Radikal Suriya yaraqlıları Rusiyanın öz üstünə yeriməyə hazırlaşır
Rusiyanın İŞİD-dən başqa digər qruplaşmaları vurduğuna dair şok iddia çıxdı
Şimal qonşumuzun Suriyada başladığı genişmiqyaslı hərbi əməliyyatların təsir coğrafiyası genişlənməkdə davam edir. Artıq terrorçuların Rusiya hərbçilərinin aviazərbəsindən yayınmaq üçün İordaniyaya, Türkiyəyə keçməyə çalışması barədə müxtəlif məlumatlar səslənir. Belə vəziyyət bütün Yaxın Şərqdə gərgin vəziyyətin yaranmasına rəvac verəcək.
Bu arada "ən-Nüsra" terror təşkilatının lideri Əbu Məhəmməd əl Qolani bəyan edib ki, Rusiyanın sünnilərə zərbə endirməsinə cavab olaraq, ələvilərə qarşı hücumları artıracaqlar. Onun sözlərinə görə, Rusiya İŞİD-dən başqa bütün qruplaşmalara hücum edir. "Rusiya Şərqə yeni səlib yürüşü təşkil edib. Suriya müharibəsi rusları məcbur edəcək ki, Əfqanıstanda qarşılaşdıqları dəhşətləri unutsunlar". Qeyd edək ki, "ən-Nüsra" "Əl Qaidə"nin Suriya qanadıdır. Beləliklə, baş verənlər sünni-şiə qarşıdurmasını da gücləndirəcək.
Bundan əlavə, İŞİD tərəfdarlarının Rusiyaya zərbə vurmaq üçün Qafqazda da vəziyyəti gərginləşdirməyə çalışacağı tamamilə gözləniləndir. Gürcüstanın "Kviris-Palitra" qəzetinə müsahibəsində "Əsəd ül Şam" briqadasının liderlərindən olan Əbdürrəhman Şişani da Qafqazda kifayət qədər tərəfdarlarının olduğunu bildirir.
Şişani, həmçinin, Suriyada çeçen döyüşçülərinin sayının çox olduğunu qeyd edib: "Suriyada çeçen anlayışı Rusiyaya düşmən deməkdir. Ona görə də biz özümüzü "Şişani" adlandırırıq. Biz deyirdik ki, Suriyadan mütləq Rusiyaya gedəcəyik, lakin Moskvanın özü bura gəldi. Rusiya buraya quru qoşunlarını göndərəcəksə, o zaman biz onlara Qroznını yenidən yaşadacağıq". Rusiya isə həqiqətən də Suriyaya quru qoşunlarının yeridilməsini düşünür. Məhz belə bir vaxtda
Rusiyanın Suriyaya ekipajı ilə birlikdə TOS-1A "Solntsepek" ağır odsaçan sistemlərini göndərdiyinə dair sübutlar yayılıb. Məlumatlara əsasən, Suriyaya göndərilən "Solntsepek" odsaçan sistemləri Rusiya ordusunun 20-ci əlahiddə radiasiya, kimyəvi və bioloji müdafiə alayına aiddir. Sentyabrın ikinci yarısından etibarən bu alayda fəallıq qeydə alınıb. Suriyaya göndərilmək üçün hərbi texnikanın, zabitlərin və müqavilə əsasında xidmət keçən hərbçilərin hazırlıqları başlayıb. T-90 tanklarının şassisi üzərində yerləşən odsaçan sistemlərin Suriyaya hərbi gəmilərlə daşındığı bildirilir. Ehtimal edilir ki, bu, Rusiyanın Suriyada quru əməliyyatlarına başlamaq planları ilə bağlıdır. "Solntsepek" odsaçan sistemləri dəhşətli dağıdıcı gücə malikdir və "cəhənnəm silahı" kimi tanınır. Amma Rusiyanın Suriyada belə hərbi fəallığı Qafqaz üçün ciddi təhdid yaradır. Yaxın Şərq üzrə mütəxəssis Vasili Papava bildirir ki, Rusiyanın Suriya hökumətinə birbaşa hərbi dəstək verməsi Qafqaz ölkələri üçün müəyyən risqlər yarada bilər. "Məlum olduğu kimi, Suriyaya Əsəd hökumətinə qarşı vuruşmağa təxminən 200-300 Gürcüstan vətəndaşı yollanıb. Onların arasında etnik gürcülər yoxdur, bu şəxslər əsasən çeçen-kistinlilərdir. İndiyə qədər