Ermənistanın eks-prezidenti Robert Köçəryan verdiyi son müsahibədə deyib ki, Ermənistan hökuməti uzun müddət hakimiyyətdə qala bilməyəcək. Onun sözlərinə görə, hakimiyyət məsələsi istənilən halda küçədə - növbədənkənar parlament seçkisində həll ediləcək:
“Bu cür idarəetmə keyfiyyəti ilə bu hakimiyyət uzun müddət dayana bilməyəcək və yenidən seçilmə perspektivi yoxdur. Seçici populistlərdən boğaza yığılacaq və öz seçimində daha diqqətli olacaq”.
O, müxalifətin birləşmə ehtimalının çox olduğunu, amma vahid müxalifət mərkəzinin dərhal yaranmayacağını deyib: “Bu proseslərdə mən vacib, amma yeganə olmayan həlqə olacağam. Ölkəyə sağlam qüvvələrin geniş konsolidasiyası lazımdır. Bu proses mütləq parlament müxalifətinin radikallaşmasına gətirib çıxaracaq, əks təqdirdə onlar elektoratlarını itirəcəklər. Müxalifətin konsolidasiya prosesi payızda bitəcək, siyasi mübarizə isə sistemli və miqyaslı xarakter daşıyacaq”.
Çox maraqlıdır ki, Azərbaycanda olan bəzi radikal qüvvələr də “Bir payız axşamı” anonsunu verirlər. Onların iddialarına görə, guya Azərbaycanda da payızda inqilab gözlənilə bilər. Bu cür absurd fikirləri daha çox təbliğ edən isə xaricə sığınaraq internet üzərindən fəaliyyət göstərən Qurban Məmmədovdur. Payızda hakimiyyətin dəyişəcəyi ilə bağlı bizdəki radikal dairələrin fikirləri tam olaraq Köçəryanın mövqeyi ilə üst-üstə düşür. Hər iki tərəf ölkəsində dəyişikliyin baş verəcəyinə dair konkret vaxt göstərir. Bu həm də o anlama gələ bilərmi ki, hər iki qüvvə eyni mərkəzdən idarə edilir?
Elçin Mirzəbəyli: “Dövlətimizə qarşı məkrli niyyətlər həyata keçirən qüvvələr heç vaxt istəklərinə nail ola bilməyəcəklər”
Politoloq Elçin Mirzəbəyli “Bakı-Xəbər”ə açıqlamasında bildirdi ki, Köçəryanla bizim radikal düşərgə təmsilçilərinin və xaricdəki bəzi mühacirlərin fikirlərinin üst-üstə düşməsi təsadüfi deyil: “Köçəryan necə Azərbaycan xalqına və dövlətinə qarşı açıq nifrət bəsləyirsə, bunlar da xalqımıza qarşı mənəvi terror həyata keçirirlər. Sadəcə, bir fərqləri var ki, arada insan ölümü faktoru yoxdur. Amma dövlətə və xalqa qarşı aparılan mənəvi terror, əslində, insan ölümündən daha ağır cinayətdir. Çünki onun vurduğu fəsadlar heç vaxt yaddan çıxmır. Bizimkilər də payızla bağlı müəyyən proqnoz verirlər. Buna Azərbaycanda yaxşı bir atalar sözü ilə cavab verə bilərik: cücəni payızda sayarlar. Biz də həmin cücələri payızda sayacağıq. Düşünürəm ki, həmin dairələr bu günə qədər düşərgə təfəkküründən uzağa getməyiblərsə, boş beyinləri ilə olduqları yerdə də qalacaqlar. Yalnız absurd bəyanatlar, proqnozlar verməklə falçılıqla məşğul olacaqlar. Toplum Azərbaycanda və onun ətrafında nəyin baş verdiyinin fərqindədir. Biz ölkənin maraqlarının nədən ibarət olduğunu yaxşı bilirik. Azərbaycanın təhlükəsizliyinin, ölkədəki sabitliyin qorunmasının nə qədər vacib olduğuni anlayırıq. Dövlətimizə qarşı məkrli niyyətlər həyata keçirən qüvvələr heç vaxt istəklərinə nail ola bilməyəcəklər. Buna qətiyyən şübhəmiz yoxdur. Nə payızda, nə da başqa vaxt onların reallaşdırmaq istədikləri işləri baş tutmayacaq. Arzuları ürəklərində qalmış olacaq”.
Məhəmmədəli QƏRİBLİ
