Hüseyn İbrahimov: “Paşinyana bağlı olan namizədi Gümrüdə mer seçdirmək asan olmayacaq”
Ermənistan Baş naziri Nikol Paşinyan müşavirədə Gümrünün Ağsaqqallar Şurasına (bələdiyyəsinə) növbədənkənar seçkilərin mümkün qədər tez keçirilməsinin vacibliyini bəyan edib:
“Gümrünün məhəllələrində gördüklərim, açığını desəm, mənim üçün gözlənilməz və sarsıdıcı oldu. Mən təsəvvür edə bilməzdim ki, baş naziri olduğum ölkədə həyətlər bu vəziyyətdə ola bilər. Mən demişdim ki, Gümrüdə növbədənkənar seçkilər mümkün qədər tez keçirilməlidir. Buna qədər isə orada təxirəsalınmaz tədbirlər görməliyik”.
Burada diqqət çəkən məqam odur ki, Gümrü bələdiyyəsi müxalifətin əlində idi. Üstəlik Rusiyanın bazası da ordadır. 2025-ci il oktyabrında hüquq-mühafizə orqanlarının əməkdaşları Gümrü meriyasında axtarışlar aparıblar. Daha sonra aparılan istintaq çərçivəsində səkkiz nəfərin, o cümlədən bələdiyyə sədri Vardan Qukasyan saxlanılıb.
Sözügedən məsələni baki-xeber.com-a şərh edən İdarəçilik Akademiyasının müəllimi, sosioloq Hüseyn İbrahimovun fikrincə, Paşinyan Gümrüdə baş verənlərə xüsusi həssaslıqla yanaşır: “Məsələ ondadır ki, Gümrü Ermənistanın ikinci böyük şəhəridir. V.Qukasyan həbs olunmazdan əvvəl 2025-ci ilin martında Gümrünün meri seçilmişdi. Onun namizədliyini üç müxalifət partiyası dəstəkləyib. O, mer olandan sonra səlahiyyətlərini aşaraq Rusiyapərəst mövqe sərgiləyib. Belə ki, Qukasyan mer seçiləndən sonra Rusiya ilə Belarus modelinə bənzər “birlik dövləti” yaradılmasının tərəfdarı olduğunu bildirib. Aydın məsələdir ki, Paşinyan bütün bunları görməzdən gələ bilməzdi. Birincisi, Gümrü ölkənin ikinci böyük şəhəridir. İkincisi, Türkiyə sərhədinə yaxın ərazidə yerləşir. Üçüncüsü, orada Rusiya hərbi bazası var. Dördüncüsü, Rusiya Gümrü ssenarisini parlament seçkilərində də tətbiq etməyi planlaşdırırdı. Bu və digər səbəblərdən ötən ilin oktyabrında Qukasyan saxlanıldı. Paşinyan gördü ki, qabaqlayıcı tətbirlər görməsə, bu, ona baha başa gələcək və o üzdən, inzibati vasitələrə əl atdı. Ona görə də parlament seçkilərindən sonra orada növbədənkənar mer seçkisi keçirmək və yaranmış vəziyyətdən istifadə edərək öz namizədini qalib etmək istəyir. Çünki “Vətəndaş Müqaviləsi” blokunun qalib gəlməsi onları ruhlandırıb və hesab edirlər ki, indi bunun üçün ən uyğun məqamdır. Bununla əlaqədar regional tərəfdarlarını səfərbər etmək istəyir. Ancaq bunu birmənalı proqnozlaşdırmaq çətindir. Ona görə ki, Gümrüdə həm revanşist qüvvələr, həm də Erməni Kilsəsi ortaq mövqedən çıxış edir. O üzdən, Paşinyana bağlı olan namizədi Gümrüdə mer seçdirmək asan olmayacaq”.
Vidadi ORDAHALLI
