Tofiq Abbasov: "Qazaxıstan öz müstəqilliyini qoruyub saxlayacaq və möhkəmləndirəcək"
Qazaxıstan Prezidenti Kasım-Jomart Tokayev Ermənistanın Baş naziri Nikol Paşinyanı seçki qələbəsi münasibətilə ilk təbrik edən dövlət başçılarından biri oldu. Bu addım xüsusilə ona görə diqqət çəkir ki, son illərdə Tokayev bir sıra məsələlərdə Vladimir Putinin mövqeyi ilə üst-üstə düşməyən yanaşmalar sərgiləyib.
Maraqlıdır, Rusiya ilə Ermənistan arasında münasibətlərin gərginləşdiyi, Moskvanın İrəvana qarşı iqtisadi və siyasi təzyiq siqnalları verdiyi, hətta Ermənistanın Avrasiya İqtisadi İttifaqındakı gələcəyi ilə bağlı müzakirələrin aparıldığı bir vaxtda Tokayevin belə açıq siyasi jest etməsi nə ilə izah oluna bilər?
Qazaxıstan lideri Kremlin mümkün narazılığından çəkinmədən bu cür addımlar atarkən hansı geosiyasi dayaqlara güvənir? Bu, Astananın getdikcə daha müstəqil xarici siyasət yürütməsinin göstəricisidir, yoxsa Qazaxıstan hesab edir ki, hazırkı beynəlxalq şəraitdə Moskvanın təsir imkanları əvvəlki qədər güclü deyil? Bu tendensiya Mərkəzi Asiyada güc balansının dəyişdiyinə işarə sayıla bilərmi?
Politoloq Tofiq Abbasov Qazaxıstanın müstəqil siyasət kursunu davam etdirmək əzmində olduğunu bildirib. Ekspert məsələ ilə bağlı “Bakı-Xəbər” qəzetinə açıqlamasında qeyd edib ki, dünyada köklü geosiyasi dəyişikliklər baş verir, köhnə beynəlxalq düzən zəifləyir və bir sıra dövlətlər maraqlarını güc yolu ilə təmin etməyə çalışırlar.
Onun sözlərinə görə, son illərdə baş verən hadisələr göstərir ki, hərbi və siyasi təzyiq vasitələri hər zaman istənilən nəticəni vermir. Bu baxımdan Qazaxıstan da dəyişən beynəlxalq reallıqları nəzərə alaraq öz suverenliyinin qorunmasına xüsusi önəm verir.
Politoloq vurğulayıb ki, Mərkəzi Asiya ölkələri artıq öz maraqlarını daha qətiyyətlə müdafiə edir və bərabərhüquqlu münasibətlər tələb edirlər. O, Tacikistan prezidenti Emoməli Rəhmonun bir neçə il əvvəl Rusiya Prezidenti Vladimir Putinə ünvanladığı məlum çağırışı xatırladaraq qeyd edib ki, region dövlətləri öz siyasi çəkilərini və imkanlarını daha aydın şəkildə ortaya qoyurlar.
Tofiq Abbasovun fikrincə, Qazaxıstan türk dünyası ilə əməkdaşlığa xüsusi önəm verir. Türkiyə ilə hərbi sənaye sahəsində əməkdaşlıq edən Qazaxıstanın Azərbaycan və Özbəkistanla da hərbi tərəfdaşlıq münasibətləri mövcuddur. Ekspert qeyd edib ki, Azərbaycanın müdafiə sənayesində əldə etdiyi uğurlar və Vətən müharibəsində qazandığı qələbə türk dünyasında, eləcə də postsovet məkanında mühüm stimul yaradıb.
Politoloq hesab edir ki, Qazaxıstan çoxvektorlu xarici siyasət yürüdərək ABŞ, Çin və digər tərəfdaşlarla münasibətlərini inkişaf etdirir. Onun sözlərinə görə, ölkə yalnız siyasi bəyanatlarla kifayətlənmir, eyni zamanda innovativ layihələrə və yeni çağırışlara açıq olmaqla real nəticələr əldə edir.
"Qazaxıstan öz müstəqilliyini qoruyub saxlayacaq və möhkəmləndirəcək, seçdiyi vektorlar üzrə inkişaf yolunu davam etdirəcək" , - deyə Tofiq Abbasov vurğulayıb.
Dəniz NƏSİRLİ
