Murad Sadəddinov: "Zelenski deyir ki, müharibəni dayandırmağa da, Putinlə görüşməyə də hazıram..."
Ukrayna Prezidenti Volodimir Zelenski bildirib ki, son bir ay ərzində ABŞ Prezidenti Donald Tramp, Rusiya Prezidenti Vladimir Putin, ABŞ Konqresi və Avropa İttifaqının müxtəlif institutlarına göndərdiyi məktublar konkret nəticələr verib.
Şimali Avropa və Baltik ölkələri liderlərinin sammitindən sonra keçirilən mətbuat konfransında çıxış edən Zelenski qeyd edib ki, Trampa ünvanladığı məktubun əsas məqsədi Vaşinqtonun diqqətini Yaxın Şərqdən qismən də olsa Ukraynadakı vəziyyətə yönəltmək olub. O, xüsusilə Ukraynanın hava hücumundan müdafiə sistemlərinə və ballistik raketlərə qarşı vasitələrə ciddi ehtiyac duyduğunu vurğulayıb.
Zelenski bildirib ki, bu məktub nəticə verib, lakin əldə olunan nəticənin mahiyyətini hələlik açıqlaya bilməz.
Ukrayna lideri Putinə göndərdiyi məktubun da müəyyən məqsəd daşıdığını və bu məqsədə də nail olduğunu deyib. O, konkret nəticənin nədən ibarət olduğunu açıqlamasa da, lazım olan nəticəni əldə etdiyini vurğulayıb.
Bu arada Tramp Ukrayna və Rusiya liderləri arasında ikitərəfli görüşün keçirilməsi imkanını dəstəkləyib. Putin isə Zelenskinin açıq məktubunu oxuduğunu, lakin hazırda belə bir görüşün keçirilməsini məqsədəuyğun hesab etmədiyini bildirib.
Xatırladaq ki, may ayının sonunda Zelenski Trampa göndərdiyi məktubda Ukraynada hava hücumundan müdafiə sistemlərinin, xüsusilə də ballistik raketlərə qarşı vasitələrin çatışmazlığının dərinləşdiyi barədə xəbərdarlıq etmişdi.
Zelenski deyir ki, Trampa və Putinə yazdığı məktublarla istədiyi nəticəyə nail olub, lakin həmin nəticənin nə olduğunu hələ açıqlamır. O, konkret olaraq hansı nəticəni əldə edib və niyə bunu indiyə qədər açıqlamır?
Politoloq Murad Sədəddinov məsələ ilə bağlı "Bakı-Xəbər" qəzetinə açıqlamasında bildirdi ki, Zelenski Amerika prezidentinə göndərdiyi məktubda Ukraynanın HHM sistemlərinin bir elementi olan Patriot kompleksləri ilə bağlı müraciət edib: "Patriot kompleksləri ABŞ-dan birbaşa asılıdır. Çox güman ki, bu baxımdan Körfəzdə baş verən hadisələr fonunda Patriot sistemlərinin raketlərlə təmin edilməsində gecikmələrə olub. Bu məktubda yəqin ki, Zelenski həmin təminatın bərpa edilməsini xahiş edib. Nəticədə ABŞ Ukraynaya Patriot sistemləri üçün raket təminatını gücləndirib. Ukrayna prezidenti məhz buna işarə edir və bunu ona görə açıqlamır ki, söhbət hərbi təminat və təhlükəsizliklə bağlı məsələdən gedir.
O ki qaldı Zelenskinin Putinə göndərdiyi məktuba, həmin məktubu mən oxumuşam. Burada söhbət siyasi nəticələrdən gedə bilər. Ukrayna prezidenti yenə dünya ictimaiyyətinə göstərir ki, mən müharibəni dayandırmağa da, Putinlə görüşməyə də hazıram, bu barədə fikirlərimi də ifadə edirəm. Əvvəla, burada o, öz təsir imkanlarını genişləndirərək, məqsədlərinə nail olmaq üçün nəticə əldə edib. İkincisi, Rusiya tərəfi bu danışıqlardan imtina etməklə, yenə də beynəlxalq ictimaiyyətə göstərib ki, hazırda müharibənin dayandırılmasına mane olan tərəf Vladimir Putindir.
Ehtimal edirəm ki, bir məsələdə Roman Abramoviçin Ukraynaya səfərini nəzərdə tutur. Roman Abramoviç rəsmi olaraq Rusiya prezidentinin nümayəndəsi olub. Yəqin ki, onun Ukrayna səfəri çərçivəsində hansısa danışıqlar baş verib. Abramoviçin Ukraynaya getməsi də məktubla bağlı ola bilər. Fakt olaraq, Rusiya prezidenti bunu açıq şəkildə bəyan etməkdən çəkinsə də, gizli şəkildə Ukrayna prezidenti ilə hansısa danışıqlar aparılır. Hazırda biz o danışıqların məzmunundan da xəbərsizik. Ola bilsin ki, Zelenski həmin gizli danışıqlarda da müəyyən uğurlar qazanıb və bu bəyanatda həmin uğurlara da işarə edir”.
Dəniz NƏSİRLİ
