Xaqani Cəfərli: “Ermənistan da KTMT-nin onu öz sıralarından çıxarmasını istəyir”
Rusiyanın xarici işlər naziri Sergey Lavrov bəyan edib ki, Ermənistanın Kollektiv Təhlükəsizlik Müqaviləsi Təşkilatında (KTMT) qalıb-qalmayacağı tezliklə həll edilməlidir. Lavrov bildirib ki, Ermənistan təşkilata üzvlük haqlarını ödəməkdə gecikir. İrəvan toplantıda təmsil olunmayıb.
Rusiya naziri deyib ki, KTMT üzvləri Ermənistanın üzvlük haqlarını ödəməməsinə görə sanksiyaların tətbiqi məsələsini nəzərdən keçirməyə razılaşıblar: “Artıq iki ildən çoxdur ki, Ermənistanın KTMT büdcəsi qarşısında borcu var və bu məsələ KTMT Nizamnaməsində nəzərdə tutulub. Bu gün biz KTMT Nizamnaməsinin müvafiq maddəsinin tətbiqi məsələsinə baxmaq barədə razılığa gəldik”.
İrəvanın niyə pul ödəməməsinə gəlincə Lavrov, həmkarı Ararat Mirzoyanın bununla bağlı son açıqlamasını xatırladıb: “Həmkarım Ararat Samveloviç Mirzoyan KTMT ilə bağlı suala cavabında demişdi: “Biz üzvlük haqlarını ödəmirik, çünki sadəcə olaraq iştirak etmirik”.
Sözügedən məsələni şərh edən politoloq Xaqani Cəfərli hesab edir ki, əslində Ermənistan KTMT-nin onu öz sıralarından çıxarmasını istəyir: “Bu təşkilatın yaradıcısı olan Rusiyanın ərazisi hər gün Ukrayna tərəfindən hərbi zərbələrə məruz qalır, lakin KTMT ölkələri həmin hücumların qarşısını almaq üçün Rusiyaya heç bir yardım göstərmirlər. Onlar hətta Rusiyaya qarşı hücumları pisləməkdən də çəkinirlər. Ermənistanda da bunu görürlər. Eyni zamanda, KTMT üzvlüyünün Ermənistan üçün əlavə problemlər yaratmaq ehtimalı çox yüksəkdir. Buna görə də Ermənistan üzvlük haqlarını ödəmir və təlimlərdə iştirak etmir. Ermənistan faktiki olaraq, rəsmi şəkildə olmasa da, KTMT-ni tərk edib. Üzvlük haqqı ödəməyən və təlimlərdə iştirak etməyən bir dövlətin təşkilatın üzvü kimi təqdim olunması artıq gülüş doğurur. Buna görə də Ermənistanın təşkilatdan çıxarılması məsələsi gündəmə gəlib. Ermənistan da KTMT-nin onu öz sıralarından çıxarmasını istəyir. Özü təşəbbüs göstərmir, çünki bu, Moskva ilə münasibətlərdə əlavə gərginlik yarada bilər. Demək olar ki, Ermənistan KTMT-dən çıxmaqla heç nə itirməyəcək. Əksinə, təşkilatdan çıxdıqdan sonra onun Avropa İttifaqı, Böyük Britaniya və ABŞ-la daha sıx əlaqələr qurmaq imkanları genişlənəcək. Ölkə KTMT-nin üzvü olaraq qaldığı müddətdə Qərblə yaxınlaşa bilməyəcək”.
Vidadi ORDAHALLI
