Bəhruz Quliyev:"Separatizmə görə mühakimə olunan şəxslərin taleyi üzərindən siyasi kampaniyaların aparılması əvvəlki təsir gücünü itirə bilər”
İyunun 7-də Ermənistanda keçirilən prezident seçkilərində hakim "Vətəndaş Müqaviləsi" partiyası qalib gəldi və baş nazir Nikol Paşinyan rəqiblərini məğlub etdi. Bu seçki eyni zamanda revanşistlərin məğlubiyyəti ilə nəticələndi. Parlamentdə böyük tərkibdə yer tutmağa çalışsalar da, istəklərinə nail ola bilmədilər.
Ermənistanda keçirilən seçkidə revanşistlər məğlub olandan sonra Bakıda mühakimə olunub həbsə məhkum edilmiş separatçı canilərə münasibətdə Ermənistan dövlətinin siyasətində hansı dəyişikliklər ola bilər? Onları daha kim müdafiə edər?
“Səs” qəzetinin baş redaktoru, siyasi ekspert Bəhruz Quliyev baki-xeber.com-a bildirdi ki, Ermənistanda keçirilən son parlament seçkilərinin nəticələri göstərdi ki, cəmiyyətin əhəmiyyətli hissəsi revanşizm, müharibə ritorikası və regionda yeni qarşıdurma yaratmaq istəyən siyasi qüvvələrə etimad göstərmədi: “Bu məğlubiyyət təkcə daxili siyasi balansın dəyişməsi deyil, həm də Ermənistanın gələcək xarici siyasət kursuna təsir göstərə biləcək mühüm hadisədir.
Məhz bu kontekstdə Bakıda mühakimə olunmuş və Azərbaycan qanunları əsasında məsuliyyətə cəlb edilmiş separatçı canilərlə bağlı Ermənistan dövlətinin mövqeyində də müəyyən dəyişikliklərin baş verməsi ehtimalı artır. Çünki Ermənistan cəmiyyəti getdikcə daha çox anlayır ki, keçmiş işğal siyasətinin müəllifləri və icraçıları ölkəyə inkişaf, təhlükəsizlik və rifah deyil, məğlubiyyət, təcrid və iqtisadi gerilik gətirib".
Ekspert qeyd edib ki, revanşist qüvvələrin zəifləməsi fonunda rəsmi İrəvanın həmin şəxslərin müdafiəsini dövlət siyasətinin əsas istiqamətlərindən biri kimi təqdim etməsi əvvəlki dövrlərlə müqayisədə daha çətin görünür. “Seçkidən dərhal sonra Paşinyan bəyan etdi ki, Ermənistan hakimiyyəti regionda kommunikasiyaların açılması, iqtisadi əməkdaşlığın genişlənməsi və sülh gündəliyinin irəli aparılması kimi məsələlərə üstünlük verəcək. Bu baxımdan separatizmə görə mühakimə olunan şəxslərin taleyi üzərindən siyasi kampaniyaların aparılması əvvəlki təsir gücünü itirə bilər.
Bu o demək deyil ki, onların müdafiəçiləri tamamilə yox olacaq. Hələ də müəyyən radikal dairələr, xaricdə fəaliyyət göstərən erməni millətçi təşkilatları və revanşist siyasi qruplar həmin şəxsləri "qəhrəmanlaşdırmaq" cəhdlərini davam etdirəcəklər. Lakin seçkinin nəticələri göstərdi ki, Ermənistan cəmiyyətində bu ideologiyanın sosial bazası əvvəlki illərlə müqayisədə xeyli zəifləyib.
Digər tərəfdən, beynəlxalq ictimaiyyət də getdikcə daha aydın şəkildə anlayır ki, söhbət siyasi baxışlarına görə deyil, konkret cinayət əməllərinə görə mühakimə olunan şəxslərdən gedir. Azərbaycan öz ərazisində törədilmiş cinayətlərlə bağlı qanuni hüquqlarını həyata keçirib və bu proses beynəlxalq hüququn prinsiplərinə uyğun şəkildə aparılıb.
Hesab edirəm ki, bu gün regionun gələcəyi separatizmin müdafiəsindən deyil, sülh müqaviləsinin imzalanmasından, qarşılıqlı ərazi bütövlüyünün tanınmasından və əməkdaşlıq mühitinin formalaşdırılmasından keçir. Ermənistan seçicisinin verdiyi son mesaj da məhz budur: keçmişin müharibə və işğal siyasəti deyil, gələcəyin sülh və inkişaf gündəliyi prioritet olmalıdır. Revanşistlərin məğlubiyyəti fonunda separatçı cinayətkarların müdafiəsi ətrafında qurulan siyasi kampaniyaların da tədricən təsir imkanlarını itirəcəyi gözləniləndir."-deyə, B.Quliyev əlavə edib.
İradə SARIYEVA
