədəli QƏRİBLİ

Son xəbərlər