yaraqlıların yaxın gələcəkdə Suriya hökumətini devirmək üçün az da olsa ümidləri var idisə, Rusiyanın müharibəyə daxil olmasından sonra bu ümidlər, demək olar ki, sıfıra enib. Onlar hazırda seçim qarşısında qalıblar: ya bu müharibə alovunda məhv olmalı, ya da hakimiyyət orqanlarına təslim olmalıdırlar". Onun sözlərinə görə, üçüncü bir yol da var - geriyə, Qafqaza qayıdaraq "Rusiyadan intiqam almağa" cəhd etmək yolu və terrorçuların bu yoldan da istifadə edə biləcəkləri istisna deyil. "Bununla əlaqədar Gürcüstan rəhbərliyi seçim qarşısında qalır: sərhəd nəzarət məntəqələrində nəzarətin gücləndirilməsi və artırılması, həmçinin xüsusi xidmət orqanları kanalları vasitəsilə informasiya mübadiləsini həyata keçirmək üçün Ermənistan və Azərbaycanla bu sahədə əməkdaşlığın qurulması". Xatırladaq ki, bu günlərdə Rusiyanın məşhur "Soverşenno sekretno" nəşrinin araşdırmasında baş verənlərin Qafqazda da öz təsirini tapdığı bildirilib: "İŞİD faktiki olaraq Şimali Qafqazda özünə yer edib. İŞİD bütövlükdə Qafqazı ələ keçirmək üçün mübarizə aparır. İndi "Qafqaz əmirliyi"nə daxil olan çox az sayda qruplaşma var ki, İŞİD-i qəbul etmir. Lakin o dəqiqdir ki, indi "Qafqaz əmirliyi" bütövlükdə İŞİD-in nəzarətindədir".Nəşr yazır ki, hazırda İŞİD tərkibində minlərlə rusiyalı və qafqazlı döyüşçü vuruşur. "E" analitik mərkəzinin məlumatına görə, Rusiya Daxili İşlər Nazirliyinin ekstremizmlə mübarizə idarəsinin hərəkətə keçməsindən sonra Şimali Qafqazdan İŞİD sıralarına qoşulanların sayı artıb. Mərkəzin analitiki Arsen Bidov bildirir: "Bu fonda Qafqaz gəncləri arasında qəti fikir formalaşdı ki, Suriya və İraqa gedərək cihada qoşulanlar haqlıdır. Hesab edirəm ki, bu ilin sonuna kimi Şimali Qafqazdan Suriyaya gedənlərin sayı artacaq". Mərkəzin digər analitiki Yuri Batırov hesab edir ki, İŞİD gəncləri pul qarşılığında da öz sıralarına qatır: "İŞİD-in malik olduğu maliyyə imkanları böyükdür. Həm ələ keçirdikləri neft quyularından, həm narkoticarətdən, həm də Səudiyyə Ərəbistanı və Küveytdən gələn pullar hesabına qruplaşmanın 2 milyarddan artıq vəsaitə malik olduğu deyilir. Bu pul kasıblığın daşını atmaq istəyən insanların cəlb edilməsi üçün yetərincədir".
Yuri Batırov daha bir təhlükədən xəbər verir. Onun sözlərinə görə, "Qafqaz əmirliyi" ayrıca qol olanda burada əsasən çeçenlər və ərəblər təmsil olunurdu: "Yəni təhlükənin kimlər tərəfindən gəldiyi məlum idi. İndi isə İŞİD-in nəzarətinə keçir. İŞİD tərkibində isə 80-dən artıq ölkədən gələn döyüşçülər var. Onlar başqa yerdən Rusiya ərazisinə asanlıqla keçə və istədiklərini edə bilərlər. Bunu müəyyənləşdirmək çətin olacaq". "Soverşenno sekretno" qeyd edir ki, artıq İŞİD Şimali Qafqaza daxil olub və terror qruplaşması bütün Qafqaz üçün təhlükə mənbəyidir. Onu da xatırladaq ki, İŞİD-in məşhur çeçen lideri Ömər Şişaninin Şimali Qafqaza təsir imkanları çoxdur. Rusiyanın cənubundan Suriyaya gedənlər məhz onun rəhbərliyi altında hərəkət edir. Bütün bunlar Şimali Qafqazda vəziyyətin gərginləşəcəyindən xəbər verir.
Tahir TAĞIYEV
