Arzuxan Əlizadə: "Fakt və məhkəmə qərarı olmadan hər hansı şəxsin suçlanması düzgün deyil"
Hazırda etibarlı beynəlxalq mənbələrdə BCM-nin (Beynəlxalq Cinayət Məhkəməsi) baş prokuroru Kərim Xan haqqında porno videoların yayıldığını təsdiqləyən məlumat yoxdur. Amma son günlər yayılan xəbərlər onun barəsində uzun müddətdir araşdırılan cinsi xarakterli davranış ittihamları ilə bağlıdır. Bu ittihamlar fonunda o, vəzifəsindən müvəqqəti uzaqlaşdırılıb və məsələyə BCM-yə üzv dövlətlər tərəfindən baxılacağı açıqlanıb. Xan ittihamları rədd edir və özünü təqsirsiz hesab edir.
İnternetdə və sosial şəbəkələrdə son vaxtlar tanınmış şəxslər haqqında saxta videoların, montaj edilmiş görüntülərin və süni intellekt vasitəsilə hazırlanmış materialların yayılması halları tez-tez baş verir. Hazırda etibarlı xəbər agentlikləri və BCM tərəfindən Xanın iştirakı ilə porno videoların yayıldığı barədə təsdiqlənmiş məlumat verilməyib.
Amma məsələnin siyasi tərəfi ondan ibarətdir ki, vaxtılə Kərim Xan Putinin və Netanyahunun həbsinə order imzalayıb. Tramp şəxsən Kərim Xandan Netanyahunun həbsinə verilmiş orderin ləğv edilməsini istəmişdi. Xan isə bundan imtina etdi. Belə bir şəraitdə Kərim Xan haqqında seksual görüntülərin yayılması iddiasının qaldırilmasi təsadüfdürmü?
AMİP sədri, Milli Məclisin deputatı Arzuxan Əlizadə Beynəlxalq Cinayət Məhkəməsinin baş prokuroru Kərim Xanla bağlı yayılan məlumatlara münasibət bildirib.
Deputat "Bakı-Xəbər" qəzetinə açıqlamasında qeyd edib ki, Kərim Xanla əlaqələndirilən intim xarakterli videoların ona məxsus olması barədə yayılan iddialar hələlik öz təsdiqini tapmayıb və müxtəlif mənbələrdə bu barədə fərqli məlumatlar yer alır.
"Oxşar videolar mövcuddur, lakin həmin görüntülərdəki şəxsin konkret olaraq Kərim Xan olması təsdiqlənməyib. Buna görə də onun bu məsələ ilə bağlı ittiham edilməsinin faktoloji əsası yoxdur" , – deyə deputat bildirib.
Arzuxan Əlizadənin sözlərinə görə, tanınmış şəxslər barədə sosial şəbəkələrdə tez-tez şantaj xarakterli, onların işgüzar nüfuzuna xələl gətirməyə yönəlmiş məlumatlar yayılır və Kərim Xanla bağlı ortaya atılan iddialar da bu qəbildən qiymətləndirilə bilər.
Deputat xatırladıb ki, Kərim Xan həm Rusiya Prezidenti Vladimir Putinin, həm də İsrailin Baş naziri Benyamin Netanyahu ilə bağlı Beynəlxalq Cinayət Məhkəməsinin qərarlarının qəbul edilməsində iştirak edən şəxslərdən biridir. Onun fikrincə, bu səbəbdən də baş prokurora qarşı müxtəlif təzyiq və nüfuzdan salma cəhdlərinin olması istisna edilmir.
Bununla yanaşı, Arzuxan Əlizadə vurğulayıb ki, yayılan məlumatlar hələlik təsdiqlənməyib və hüquqi qiymət almayıb.
"İstənilən halda bu məlumatlar təsdiqini tapmayıb. Ona görə də hər hansı bir şəxsin fakt və məhkəmə qərarı olmadan suçlanması düzgün deyil. Bu baxımdan onun haqqında irəli sürülən iddialar da əsassız görünür" , – deyə deputat qeyd edib.
Dəniz NƏSİRLİ
