ABŞ prezidenti Tramp İrana yeni hücumların ləğv olunduğunu elan edib.
"İran İslam Respublikası ilə müzakirələrin İran rəhbərliyinin ən yüksək səviyyələrinə çatdırıldığı və təsdiqləndiyinə əsaslanaraq , Amerika Birləşmiş Ştatlarının Prezidenti olaraq, bu axşam İrana qarşı planlaşdırılan hava hücumlarını və bombardmanları ləğv etdim" – deyə Trampın sosial mediada paylaşdığı açıqlamada bildirib.
O da bildirilir ki, müzakirələr və yekun razılaşmalar həm konseptual, həm də ətraflı şəkildə ABŞ, İsrail, Səudiyyə Ərəbistanı, BƏƏ, Qətər, Türkiyə, Pakistan, Bəhreyn, Küveyt, İordaniya, Misir və digərləri də daxil olmaqla bütün müvafiq tərəflər tərəfindən təsdiqlənib .
Trampın "İrana qarşı bombardmanı dayandırdım" açıqlamasından sonra razılaşma xəbəri gəlib. ABŞ prezidenti İranla sazişin tamamlanmaq üzrə olduğunu vurğulayaraq, müqavilənin ətraflı mətni üzərində son işlərin aparıldığını bildirib.
"(İranla razılaşma ilə bağlı) sənədlərin yekunlaşdırılması prosesindəyik. Bu proses yaxın bir neçə gün ərzində başa çatacaq və imzalanma mərasimi, bəlkə də Avropada keçiriləcək" – deyə o, qeyd edib.
Tramp Türkiyə də daxil olmaqla bir çox regional ölkənin liderləri ilə danışdığını və müzakirələrin davam etdiyini bildirib.
İran lideri Müctəba Xameneinin razılaşmanı təsdiqləyib-təsdiqləmədiyinə gəlincə, Tramp "Başa düşdüyüm qədəri ilə cavab bəlidir" deyə bildirib.
Hörmüz boğazının açılacağını və ABŞ-ın İrana qarşı dəniz blokadasının müqavilə imzalandıqdan sonra dərhal ləğv ediləcəyini vurğulayan Tramp , "(Saziş) tezliklə, bəlkə də bu həftə sonu imzalanacaq" deyib.
İran Xarici İşlər Nazirliyindən isə fərqli açıqlama gəlib: "Razılaşma ilə bağlı (ABŞ Prezidenti Tramp tərəfindən) ortaya atılan məqamlar tamamilə spekulyativdir və hələ qəti şəkildə həll olunmamış bir məsələdir".
Tahir TAĞIYEV
