Məhəmməd Əsədullazadə: “Rusiya bununla göstərmək istəyir ki, Paşinyanın legitimliyini tanımaya bilər”
Rusiya Xarici İşlər Nazirliyi Ermənistanda baş tutan növbədənkənar parlament seçkilərinin ilkin nəticələrinə və Paşinyanın qələbəsinə rəsmi münasibət bildirib. XİN-in rəsmi nümayəndəsi Mariya Zaxarova Ermənistandakı seçki prosesini kəskin tənqid edərək İrəvanda demokratik prinsiplərin kobud şəkildə pozulduğunu bəyan edib:
“Ermənistandakı seçkilər müxalifətə qarşı misli görünməmiş inzibati təzyiqlər, total qorxu mühiti və Qərb qüvvələrinin prosesə açıq, kobud müdaxiləsi şəraitində keçib”.
Moskvanın İrəvanla gələcək münasibətlərinə də toxunan Mariya Zaxarova, Kremlin bundan sonra Paşinyan hakimiyyətinə qarşı daha ciddi və praqmatik mövqe nümayiş etdirəcəyinin anonsunu verib: “Rusiya Ermənistana qarşı gələcək xarici siyasət kursunu erməni rəhbərliyinin sözlərinə deyil, atacağı real və praktiki addımlara uyğun olaraq qurmaq niyyətindədir”.
Kremlin mətbuat katibi Dmitri Peskov da oxşar mövqe sərgiləyib: “Kreml Ermənistandakı seçkilərin yekun nəticələrinin elan olunmasını gözləyir və çoxsaylı qanun pozuntuları da daxil olmaqla, bütün məlumatları qeydə alır”.
Görünən odur ki, Rusiya total şəkildə hücuma keçib. Hökumətdən tutmuş bütün media resursları, ekspertlər seçkinin nəticələrini qaralayır, bu barədə heç bir müsbət söz deyilmir, yeri gəldi-gəlmədi xırda seçki pozuntuları ortaya çıxarılır və s. Məlum məsələdir ki, Moskva Paşinyanın belə üstünlüklə qələbə əldə etməsini həzm etmir. Ancaq bütün bunlarda Rusiyanın hədəf və məqsədi nədir, bu taktika ilə nəyə nail olmaq istəyir? Rusiyanın seçkini belə pisləməklə hansı planları var?
Sözügedən məsələ ilə bağlı fikirlərini baki-xeber.com-la bölüşən politoloq Məhəmməd Əsədullazadə hesab edir ki, Rusiyanın belə mövqe sərgiləyəcəyi gözlənilən idi: “Ona görə ki, Rusiya özünə yaxın qüvvələri Ermənistanda hakimiyyətə gətirə bilmədi. O səbəbdən iddia edir ki, Paşinyan hakimiyyəti müxalifətə qarşı repressiyalar həyata keçirir. Bununla Rusiya Paşinyana təzyiqlər etməyə çalışır. Təbii ki, Moskva bununla artıq Ermənistanda gedən proseslərə təsir edə bilməyəcək. Sadəcə Rusiya bununla göstərmək istəyir ki, Paşinyanın legitimliyini tanımaya bilər. Hesab edirəm ki, Rusiyanın bütün media və digər resurslarının səfərbər olaraq Paşinyanın üzərinə getməsi bununla bağlıdır. Moskva əvvəl-axır Paşinyanla işləməli olacaq. Hesab edirəm Zaxarova və Peskovun sərt açıqlamalarla çıxış etmələrində məqsəd beynəlxalq qurumların diqqətini Ermənistana cəlb etməkdir. Fikrimcə, bir müddət sonra Paşinyan Rusiyaya səfər edərək Moskva ilə məsələləri yoluna qoyacaq. Sadəcə, Paşinyandan bəzi güzəştləri qoparmaqdan ötrü indidən təzyiqlərin dozasını artırırlar. Ermənistanda istehsal edilən aqrar məhsullara tətbiq edilən məhdudiyyətlər həm də bununla əlaqədardır. Çünki Rusiya Ermənistandan Avrointeqrasiya siyasətindən əl çəkmələrini tələb edir. Ümumilikdə, iki ölkə arasında problemlər getdikcə dərinləşə də bilər. Paşinyan revanşist müxalifətə qarşı sərt addımlar atacaq. Çünki növbəti mərhələdə müxalifət parlamentin işini pozmağa çalışacaq. Bir sözlə, Rusiya-Ermənistan əlaqələrində gərginlik hələ davam edəcək”.
Vidadi ORDAHALLI
