Ermənistandakı seçkilərdən sonra yenidən baş nazir seçilən Nikol Paşinyan regional sülh və normallaşma mesajları verərək, Ankara ilə İrəvan arasındakı prosesi sürətləndirib. Bu fikirlər Türkiyənin “Yeni Şafak” qəzetində yer alıb. Nəşr daha sonra yazır: “Paşinyanın Türkiyə ilə bağlı müsbət açıqlamalarından sonra diqqət iki ölkə arasında sərhəd keçid məntəqələrinin açılması planlaşdırılan məsələyə yönəlib. Seçkilərdən əvvəl nəzərdə tutulan, lakin sonrakı inkişaflar səbəbindən təxirə salınan bu addımların qarşıdakı dövrdə yenidən gündəmə gələcəyi gözlənilir. Məlumatlara görə, iki ölkə arasında diplomatik təmaslar sürətlə inkişaf edir və məqsəd normallaşma yönündə konkret addımlar atmaqdır.
Əvvəlcə İğdırdakı “Əlican” sərhəd keçid məntəqəsinin qarşılıqlı keçidlər üçün açılması planlaşdırılır. Ermənistan tərəfində hazırlıqların başa çatdığı bildirilsə də, indi məqsəd Türkiyə tərəfində işləri qısa müddətdə yekunlaşdırmaqdır. Beləliklə, qarşılıqlı keçidlərin və avtomobil yolu ilə ticarətin yay aylarında başlayacağı gözlənilir. Qarsdakı “Akyaka” sərhəd keçid məntəqəsinin açılması üçün də işlər davam edir. Bu sərhəd keçid məntəqələrinin aktivləşdirilməsi ilə iki ölkə arasında nəqliyyat və ticarət şəbəkəsinin yenidən formalaşacağı gözlənilir. Sərhədlərin açılması ilə Türkiyə ilə Ermənistan arasında uzun illərdir Gürcüstan vasitəsilə həyata keçirilən dolayı ticarətdən üçüncü ölkələrin kənarlaşdırılacağı gözlənilir. Hazırda 300-350 milyon dollar dəyərində qiymətləndirilən ticarət hazır geyim, kimyəvi məhsullar, qida və emal olunmamış qiymətli metallara yönəlib. Birbaşa ticarətin başlanması logistika xərclərini azaldacaq, məhsulların bazara daha tez çatmasına imkan verəcək və ikitərəfli ticarət həcmini qısa müddətdə 1 milyard dollara çatdıracaq. Bu prosesin ,həmçinin, nəqliyyat dəhlizlərinin genişlənməsinə və Cənubi Qafqazda iqtisadi inteqrasiyanın güclənməsinə töhfə verəcəyi gözlənilir”.
Tahir TAĞIYEV
