Parlament seçkilərindən sonrakı günlər ərzində Ermənistanda ictimai müzakirələr müxalifətin mandatlarından imtina edib-etməməsi məsələsinə yönəlib. Ekspertlər müxtəlif təhlillər və nəticələr təqdim ediblər: bir tərəfdən mandatları qəbul etmək çağırışları, digər tərəfdən isə onlardan imtina etmək çağırışları var.
Seçki kampaniyasında iştirak edən siyasi qüvvələr hələlik bu suala dəqiq cavab verməyib və əslində heç bir variantı istisna etmirlər. Yekun qərar, çox güman ki, bəzi seçki məntəqələrində səslərin yenidən hesablanmasından sonra veriləcək və əsasən səs nisbətindəki mümkün dəyişiklikdən asılı olacaq. Keçmiş ədliyyə naziri və Milli Məclisin keçmiş sədr müavini Arpine Ovannisyan qeyd edir ki, müxalifətin mandatlardan imtina etməsi olduqca mürəkkəb bir prosesdir, çünki qanun seçki siyahısına daxil edilmiş hər bir namizədin şəxsən yazılı şəkildə mandatdan imtina etməsini tələb edir. Siyasi partiyanın onların adından belə bir bəyanat vermək səlahiyyəti yoxdur: "Yəni onlar bir-bir imtina etməyə başlamalı, hər biri istefa ərizəsi təqdim etməlidir. Eyni zamanda, müxalifətin mandatları digər qüvvələrə verilməyəcək. Müxalifət parlamentdə boş yerləri saxlayacaq. Parlament formalaşacaq və seçkilərdən sonra aldığı mandatların sayı ilə yalnız Vətəndaş Müqaviləsi Partiyası orada olacaq". Onun sözlərinə görə, hər bir namizədin imtinasından 7 gün sonra mandat növbəti namizədə təklif olunmalıdır və bu, siyahıdakı sonuncu şəxsə qədər belə davam edəcək.
Prosesi sürətləndirmək üçün Ovannisyan müxalifət qüvvələrinə siyahıdakı son namizədlərdən başlayaraq imtina ərizələrini təqdim etməyi məsləhət görür. Bu, mərhələli yanaşmaya ehtiyacı aradan qaldıracaq. O, həmçinin qeyd edib ki, mandatlarından imtina etmək qərarı verilərsə, siyasi qüvvələrin müttəfiqlərindən heç birinin parlamentlə ayrıca danışıqlara girməyəcəyinə və ya parlament yerlərini saxlamağa qərar verməyəcəyinə tam əmin olması vacibdir. Əks təqdirdə, proses məqsədinə çatmadan uğursuzluğa düçar olacaq. Növbəti sual mandatlardan imtina etməyin məqsədəuyğunluğudur: "Siyasi baxımdan imtinanın məqsədi parlamentin səlahiyyətlərini ləğv etmək və ağrılı qərarlar da daxil olmaqla, potensial hökumət qərarlarını boykot etməkdir. Hazırda “Vətəndaş Müqaviləsi” Partiyasının 64 mandatı var ki, bu da, məsələn, yeni konstitusiya layihəsini qəbul etmək üçün kifayət deyil. Onlar planlaşdırdıqları yeni konstitusiyanı qəbul edə bilməzlər. Bütün digər qanunvericilik dəyişiklikləri üçün kifayət qədər səsləri var". Buna baxmayaraq, keçmiş nazirin fikrincə, müxalifətin mandatlardan imtina etməsinin əsas nəticəsi siyasi böhran olacaq. Hökumətin mümkün həll yolu tapmaq üçün atdığı istənilən addım, istər qanunvericilik dəyişiklikləri, istərsə də "çətin" formulların qəbul edilməsi yolu ilə, böhranın həlli deyil, ona qarşı mübarizə cəhdi olacaq. Əgər Vətəndaş Müqaviləsi Partiyası parlamentdəki ümumi yerlərin üçdə ikisindən azını tutarsa, konstitusiya dəyişiklikləri layihələrini qəbul etmək, hətta onları referenduma təqdim etmək hüququna malik olmayacaq. Hakim partiya, həmçinin, zəruri hallarda Ermənistan prezidentini vəzifəsindən uzaqlaşdıra bilməyəcək. İkinci mümkün ssenariyə - mandat qazanmaq və parlamentə daxil olmaq məsələsinə gəldikdə isə, Ovannisyan qeyd edir ki, bu variantın tərəfdarları əsasən parlamentdən səsləri oğurlamağı və potensial hakimiyyət keçidlərinə başlamağı müdafiə edirlər ki, bu da, onun fikrincə, qeyri-realdır. Son beş ilin təcrübəsi buna sübutdur: “Son beş ildə bunun uğursuzluğunun şahidi olmuşuq. Hətta ən böyük çətinliklər zamanı belə, parlamentdən səsləri “sürükləyə” bilmədi. Buna görə də bu müxalifət arqumentləri əlavə əsaslandırma tələb edir. Ümid edirəm ki, bu suallara cavab tapılacaq”.
Ovannisyan vurğulayır ki, əgər bu məsələlər həll olunmazsa, ictimaiyyət daha bir böyük məyusluqla üzləşəcək.
Ramil QULİYEV
