Xəzər Teyyublu: "Bu görüşdən fövqəladə nəsə gözləmirəm"
Azərbaycan və Ermənistanın nümayəndə heyəti AŞPA-nın sədri Pedro Aqramuntun təşəbbüsü ilə görüş keçirəcək. Bu barədə Ermənistanın AŞPA-dakı heyətinin rəhbəri, Ermənistan parlamentinin vitse-spikeri Ermine Naqdalyan bəyan edib. Onun sözlərinə görə, hər iki heyət bu görüşün keçirilməsinə ilkin razılıq verib.
"Bu ilkin razılıqdır, Aqramunt hələ addımları planlamalıdır ki, görüş reallaşsın. İstənilən halda, biz ilkin razılığımızı vermişik", - E.Naqdalyan bildirib.
Görüşün mövzusu AŞPA-nın plenar iclaslarında Qarabağ münaqişəsinə dair nümayəndə heyətlərinin bəyanatlarıdır.
Belə bir görüşün keçirilməsinin sülh danışıqları prosesinə hansısa formada təsiri ola bilərmi?
Klassik Xalq Cəbhəsi Partiyasının sədr müavini Xəzər Teyyublu qəzetimizə açıqlamasında bildirdi ki, AŞPA-da təmsil olunan Azərbaycan və Ermənistanın nümayəndə heyətlərinin görüşü tərəflərin öz istəyilə baş tutmur:
"Bu təşəbbüs AŞPA-nın sədri Pedro Aqramuntdan gəlib. Bilirsiniz ki, orada təmsil olunan nümayəndə heyətləri arasında münasibətlər gərgin olur. Çünki hər bir nümayəndə heyəti öz dövlətinin mövqeyini dəstəkləyir və bunun da nəticəsində onlar arasında gərgin diskussiyalar yaşanır. Hesab edirəm ki, qurum sədri bu cəhdi öz vəzifə öhdəliyindən irəli gələrək edir. Ancaq inanmıram ki, belə bir formatda baş tutacaq görüşün sülh prosesinə təsiri olsun. Çünki Ermənistan ali dövlət rəhbərliyi səviyyəsində danışıqlardan yayınırsa, hansısa deputat fraksiyasından nə gözləmək olar? Yəqin ki, bizim nümayəndə heyəti, formal da olsa, görüşdə iştirak edəcək. Çünki biz sülh danışıqlarından heç vaxt yayınmamışıq. Ancaq bu görüşdən fövqəladə nəsə gözləmirəm".
Məhəmmədəli QƏRİBLİ