Məlum olduğu kimi, prezident İlham Əliyevin 25 may 2026-cı il tarixli sərəncamı ilə təsdiq edilmiş "Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı"nın müzakirəsi məqsədilə ölkəmizdə silsilə regional müşavirələrə start verilir. Kənd Təsərrüfatı Nazirliyinin məlumatına görə, müşavirələr Mərkəzi Aran, Dağlıq Şirvan, Gəncə-Daşkəsən, eləcə də Qarabağ və Şərqi Zəngəzur iqtisadi rayonlarını əhatə edir. Azərbaycan prezidentinin tapşırığı ilə keçirilən müşavirələrdə prezidentin köməkçiləri, aidiyyəti dövlət qurumlarının rəhbərləri, səlahiyyətli nümayəndələr, yerli icra hakimiyyəti orqanlarının rəhbərləri, fermerlər, sahibkarlar və digər maraqlı tərəflər iştirak edəcək.
Regional müşavirə çərçivəsində Dövlət Proqramının əsas məqsəd və prioritetləri, aqrar sahədə nəzərdə tutulan yeni dəstək mexanizmləri, su və torpaq ehtiyatlarından səmərəli istifadə, aqrar emal və logistika infrastrukturunun inkişafı, eləcə də fermerlərin müasir aqrar xidmətlərə çıxışının genişləndirilməsi, bu istiqamətdə dövlət dəstəyi və digər məsələlər müzakirə olunacaq. Bu görüşlər dövlət başçısının sədrliyi ilə mayın 25-də kənd təsərrüfatı məsələlərinə həsr olunmuş müşavirədə verilmiş tapşırıqların icrası və Dövlət Proqramında nəzərdə tutulan tədbirlərin regionlarda əlaqələndirilmiş, çevik və səmərəli həyata keçirilməsinin təmin olunması məqsədilə sistemli şəkildə təşkil edilir. Dövlət Proqramının icrası ilə bağlı regional müşavirələrin ölkənin digər iqtisadi rayonlarında da mərhələli şəkildə keçirilməsi nəzərdə tutulur. Bu Dövlət Proqramının ən mühüm əhəmiyyətlərindən biri aqrar sahədə sistemli və uzunmüddətli inkişaf üçün strateji yol xəritəsi rolunu oynamasıdır. Sənəddə kənd təsərrüfatının bütün əsas istiqamətləri – bitkiçilik, heyvandarlıq, balıqçılıq, akvakultura və emal sənayesi üzrə qarşıya konkret hədəflər qoyulub. Bu yanaşma istehsal zəncirinin bütün mərhələlərinin əlaqəli şəkildə inkişafına imkan yaradacaq. Proqramın digər mühüm əhəmiyyəti ərzaq təhlükəsizliyinin gücləndirilməsidir. Son illərdə dünyada baş verən geosiyasi və iqtisadi proseslər göstərir ki, hər bir dövlət öz daxili istehsal potensialını artırmalı, strateji ərzaq məhsullarına olan tələbatı mümkün qədər yerli istehsal hesabına ödəməlidir. Dövlət Proqramı bu istiqamətdə buğda, pambıq, heyvandarlıq və digər prioritet sahələrin inkişafını nəzərdə tutur ki, bu da ölkənin idxaldan asılılığının azalmasına xidmət edəcək. Sənəd kənd yerlərində məşğulluğun artırılması və əhalinin sosial rifahının yüksəldilməsi baxımından da böyük əhəmiyyət daşıyır. Yeni istehsal və emal müəssisələrinin yaradılması, aqrar sahibkarlığın dəstəklənməsi və müasir texnologiyaların tətbiqi minlərlə yeni iş yerinin açılmasına şərait yaradacaq. Nəticədə kənd əhalisinin gəlirləri artacaq, regionların sosial-iqtisadi inkişafı sürətlənəcək. Dövlət Proqramında balıqçılıq və akvakultura sektorunun ayrıca istiqamət kimi müəyyənləşdirilməsi xüsusi diqqətə layiqdir. Dünyada sürətlə inkişaf edən bu sahə Azərbaycanda da yeni iqtisadi imkanlar yarada bilər. Müasir akvakultura təsərrüfatlarının yaradılması həm daxili bazarın keyfiyyətli balıq məhsulları ilə təmin olunmasına, həm də ixrac potensialının genişlənməsinə imkan verəcək. Proqramın mühüm üstünlüklərindən biri də emal sənayesinin inkişafına xüsusi önəm verilməsidir. Aqrar məhsulların yalnız xammal kimi deyil, emal olunmuş şəkildə bazara çıxarılması daha yüksək gəlir əldə etməyə, məhsul itkilərini azaltmağa və ixrac imkanlarını genişləndirməyə şərait yaradır. Bu isə kənd təsərrüfatında əlavə dəyərin artırılmasına və qeyri-neft sektorunun güclənməsinə xidmət edir. Ümumiyyətlə, 2026–2030-cu illər üçün Dövlət Proqramı Azərbaycanın aqrar sektorunun modernləşdirilməsi, ərzaq təhlükəsizliyinin möhkəmləndirilməsi, ixrac imkanlarının genişləndirilməsi və kənd əhalisinin rifahının yüksəldilməsi baxımından strateji əhəmiyyət daşıyır.
Ramil QULİYEV
