Akif Nağı: "Bunun nə dərəcədə real olmasını proseslərin gedişi zamanı görəcəyik"
Ermənistan silahlı qüvvələrinin Azərbaycanın işğal edilmiş ərazilərində qanunsuz mövcudluğu münaqişə zonasında gərginliyin əsas səbəbi və münaqişənin siyasi həllinə başlıca maneə olaraq qalır.
Aprel gərginliyi aydın şəkildə xatırlatdı ki, Ermənistan və Azərbaycan qoşunlarının təmas xəttindəki bugünkü vəziyyət təhlükəlidir və istənilən vaxt gözlənilməz nəticələrə gətirib çıxaracaq potensiala malikdir. Bu sözləri Azərbaycanın xarici işlər naziri Elmar Məmmədyarov ATƏT-in 23-cü Nazirlər Şurasında çıxışı zamanı bildirib. Nazir deyib: "ATƏT ərazisində həll edilməmiş silahlı münaqişələr və böhranlar, Avropada və ondan kənarda terror hücumlarının yeni dalğası və münaqişələr nəticəsində insanların genişmiqyaslı məcburi köçü sülh və təhlükəsizliyə təhlükə yaratmaqda davam edən problemlər sırasındadır və təxirəsalınmaz tədbirlərin görülməsini tələb edir.
Təqdirəlayiq haldır ki, Ermənistan-Azərbaycan, Dağlıq Qarabağ münaqişəsində status-kvonun qeyri-davamlılığına və onun dəyişməli olmasına dair ATƏT çərçivəsində yekdil mövqe mövcuddur. Azərbaycan hazırkı status-kvonun dəyişməsində ən maraqlı tərəfdir. Bu xüsusda, biz Vyana və Sankt-Peterburqdakı yüksək səviyyəli substantiv müzakirələri doğru istiqamətdə atılmış müsbət addımlar kimi qiymətləndiririk. Bu məsələdə göstərdiyi səylərə görə həmsədr dövlətlərə, xüsusilə Rusiya Federasiyasının prezidenti Vladimir Putinə təşəkkür edirik. Biz bu fürsəti davam etdirməli və həmin görüşlərdə əldə olunmuş razılaşmaları gecikdirmədən konkret tədbirlərə çevirməliyik. Biz ATƏT və Minsk Qrupunun bu məsələdə fəal rol oynamasını gözləyirik".
E.Məmmədyarov qeyd edib ki, siyasi müstəvidə əsaslı konkret nəticələr vəziyyəti köklü şəkildə dəyişəcək. Ermənistan silahlı qüvvələrinin Azərbaycanın işğal edilmiş ərazilərindən çıxarılması, regional nəqliyyat və kommunikasiya xətlərinin bərpa edilməsi və müvafiq təhlükəsizlik tədbirlərini təmin edərək məcburi köçkünlərin öz doğma yurdlarına təhlükəsiz və şərəfli qayıdışından başlamaqla münaqişənin fəsadlarının mərhələli şəkildə aradan qaldırılması münaqişə dinamikasının dəyişməsinə və regionda ümumi təhlükəsizlik mühitinin əhəmiyyətli dərəcədə yaxşılaşmasına gətirib çıxaracaq. Bu yanaşma BMT Təhlükəsizlik Şurasının müvafiq qətnamələrinə əsaslanır və xüsusilə 1994-cü il Budapeşt Sammitinin qərarı daxil olmaqla, ATƏT-in qərarlarında təsdiq olunub.
Xarici işlər naziri məcburi köçkünlərin öz doğma yurdlarına təhlükəsiz və şərəfli qayıdışı dedikdə necə prosesi nəzərdə tutur?
Qarabağ Azadlığı Təşkilatının sədri Akif Nağı qəzetimizə açıqlamasında bildirdi ki, bu ifadələri konkret şərh etmək çətindir: "Yəni əsas məsələnin mahiyyətinə fikir vermək lazımdır. Ola bilər ki, bu sayaq ifadələri nazirimiz emosional vəziyyətdə işlədib. Yəni bu duyğusal bir termindir. Ancaq haqlı ifadə olunub. Dağlıq Qarabağ və ətraf rayonlara qayıtmaq həmin köçkünlərin təməl haqqıdır. Təbiidir ki, bu proses təhlükəsizlik təmin olunmaq şərtilə həyata keçiriləcək. Hətta mən eşitdiyimə görə, Ermənistandan olan qaçqınların da öz doğma yurdlarına qayıtması ətrafında müzakirələr var. Prosesin hansı şəkildə getməsinin detalları bizə bəlli deyil. Həm də təhlükəsizliyin kim tərəfindən təmin olunacağı haqda məlumatsızıq. Ancaq ATƏT həmsədrlərinin son bəyanatında yol xəritəsinə bənzər bir fikirlər yer alıb ki, bunun da nə dərəcədə real olmasını proseslərin gedişi zamanı görəcəyik".
Məhəmmədəli QƏRİBLİ