Rusiya Ermənistandan kənd təsərrüfatı məhsullarının idxalına yeni məhdudiyyətlər tətbiq edib. “Rosselxoznadzor” bildirib ki, iyunun 12-dən Ermənistandan göndərilən “karantin nəzarətində olan məhsulların” Rusiyaya idxalına qadağa qoyulur. Qurumun açıqlamasına görə, 2026-cı ilin mayından Ermənistanın bəzi karantin nəzarətində olan məhsullarının idxalı mərhələli şəkildə məhdudlaşdırılıb, iyunda isə Ermənistandan gətirilən qoz-fındıq, qurudulmuş şaftalı və qurudulmuş pomidorda kapra böcəyi ilə yoluxmanın üç halı aşkar edilib.
Avrasiya İqtisadi İttifaqının karantin nəzarətinə aid məhsullar siyahısında təxminən 130 məhsul növü yer alır. Bunlara kənd təsərrüfatı məhsullarının əksəriyyəti, un, bitkilər, ağac materialları, heyvan yemi, tekstil sənayesi üçün xammal və digər məhsullar daxildir. Bundan əvvəl Rusiya hakimiyyəti İrəvanın Avropa İttifaqı ilə yaxınlaşmasına cavab olaraq Ermənistandan Rusiyaya müxtəlif tərəvəz və meyvələrin, balıq və balıq məhsullarının, güllərin, “Cermuk” mineral suyunun və spirtli içkilərin idxalını qadağan edib. Ermənistanın baş naziri Nikol Paşinyan isə bu addımlara cavabında bəyan edib ki, İrəvan Rusiyaya idxalı qadağan edilən məhsulları Avropa İttifaqı bazarına çıxaracaq. Paşinyan onu da bildirib ki, hökumət Rusiyanın son qadağalarından zərər çəkmiş və haqsızlıqla üzləşmiş bizneslərə subsidiya ayıracaq. Baş nazir deyib ki, alternativ bazarlara ixrac məsələsi ilə bağlı biznes nümayəndələri ilə görüş keçirilib və razılaşmalar əldə edilib: "Bəzən keyfiyyət standartlarına cavab verməyən məhsullar olur. Biz həmin iş adamlarına məhsullarını yeni standartlara uyğunlaşdırmaqda dəstək verəcəyik. Əgər başqalarına qarşı ədalətsizlik olubsa – yəni ixrac edilməli olduğu halda, ixrac olunmayan məhsullar varsa – onlar üçün də dəstək və subsidiya proqramları həyata keçirəcəyik". Bundan əvvəl isə Rusiyanın xarici işlər naziri Sergey Lavrov Ermənistana Avropa İttifaqı ilə Avrasiya İqtisadi İttifaqı arasında seçim etməyin vacibliyini xatırladıb. Nazirin sözlərinə görə, Ermənistanda Avropa İttifaqına üzv olmaq niyyətini əks etdirən qanun artıq qəbul olunub və bu məsələni praktiki mərhələyə keçirib: "Belə bir vəziyyətdə İrəvan aydın və operativ qərar verməlidir". Lavrov əlavə edib ki, Moskvanın Ermənistanın gələcək inteqrasiya seçimi ilə bağlı mövqeyi erməni tərəfinə açıq və birmənalı şəkildə çatdırılıb. Rusiya tərəfi İrəvandan bu mövqeyi nəzərə alaraq konkret addımlar gözlədiyini bildirib.
Samirə SƏFƏROVA
