Elşən Manafov: “Bu, onu göstərir ki, Ermənistan Konstitusiyanı dəyişməyə hazır görünmür”
Ermənistanın yeni konstitusiyasının mətni hələ dərc olunmağa hazır deyil, çünki Ədliyyə Nazirliyi digər rəsmi qurumlardan rəy və qeydlərin gəlməsini gözləyir. Bu barədə Ermənistanın ədliyyə naziri Srbuhi Qalyan məlumat verib.
Nazirin sözlərinə görə, sənədin dərc olunması məsələsi hakim “Mülki Müqavilə” partiyasının idarə heyətinin iclasında müzakirə olunub. O qeyd edib ki, daxil olan bütün rəylərin ümumiləşdirilməsi üçün əlavə vaxt tələb olunur: “Yaxın vaxtlarda, yəni rəylərin toplanması üçün bizə lazım olan bir-iki həftəlik ümumiləşdirmə prosesindən sonra daha bir-iki müzakirə keçiriləcək. Bundan sonra mətnin dərc olunmağa hazır olub-olmadığı bəlli olacaq”.
Axı Qalyan hələ 2026-cı ilin martında yeni Konstitusiya mətninin hazırlanmasının başa çatdığını bildirmişdi. O zaman sənədin ayın sonuna qədər dərc ediləcəyini də açıqlayıb. Bütün bunlar o qənaətə gəlməyə əsas verirmi ki, hakimiyyət konstitusiya ilə bağlı dəyişikliklər məsələsini yubadacaq?
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafov buna bir neçə prizmadan yanaşdı: “Ermənistanda hakimiyyət rəsmisinin konstitusiya mətni ətrafında verdiyi ziddiyyətli açıqlamalar, parlament seçkilərindən sonra atılacaq addımların doğura biləcəyi məsələlərə adekvat qərarlar qəbul etmək istəyindən irəli gəlir. Parlament seçkiləri isə ölkədə siyasi tərəflər arasında qüvvələr nisbətinə gözlənilən nəticələri gətirdi. Seçkilərin nəticələri Paşinyanın “Mülki Müqavilə” partiyasına növbəti dəfə hökuməti formalaşdırmaq üçün legitim mandat və deməli islahatların, habelə Türkiyə və Azərbaycanla münasibətlərdə olan problemlərin nizamlanması üçün kart-blanş vermiş oldu. Paşinyanın formalaşdıracağı hökumət gözləntilərdən fərqli olaraq koalisyon olmayacaq. Bu isə hakimiyyətin monolitliyinin, hüquqi anlamda monolitliyini təsdiq etməklə ona dövlətin daxili və xarici siyasətinin prioritet istiqamətlərini müəyyənləşdirməklə bəlli problemlərin həlli istiqamətində müstəqil addımlar atmağa imkan verəcək. Bununla belə seçkilər Paşinyanın partiyasına Konstitusiyaya əlavə və dəyişikliklərin edilməsi üçün hüquqi səlahiyyətlər vermədiyindən onun hökuməti konstitusiya islahatlarının aparılması ilə baglı məsələlərdə parlamentdə azlığı təmsil edən siyasi qüvvələrlə əməkdaşlığa məhkumdur. Bu isə qarşı tərəfin rəyinin də nəzərə alınması şərtilə bəlli islahatların həyata keçirilməsi zərurətini doğuracaq. Burada bəlli əməkdaşlıq islahatların həyata keçirilməsi proseslərində əyləc mexanizmləri rolunda çıxış edəcək”.
E.Manafovun fikrincə, Ermənistanın geosiyasi durumunun perspektivləri ilə bağlı məsələlərə əks qütbdə yer almış müxalifət bəlli geosiyasi güc mərkəzindən direktivlər alaraq Avropaya inteqrasiya ilə bağlı prosesləri ləngitməyə, regional təhlükəsizliklə bağlı problemlərin həllinə maneələr yaratmağa çalışacaq və deməli "suyu bulandıracaq": “Bu mövqenin sərgilənməsi üçün hüquqi səlahiyyətlər, legitim siyasi əsas da var. Seçkilər Ermənistanda seçkilərə qatılmış seçiıcilərin 35 faizinin Rusiya ilə münasibətlərə önəm vermələrinin hüquqi göstəricisi olmaqla Paşinyana ciddi siqnaldır və o bunu nəzərə almaya bilməz. Digər tərəfdən onu Azərbaycanla münasibətlərdə təslimçilikdə ittiham edən siyasi qüvvələrə onun nüfuzuna xələl gətirə biləcək addımların atılması üçün kart-blanş verir. Bunun üçün mümkündür ki, konyuktur maraqlardan çıxış edərək Paşinyan konstitusiya islahatları ilə bağlı olaylar ətrafında manevrlər edərək prosesləri ləngitməyə çalışacaq. Rusiya ilə gələcək münasibətlərin formatı və xarakteri ətrafında qeyri-müəyyənliyin qaldığı müddətdə Paşinyanın regional təhlükəsizlik problemlərinə ikili konteksdən yanaşacağını istisna etmək olmaz. Bir müddət əvvəl Avropa Parlamentində Azərbaycanın lehinə olmayan qərarın qəbul edilməsi zamanı Paşinyan diplomatiyasının özünü necə aparması belə düşüncələrə əsas verir. Erməni tərəfi belə bir qətnamənin qəbul edilməsini əngəlləyə bilərdi. Rəsmi İrəvan isə Bakının nüfuzuna ziyan gətirəcək növbəti prosedurdan yararlanmaq fürsətini əldən vermək istəmədi. Hazırda sülhün əldə edilmədiyi bir şəraitdə Bakı ilə iqtisadi, ticari münasibətlərin genişləndirilməsi istiqamətində aparılan siyasət Paşinyanı qane edir. Bu konteksdə Azərbaycanla münasibətlərin həlli üçün onun hər şeydə "əlahəzrət vaxta" ehtiyacın olması barədə açıqlamaları geosiyasi güc mərkəzləri ilə münasibətlərin qarşılıqlı maraqlara uyğun müstəvidə saxlanılması hakimiyyətin konyuktur istəkləri baxımından anlaşılandır. Bir sözlə, Ermənistan Konstitusiyanı dəyişməyə hazır görünmür. Ona görə də yeniliklərlə bağlı belə qeyri-müəyyən açıqlamalar verilir”.
Vidadi ORDAHALLI
