Əli Mustafa: “Paşinyan ona görə belə sərt danışır ki, Ermənistan KTMT-dən rəsmən xaric edilsin”
Ermənistan baş naziri Nikol Paşinyan iyunun 11-də bildirib ki, Kollektiv Təhlükəsizlik Müqaviləsi Təşkilatı (KTMT) İrəvanda hərbi alyansdan çıxarılmasına qərar verərsə, ölkənin bu addımı qəbul etməkdən başqa yolu qalmayacaq.
Paşinyan açıq bəyan edib ki, üzvlük haqqını ödəməyəcəyik, KTMT istəyirsə xaric etsin: “Bilirəm ki, KTMT-dən xaric edilmə mexanizmi mövcuddur və o işləyir. Üzv dövlətlər Ermənistanı xaric etmək qərarına gəlsələr, biz bu qərarı nəzərə almağa məcburuq, başqa edəcəyimiz bir şey yoxdur”.
Ermənistanın quruma üzvlük haqqı ödəyib-ödəməyəcəyi ilə bağlı suala Paşinyan qəti cavab verib: “Biz heç nəyi dəyişməyəcəyik”.
Görünən odur ki, seçkidən sonra Paşinyan KTMT məsələsində daha cəsarətli danışır və sanki bu blokdan birdəfəlik xilas olmaq istəyir.
Sözügedən məsələ ilə bağlı fikirlərini baki-xeber.com-la bölüşən siyasi şərhçi Əli Mustafa hesab edir ki, Ermənistan hər keçən gün KTMT-dən daha çox uzaqlaşır və seçkilərdən sonra daha cəsarətlə bu məsələnin üzərinə gedir: “Çünki seçkilərə qədər müəyyən narahatçılıqlar var idi, Rusiyanın nəyəsə əl atacağı qorxusu müəyyən qədər var idi. İndi isə artıq bu yöndə çəkinmə yoxdur. Çünki Rusiya seçki kampaniyası dövründə nə mümkündürsə onu etdi. Yəni nə olubsa artıq arxada qalıb. Odur ki, Paşinyan özünün seçdiyi siyasi kursa sadiqliyini belə ifadə edir. Düzdür, onlar sərt formada gedirik də demirlər, amma elə bir kurs seçiblər ki, Ermənistanın KTMT-də qalması ilə getməsi arasında elə bir fərq yoxdur. Üstəlik, maraqlıdırlar ki, məhz KTMT özü rəsmən qərar verərək Ermənistanı oradan çıxarsın. Paşinyan ona görə belə sərt danışır ki, Ermənistan KTMT-dən rəsmən xaric edilsin. Əslində Ermənistana KTMT lazım deyil. Ermənistanı hansı ölkə hücum edəcək ki? Ermənistan illər əvvəl KTMT-dən alacağını alıb. İndi ona ehtiyacı yoxdur. KTMT üzv ölkələri Rusiyanın orbitində saxlamaq üçün bir təsir vasitəsidir. Bu təşkilat Ermənistanın Avropa ilə yaxınlaşmasına mane olur. Ona görə Paşinyan istəyir ki, KTMT-dən xilas olsun. İstisna etmirəm ki, Ermənistan MDB-dən də çıxacaq. Avrasiya İqtisadi İttifaqı Ermənistan üçün hələ ki, sərfəli bir qurumdur. Ancaq vaxt gələr Aİİ-ni də tərk edəcəklər. Bir məqamı nəzərə almaq lazımdır ki, Ermənistan kiçik ölkədir. 3 milyon əhalisi olan ölkə üçün Rusiyadan qopmaq fəlakət deyil. Lazım gəlsə Qərb bu ölkənin iqtisadi baxımdan himayə edə bilər. Hər halda anlaşılan odur ki, Ermənistan Rusiyadan daha çəkinmir. Paşinyan növbəti dəfə xalqın etimadını qazanaraq seçkilərdə qalib gəlib. Faktiki olaraq seçkilərdə Paşinyanın rəqibi Rusiya olub və onu məğlub edib. Çünki əksər müxalif qüvvələr seçkilərdə məhz Rusiyanın maraqlarını təmsil edirdilər. Bu baxımdan Ermənistanın KTMT-dən çıxması qaçılmazdır”.
Vidadi ORDAHALLI
