Aqşin Əliyev: “Bu heç də o anlama gəlmir ki, aldıqları dilənçi payı onların ABŞ-la münasibətlərinin yüksək səviyyədə olduğuna dəlalət edir”
Ermənistan mətbuatı İrəvandakı ABŞ Səfirliyinə istinadən bildirir ki, Vaşinqtonun İrəvana maliyyə yardımı ayırmayacağı ilə bağlı yayılan məlumatlar həqiqəti əks etdirmir. Səfirlik bildirib ki, belə məlumatlar ABŞ-ın büdcə maliyyələşməsi barədə təsəvvürlərin az olması səbəbindən ortaya çıxır. Bildirilir ki, ABŞ ayrı-ayrı dövlət qurumlarına ayırdığı maliyyədən sərbəst istifadə imkanı yaradır.
Yəni Konqres və ya başqa bir qurum özünə ayrılan büdcədə hansısa istiqamətlərdə xərclər həyata keçirə bilər. ABŞ-da Ermənistana ayrılacaq maliyyə yardımı ilə bağlı səslənən iddiaları necə dəyərləndirmək olar?
Ekspert Aqşin Əliyevin sözlərinə görə, ABŞ-ın Ermənistandakı Səfirliyinin toxunduğu məqamlarda həqiqət payı var: “Bunu maliyyələşmənin prinsiplərinə aid edə bilərik. ABŞ Konstitusiyasına uyğun olaraq, həmin ölkənin dövlət qurumları ölkənin maraqlarının təmin olunması üçün zəruri bildikləri istiqamətlərə pul xərcləyə bilərlər. Ancaq əvvəllər Ermənistana ayrılan yardım bu üsulla həyata keçirilmirdi. ABŞ Prezidenti Donald Tramp Konqres tərəfindən təsdiq olunan dövlət büdcəsini imzaladığı zaman Ermənistana birbaşa maliyyə yardımının ayrılacağına dair müddəaya rast gəlinmir. Bu yenilik əvvəlki prezidentlərin dönəmindən fərqlənirdi. Yayılan məlumatda bildirilir ki, ABŞ Gürcüstan və Ukraynadan fərqli olaraq, Ermənistana maliyyə yardımı etməyəcək. Qeyd edək ki, 2017-ci ildə ABŞ tərəfindən Ermənistana edilən maddi yardım 2016-ci ilə nisbətən 3 dəfə azalıb. 2016-ci ildə rəsmi İrəvan 20,4 milyon dollar yardım almışdısa, 2018-ci ildə bu rəqəmin 6,2 milyon dollar olacağı gözlənirdi. Lakin təsdiq olunan dövlət büdcəsinə əsasən, ABŞ Ermənistana ümumiyyətlə maliyyə yardımı ayırmayacaq. Maliyyə yardımının azaldılması belə konkret rəqəmlərdə öz əksini tapıb. ABŞ Konqres xəttilə 58 milyon artıq qalan vəsaiti Avropa və Asiya ölkələrində xərcləməyi nəzərdə tutur. Ola bilsin ki, dilənməyə öyrənən Ermənistana da orda qəpik-quruş həcmində bir yardımın ayrılması nəzərdə tutulsun. Bu heç də o anlama gəlmir ki, aldıqları dilənçi payı onların ABŞ-la münasibətlərinin yüksək səviyyədə olduğuna dəlalət edir. Tramp hakimiyyətə gələndən sonra ABŞ-ın ermənilərə və Ermənistana münasibətində kardinal dəyişiklik nəzərə çarpır. Bunun da səbəbi seçkiqabağı mərhələdə erməni diasporunun Tramp əleyhinə apardığı kampaniya ilə bağlıdır. Son illər ərzində Ermənistana olunan yardımın həcmindəki dəyişiklik bu münasibətin bariz göstəricisi sayıla bilər”.
Məhəmmədəli QƏRİBLİ
