Oyunbazlıqda mahir olan ermənilər bir sıra məsələlərdə, o cümlədən də beynəlxalq idman turnirləri, yarışları, futbol çempionatları keçirmək sahəsində Azərbaycanla rəqabət aparmağa cəhd göstərirlər. Lakin onların bu cəhdləri heç bir nəticə vermir.
İndiyə qədər Ermənistanın işğal altında saxladığı Azərbaycan torpaqlarında “beynəlxalq” adı altında keçirdiyi bütün idman turnirləri iflasa uğrayıb. Beş-üç ölkədən pulla cəlb edilən komandaları nəzərə almasaq, demək olar ki, ermənilərin keçirdikləri yarışlarda heç bir dövlətin peşəkar idman komandası iştirak etməyib. Burada keçirilən yarışlarda məhəllə komandalarının iştirakı ermənilərin keçirdikləri yarışların səviyyəsinin aşağıdan aşağı olduğunun göstəricisidir.
Ermənilər avqust ayının 6-dan başlayaraq işğal altındakı Azərbaycan torpaqlarında VII ümumerməni yay oyunları keçirirlər. Bu yarışların idman turnirindən daha çox bir təxribat olduğu məlumdur və bunun da müəllifi Ermənistan rejimidir. Xankəndidə təşkil edilən yarışa xeyli sayda idmançı və yüksək çinli qonaqların gələcəyi proqnozlaşdırılsa da, hələ də qonaqların və komandaların adları açıqlanmayıb. Halbuki, bu əvvəlcədən müəyyən edilir, bilinir.
Onu da vurğulayaq ki, Türkiyə və Gürcüstan VII ümumerməni yay oyunlarında iştirakdan rəsmən imtina ediblər. Qeyd edək ki, Türkiyə idmançılarının yarışa qatılmamasının səbəbi oyunların işğal altında olan Azərbaycan torpaqlarında keçirilməsidir. İranın “Jamanak” qəzetinin məlumatına görə, VII ümumerməni yay oyunlarında İran komandası da təmsil olunmayacaq, bunun da Ermənistanın Azərbaycan torpaqlarını işğalda saxlaması ilə bağlı olduğu bildirilir. Gürcüstan mətbuatının yazdığına görə, rəsmi Tiflis erməni əsilli idmançılarına bu oyunlarda iştirak qadağası qoyub.
Gördüyümüz kimi, artıq üç ölkə rəsmən VII ümumerməni yay oyunlarını boykot edib.
Ermənistandan fərqli olaraq, Azərbaycanın evsahibliyi ilə keçirilən yarışları indiyə qədər heç bir dövlət boykot etməyib və nəzərdə tutulan bütün ölkələrin idmançıları ölkəmizdə keçirilən bütün yarışlarda böyük uğurla iştirak ediblər.
Azərbaycanda keçirilən bütün beynəlxalq yarışların yüksək səviyyədə təşkil edilməsi, idmançılar üçün lazımi şəraitin yaradılması beynəlxalq ictimaiyyət tərəfindən müsbət qarşılanıb və bu yarışların əks-sədası, yaxşı mənada, dünyanın hər yerindən eşidilib.
Ermənistanın təşkil etdiyi heç bir beynəlxalq idman turniri hələ beynəlxalq ictimaiyyətdə əks-səda yaratmayıb.
Aydın Bağırov: “Bu sahədə böyük təcrübəyə və təşkilatçılığa malik olan ölkəmizdə keçirilən hər bir idman turniri, yarışı beynəlxalq idman ictimaiyyəti, eləcə də azarkeşlər tərəfindən yüksək qiymətləndirilib”
Tanınmış idman şərhçisi Aydın Bağırov “Bakı-Xəbər”ə bildirdi ki, separatçı rejimdə təşkil edilən heç bir yarış Azərbaycanda keçirilən yarışlarla müqayisəyə gələ bilməz. A.Bağırovun sözlərinə görə, Ermənistanın “beynəlxalq” adı altında keçirdiyi heç bir yarışa beynəlxalq idman ictimaiyyəti tərəfindən ciddi dəstək verilməyib. “Separatçı rejim tərəfindən Dağlıq Qarabağda bir neçə dəfə “idman yarışları” adı altında bir neçə belə tədbir keçirilib. Ümumiyyətlə, Ermənistanın Azərbaycan torpaqlarında təşkil etdiyi bu tip tədbirlərin heç biri qanuni deyil, beynəlxalq idman qurumlarının siyahılarında yer almır və onlar tanınmır. Ermənistanın Dağlıq Qarabağda keçirdiyi bütün idman yarışları beynəlxalq idman ictimaiyyəti tərəfindən tanınmır. Beynəlxalq idman qurumlarının iştirakçısı olmadığı yarışlar heç bir vaxt səviyyə baxımından fərqlənə və dünyanın diqqətini cəlb edə bilməz. Bu yarışlar hər zaman qeyri-rəsmi keçirilən yarışlar kimi qəbul edilir. Əsas odur ki, o yarışlar tanınmır və o tip yarışlardan yalnız Ermənistanın özünün xəbəri olur. O ki, qaldı ermənilərin təşkil etdiyi VII ümumerməni yay oyunlarının səviyyəsinə, bu olduqca aşağı səviyyəli bir tədbirdir. VII ümumerməni yay oyunları Azərbaycanın evsahibliyi ilə keçirilən müxtəlif beynəlxalq idman yarışları, turnirləri ilə heç cür müqayisəyə edilə bilməz. Çünki Azərbaycanda indiyə qədər çox mötəbər, dünyada böyük əks-səda yaradan idman yarışları, turnirləri keçirilib, ermənilərin isə bu sahədə heç bir uğuru yoxdur. Bu yarışların hər biri də beynəlxalq idman qurumları tərəfindən dəstəklənib və alqışlanıb. Azərbaycanda təşkil edilən bütün beynəlxalq yarışlar öz nüfuzuna görə dünyada seçilib, müsbət mənada fərqlənib. Bu sahədə böyük təcrübəyə və təşkilatçılığa malik olan ölkəmizdə keçirilən hər bir idman turniri, yarışı beynəlxalq idman ictimaiyyəti, eləcə də azarkeşlər tərəfindən yüksək qiymətləndirilib. Biz bura I Avropa Oyunlarını, İslam Oyunlarını, Dünya və Avropa çempionatlarını, eləcə də futbol üzrə Avropa liqasının final oyununu, həmçinin, gələn il keçiriləcək Avropa çempionatının dörd oyununu daxil edə bilərik. Ümumiyyətlə, Ermənistanın keçirdiyi ən böyük yarış belə, Azərbaycanın keçirdiyi yarışların ən kiçiyi ilə də müqayisəyə gələ bilməz”.
A.Bağırov qeyd etdi ki, separatçı rejim və Ermənistan hökuməti VII ümumerməni yay oyunlarını keçirməklə, əslində, öz mahiyyətlərini ortaya qoyurlar.
İradə SARIYEVA
